AVAEBULANIYA 4

1Sweno, pakuva uluhuviso lwa ulusuupo pepololi tuvelage na muhwehwe alonga umunu yeyeavesaga mwahwehwe alalemwa ukwingila mulusuupo ulo. 2Pakuva Ulukani Ulunofu yeludalikwe ukwetu ndawe welwadalikwe kuvanu va pidaha. Neke ulukani ulo silwavakwili kinu, pakuva valupulike neke vave sivalwanuchi mu lufuuwo. 3Sweno, hwehwe yetwifuuwa tukwanukila ulusuupo ulo lwe Nguluvi ealuhuvise. Ndawe lwealonzile: “Ndavifile, swe ngwilapa: ‘Sisavingila apangu pawusuupo.’ ” Nguluvi alonzile iso nave ikipigo chakwe yechekisisile uluhuma ukugawa kwa ing'i. 4Pakuva Uwandike wilonga apangi de ulwa ikimunyi icha mufung'ati, “Nguluvi asuupite ikimunyi cha mufung'ati swe akufileka ifipigo fyakwe mbefili.” 5Kangi ulukani ulu nalo lwilongwa, “Sisavingila apangu pawusuupo.” 6ino uluhuviso ulo lwa ukwingila pepololi pakuva vala vevadalikilwe pamwandi valemilwe ukwingila umo pakuva vagayite ulufuuwo. 7Nguluvi avikite ikimunyi ikingi ikitigilwa “Neng'ino”. Alonzile pambele ukugendela kwa Daudi myaka myolofu ijegilutye, ulwa uwandike uwo yewewulonzilwe: “Wone mupulike liswi lya Nguluvi neng'ino, mulonga muve na numbula nalamu.” 8Wone Yosuwa eahwane ukuvapela ulusuupo ulo, Nguluvi siealonga kangi ulwa ikimunyi ikingi. 9Kwa lulo, pepololi ulusuupo lwa avanu va Nguluvi ndawe kula ukusuupa kwakwe Nguluvi ikimunyi icha umufung'ati. 10Pakuva, yeyeipigila pawusuupo wa Nguluvi saasuupa uluhuma mukipigo chakwe ndawe Nguluvi lweasuupite uluhuma mu kipigo chakwe. 11Sweno, tukangalage ukwingila mulusuupo ulo, sambi alemwe ukuva pwali munu mwahwehwe yeigwa mukufuuwa. 12Pakuva lukani lwa Nguluvi lunyawumi na kangi lwina ludali; lwina uwugi ukulutila limage ilinyawugi mbekuli. Lyalidumula mbaka apono pe inumbula na Umuhe fitang'ana, mbaka pala pefitang'ana ifigawamuvili na umwindi. Ulukani ulo lwalwihiga uwukalalile na amahosa ga munumbula sa avanu. 13Sikokili ikigawa chechekivesaga ikifihime pa Nguluvi, chechekivesaga kivike pawelu palumwene. Kulumwene, hwehwe mbetuli salutuvagila twilongele isa ifipigo fyetu. 14Sweno, lutuvaje ukwinatila hilo ulufuuwo lwetukulwidikila. Pakuva twinave Umutambisi Umuvina yeinje mbaka kwa Nguluvi yumwene--Yesu, Umwana va Nguluvi. 15Pakuva sitwinave Umuvina yesi awuseele hilo uwuhomefu wetu, yumwene agelitwe ndawe hwehwe munzolofu na saapigiti nzanangifu. 16Sweno, tulava na umuhwehwe ukuhegelela kwa Nguluvi, umunyawuwuya twanukile ulusungu na uwuwuya atutange petwiguluma uwutanzi.

will be added

X\