YAKOBO 4

1Mbi kiki ikikwambusa amagalu mwitakile nu kwitova? Siukuta uwudobokesi wenyu wewulimwigalu mwanyenye. 2Mwidobokela ifinu na pakuva simwihwana ukuva nafyo, mukwidikila nambi ukuwulaga; mwidoboka ukulutila ukuva na ifinu, neke simukufiwona; nambi mukwitakila nu kwitova. Simwiva na finu pakuva simumukumusuka Nguluvi. 3Kangi, napemwisuka simwipelwa pakuva mwisuka fibi, mwisuka sambi mukwise isa uwudobokesi wenyu hela. 4Nyenye mwivanu yemwigaya uwihuvilwa ndawe avagoni. Mbi simukulukagula ulwa ukuva munyawiyendi va ing'i kwe kuva wimutavangu va Nguluvi? Yeyeawendaga ukuva munyawiyendi va ing'i uyo ayiva mutavangu va Nguluvi. 5Mbi mwitigila uwandike wugaya kinu uwitigila, “Nguluvi aiva na gila na Umuhe vakwe yeamuwuyipe ikale mwahwehwe?” 6Neke uwuwuya wetwipelwa na Nguluvi wunyaludali ululutye; ndawe lwewilonga Uwandike Uwelu, Nguluvi akuvabesa vanyakidada, neke akuvapela uwuwuya Avilevesi. 7Sweno, mwivikage pa wulolesi wa Nguluvi; mumukanilage Setani nave avakimbila nyenye. 8Mumuhegelelage Nguluvi, nave avahegelela. Mofugage inumbula senyu nye mwevabuganisi! 9Muhuguvalage, muvembage nu kukwikula, uluheko lwenyu luvelage kivembo na uluhekelelo lwenyu luvelage kivembo kikomi. 10Mwilevesage pa Nguluvi, nave avapela ululumbo. 11Vanyalukolo vangu, mulisokama yinyenye kwa yinyenye. Yakumusokama munyalukolo nu kumuhiga, uyo akwisokama nu kusihiga Indagilo. Lino wone veve isihige Indagilo, sweno, veve sipewinatila Indagilo pesi ukuta lino ukusihiga. 12Nguluvi ye iyena hela yemunyakusivika Indagilo na ukusihiga. Na yumwene yeiyena swe yahwanite ukupoka nu kuwulagila ng'ani. Sweno, veve wi nani mbaka umuhige umunu muyago? 13Sweno, lino mupulikisage nyenye yemwitigilaga, “Neng'ino apangi imilawu tubita ku boma iyingi nu kwikala kuko umwaka mbeguli twisulusa nu kwambula,” 14Nyenye simuwuseli na wunani wenyu wewuva imilawu! Nyenye mwindawe ing'ungugu yeyayiva yipwali lusika ludodo hela na lusika ludodo kangi yayiva yinyekite. 15Ipo luke luvavaje mutigile, “Wone Umutwa awende apo tupiga iki apangi kila.” 16Neke, lino mwina kidada na ukwilumba, ikidada icho kibi sikinofu nda. 17Sweno, umunu yula yesiipiga ulunofu lweakulukagula ulwa lumuvaje apige ava apigite inzanangifu.

will be added

X\