YAKOBO 3

1Vanyalukolo vangu, mwevangi mulemwa ukuva vigisi. Ndawe lwemukulukagula, hwehwe twe vigisi satuhigwa pakomi ukulutila avangi. 2Neke wone umunu siisooma mumilongele jakwe, sweno, uyo akwilaniche, na ahwanite awuvike muchoga uwunu wakwe mbewuli. 3Hwehwe twakusivikila ifwalasi ulupanda mumilomo sambi situpulike, na ukukola lulo twihwana ukusilongosa kukwekuvesaga kwetwiwenda. 4Ifipugu ifikomi nafyo, nambi we fikomi wuhulo, na fyafisugisiwa na ing'ala, fyafipitulwa na kanu kadodo ka ukulongokesa ifipugu, na ukukola kako umunyakugendya ahwanite ukukisindika kukwekuvesaga. 5Lwindahihyo, ululimi nambi we kigawamuvili kidodo mumuvili, lwakwitunumika wuhulo. Umoto mudodo guhwanite gunyanye ilikungu lihafu. 6Welwiwali na ululimi lwindawe umoto. Lumemile uwaafu uwulipolofu, nambi we lwina kilega mumivili jetu na lwalwitagalisa uwaafu muwunu wetu mbewuli. Lwalwilalisa imikalile jetu mbegili ukukola umoto ugwihuma ku Lyoto ukwene. 7Avanu vahwanite ukukwamila ifikoko, na vakasuumite ukukwamila ifikoko mbefili, ifikoko fya mwihala, ifidege, inzoka na ifikoko fya mubahali. 8Asukuli yeahwanite ukulukwamila ululimi. Ululimi kinu chaafu, lugaya kisiko, na lumemile uwusungu uwuwulasi. 9Ukukola ululimi hwehwe twakumulumba Umutwa na Udadetu. Na ukukola lululimi lulo twakuvakotola avanu, avanu avagave mulwihwano lwa Nguluvi. 10Ing'ani isa ukukotola na isa ululumbo sihumaga mu mulomo gugo gumwi. Vanyalukolo vangu, ing'ani isi sisivaji ukwima ndahihyo. 11Ngali, umufwilo gwa ululenga gumwi guhwanite ukuhumya ululenga ululengu na ulutiigu? 12Ngali vanyalukolo vangu umusombe guhwanite guveleke iseituni? Apangi, Umusabibu guhwanite guveleke imisombe? Umufwilo ugwa ululenga ulunyamwino siluhwaniti guve na ululenga ulunono. 13Mbi, ye nani munyaluhala mwanyenye? Sweno, alagilage ulukani ulu ukukola imigendele jakwe iminofu na mufipigo fyakwe ifinofu ifipigikila muwilevesi na uluhala. 14Neke wone imitima jenyu gimemile igila, imbipi na ulwiyendo, sweno, mulemwa ukwisumila na ukulonga uwudesi we mwisutana na isa nachene, 15uluhala lwandahihyo silwindawe ulwihumaga kuchanya, ulo lwa konivala, na si lwa kinyamuhe na umwanangifu. 16Pakuva pala pepina igila na ulwiyendo lwa uwusatilapakwe, ipo pava na liyoyo na ifipigo ifya uwanangifu. 17Neke uluhala ulwihumaga kuchanya, ulwa ukutala ulu lweesiwe, lwalwiwenda uwikalakunoga, uwulele na ulwitugaga avanu, lumemile ulusungu na lwalwiveleka ifipigo ifinofu, lugaya lubagu nambi wubuganisi. 18Uwugolofu ge maveleko ga inyadikwa se avawenda uwikalakunoga vavivyalila mu wikalakunoga.

will be added

X\