AVAEBULANIYA 9

1Nalufingano ulwa ukutala lwe lwina ulwinungo lwakwe lwa ukusunyalila na kangi apono pa ukusunyalila apepasenge na avanu. 2Pawuyipwe ilihema lye pivala pailyo patambuligwe apono apelu. Ipo pepina ikimikiso cha itala, imesa na imikate ijemitawule kwa Nguluvi. 3Kunzingo ya ikibupa cha kavili, pepina ilihema pepatambuligwe Apono Apelu Hilo. 4Umo mugati pepopali pifunyo apawuyapile isahabu pakufung'ilisa uwufumba, na ilisandiko lya ulufingano, na lilyene lyelibake isahabu imbali mbesili, mugati umo mwemwina ikitonga cha isahabu ichekisope imana, na ingoda ya Haluni yeyeyilembwe amahamba, na fila ifibawo ifivili fyefyefyandikwe Ulufingano, 5pachanya pa ilisandiko pepina ifigawa finyamapiko ifyalagilige uwulipwali wa Nguluvi, na amapiko gegagubike apono pe inzanangifu sadegepiligwe. Neke lino, situhwaniti ukulonga wima ulwa ing'ani iso kangi. 6Iso isapigigwe neke pambele swe save musimu ku vatambisi ukwingila wekwache pa ilihema lya pivala ukupiga uwupisi wawo. 7Neke umutambisi umuvina yeiyena yeingilige pihema lya kavili, nave apigige ulo kamwi peguvesaga mwaka. Na peingilige mugati ategulige idanda yeamutawulilige Nguluvi uwimila umwene na uwimila inzanangifu sa avanu isevapigite kwa uwugaya nzeli. 8Uwimila imigosekese ijo Umuhe Umwelu akwigisa pawelu ukuta ulusika lila lihema lya pivala pelye likali we limite, ing'asi ya ukwingilila Apono Apelu siyiladindulwa. 9Ulukani ulo che kiganiso cha imisika igi ja lino. Lwilagila ulwa ifitawulwa na inambika isitawulwa kwa Nguluvi sisihwaniti ukuwuyapa inumbula sa vala vevakusunyalila ukuva sikwilaniche. 10Pakuva iso mbesili sikwimila mu filyo, ifinywewa na imisimu igiliwungi na wungi ja ukukalava. Mbesili iso wulagise wa kwivala hela; na uludali lwayo lwalwiduga ulusika lwe Nguluvi iwuyapa wupya ifinu mbefili. 11Neke Kilisito yeafisile, iva Mutambisi Muvina va ing'ani inofu, se kulino yesifikite, umwene ipigila pihema ilinofu na ilikwilaniche hilo, lyesiwuyape na amawoko ga vanu, kwekutigila ilyo silya mung'i umu umwagafilwe. 12Umwene inje Apono Apelu sukumwi hela, kangi sieategwi nambi danda ya mene nambi ya senga, pesi ulwa inje kwa danda yakwe yumwene, swe akutupela uwukombolwa uwutasila. 13Pakuva ukuhanyilwa avanu avahongawinya idanda ya imene na ing'ambakwa na kangi ikifu cha indamaa fikwesaga na ukuleta uwelu wa umuvili. 14Mbi idanda ya Kilisito, sisailutisa ya ukukola mu muhe va mbepali itawe yumwene we mugaya wulongwa fibi ofuga inziyiwuko senyu uluhuma mumipigile iminofu sambi mumupigile Nguluvi umumi. 15Palulo Kilisito, yeagosise Ulufingano ulupya sambi vala avakemele na Nguluvi vanukile uwufunyilile wa mbepali na mbepali wealavahuvise, pakuva ifwa yiwonike iyikombolaga avanu uluhuma mula mu wananzi wevapigite ulusika lwa ulufingano ululovela. 16Na mbepali ulwandiko lwa uwulagise wa umunu yeaihagula yula umunu yategula amalila ga uwunono wakwe paumwene yaafwe, ulo lwakwidikilwa pala pe ifwa yakwe yiva yeyifikite. 17Uwulagise uwo siwuhwaniti wupigilwe kinu mbaka pala peyiwonike ifwa, pakuva uwulagise siwipigilwagi kinu pe yula umunyakulagisa pe mumi. 18Nambi na lula ulufingano ulwa ukutala silwawuyipwi wone pagaya ukubohoka danda. 19Musa avimbye avanu indagilo mbesili ndawe lwesenzandike swe ndawe ategulige idanda ya isenga na imene pamwi nu lulenga, nu kukola uludete lwa hisopo nu wuhamba uwudung'u, swe akukihanyila ikitabu cha indagilo na vawo avanu mbevali. 20Musa atige, “Iyi ye danda iyikangasa ulufingano lwe mwivalagile na Nguluvi mwinatilage.” 21Kangi Musa ahanye ilihema idanda na ifinu fyevakolige muwusunyalile. 22Ena, nachene uwimila indagilo, fikwenda ifinu mbefili fihwane ukofugwa na idanda, na inzanangifu naso sidegepelwaga hela wone idanda yeyibohwike. 23Ifinu ifi fye wita mwigigi hela gwa ifinu ifya nachene fya kuchanya, lwafivaje ukofugwa mung'asi yiyo. Neke ifinu fya kuchanya sifiguluma inambika inofu hilo iyilutye. 24Pakuva Kilisito siinji Apono Apelu apawuyape na amawoko ga vanu, pe wita wanda mwigigi hela gwa fila ifyanachene. Umwene iinje ukwene hilo kuchanya kwe kulino imite pa Nguluvi ukwimila hwehwe. 25Kangi umwene siingiligi pifunyo kitapilukila ndawe umutambisi umuvina yeingilige pifunyo peguvesaga mwaka weategwe idanda yesiyakwe. 26wone lweluve ndahihyo, Kilisito lwelumuvagila ukuteseka kolofu uluhuma ukugawa kwa ing'i. Neke lino imisika igi pegihegelela kuwusililo wayo, umwene awonike sukumwi hela, ukuhesa inzanangifu kwa ukwitawula yumwene nambika. 27Sweno, lwindahihyo yeyeavesaga munu ifwisaga sukumwi hela, swe asakwima pa wuhigilo wa Nguluvi, 28lwindahihyo nave Kilisito itawe nambika sukumwi hela sambi asihese inzanangifu sa awolofu. Pesaiwoneka ulwa kavili, siwita kangi akusa kukwihoma na inzanangifu, pesi ukuta kukuvapoka vala avakumusindila umwene.

will be added

X\