AVAEBULANIYA 5

1Yeyeavesaga Mutambisi muvina aihagulwa uluhuma muvanu uwimila ukumupigila Nguluvi iva ahalye pavene, atawule ifitawulwa na inambika uwimila inzanangifu sawo. 2Pakuva na yumwene nave muhomefu, ahwana ukuvawonela ulusungu vala aviyaga na avagaya inzeli vipiga inzanangifu. 3Na ulwa na yumwene pakuva muhomefu ndahihila, lumuvaje atawule inambika uwimila inzanangifu sakwe yumwene, siuwimila inzanangifu sa avanu vangi hela. 4Sikwali umunu yeahwana ukwitegulila ululumbo yumwene lukuva Mutambisi Muvina. Yeavesaga aihagulwa na Nguluvi ukuva Mumbisi Muvina ndawe lweeiwali Haluni. 5Lwindahihyo nayi Kilisito siitegulii yumwene ululumbo lukuva Mutambisi Muvina, pesi ukuta Nguluvi amutige: “Veve wi Mwanangu; Nene neng'ino yembe Dado.” 6Alonzile kangi apono apangi: “Veve wi mutambisi kitasila, mumigosekese gigila ja Melekisedeki.” 7Nave Yesu peikalige umu mung'i, kwa ikivembo kikomi na kwa inzihosi amusukige nu kwifunya kwa Nguluvi yula yeeina uludali lwa ukumuponia mufwa, nave apulikwe pakuva amogopige Nguluvi. 8Nambi, weali mwana va Nguluvi, iyigise ukuva na choga ukugendela uluteseko. 9Na peyeawuyipwe akwilaniche, swe iva kilamuko cha uwupoki uwutasila, kwa vala mbevali avakumupulika, 10nave Nguluvi swe akumuhagula ukuva Mutambisi Muvina ikola imigosekese ja uwutambisi wa Melekisedeki. 11Twina nzolofu isa ukulonga mu lukani ulu, neke lino lutalamu ukuvaganulila, pakuva nyenye simuvapefu ukulukagula. 12Ku lino luke luvavagila ukuva vigisi swe lukwile, neke lino pemusaka umunu va ukuvigisa inzigiso isa umuvango isa ulukani lwa Nguluvi. Pakuleka mupelwe ikilyo ikikangafu, ino lukuvavagila mupelwe lisiva munywe. 13Yeyeavesaga munu yeipelwa lisiva anywe uyo pe mwana mudodo, salawukagula uwugolofu chekiki. 14Neke ikilyo ikikangafu icho chakiva kuvanu avavina avakange, ve uluhala lwawo lwasoveliswe ukuhiga inofu na imbi.

will be added

X\