AVAEBULANIYA 3

1Vanyalukolo vangu, nye vanu va Nguluvi yemuvakemele na Nguluvi kuchanya, mwihose ulwa Yesu ye Nguluvi amutumite ave Mutambisi Muvina va ulufuuwo lwetukulwindika. 2Umwene e muhuvilwa kwa Nguluvi yeamuhagwe, apige ikipigo chakwe ndawe Musa lweemuhuvilwa mukaye mbeyili ya Nguluvi. 3Umunyakusenga ikaye ayipelwa ululumbo ukulutila ikaye yiyene. Lwindahihyo nayi Yesu anoje ululumbo lukomi hilo ukulutila Musa. 4Yeyeyivesaga kaye yisengwagwa na umunu uyungi de--nave Nguluvi ye musenzi va ifinu mbefili. 5Musa emuhuvilwa mukaye mbeyili ya Umutwa wita mukami, na yealonzile ing'ani mbesili se Nguluvi saalonga ipo pambele. 6Neke Kilisito muhuvilwa ndawe umwana umunyalulagilo mukaye ya Nguluvi. Hwehwe twikaye yakwe wone twinatile uwupifu wetu na uwukwilanifu wetu ukwimila kila chetuhele tukwihuvila. 7Sweno, ndawe lweilonga Umuhe Umwelu: “Wone mupulike liswi lya Nguluvi namunyi, 8Mulava nalubesa munumbula senyu ndawe avakukwenyu lweveviwali; pevamupitwike Nguluvi; Ndawe lweveviwali ikimunyi kila kula ku balali, pevamugelite Nguluvi. 9Uko avakukwenyu vangelite na ukumingaminga, ilonga Umutwa, nambi we yevevafiwene ifipigo fyangu myaka machumi gatayi. 10Nambi ukwimila lulo vambifise avanu iwo swe nditigila, ‘Amahosa ga avanu iva ga wuyasi, sivalasikagule nangi ing'asi sangu.’ 11Sweno, ndavipite, swe ngwilapa: ‘Sisavingila uko kwe ngendivapela ulusuupo.’ ” 12Swe vanyalukolo, mwikomalilage sisalulava ave pwali mwanyenye munya numbula imbi ndahihyo na yesiafuuvitwi mbaka abape kwa Nguluvi umumi. 13Lino mwitangage munu na muyagwe mbepali, bahayitambulwagwa. “Ineng'ino.” Lulava uyumwi va nyenye ave na numbula ng'angafu pakusangwa munzanangifu. 14Pakuva hwehwe twihanga na Kilisito, wone tukwinatila hilo uluhuvi lwetwetwinalo pamwandi: 15Uwandike wilonga: “Wone mupulike liswi lya Nguluvi neng'ino, mulonga muve na inumbula nalamu ndawe avakukwenyu lweveviwali ulusika lwevamitwike” 16Mbi ve vanani lino, vevapulike liswi lya Nguluvi vamupituke? Ve vavala mbevali vevalongosigwe na Musa uluhuma ku Misili. 17Mbi Nguluvi avavipye vanani ulusika lwa imyaka machumi gatayi? Avavipye vavala vevapigite inzanangifu, na imifimba jawo jatagalye mula mubalali. 18Nguluvi ave akwilapa atigile, “Sisavingila apangu pawusuupo.” Avalongige vanani? Avalongige vavala avevapitwike. 19Ino, tuluwene ukuta sivinji uko. Pakuva sivafuuvitwi.

will be added

X\