AVAEBULANIYA 10

1Pakuva indagilo siva mwigigi gwa ifinu ifinofu ifikusa lwihwano ulwa ifya nachene, siluhwaniti ukukola inambika sisila isitawulwagwa mbepali mwa na mwaka sivanoose vave vakwilaniche avihelela pifunyo. 2Pesi ndahihyo lwelusilila baho pakutawulwa? Wone avanu iwo vevakumusunyalila Nguluvi vake vavelage wofugwe inzanangifu sawo nachene, sivake vipulika kangi ukuta vanyanzanangifu, na inambika iso mbesili ngesadusile. 3Neke ulwene ndahihyo inambika iso satawuligwe peguvesaga mwaka ukuviwusa avanu inzanangifu sawo. 4Pakuva idanda ya ing'ambakwa na imene siyihwaniti nambi ukuhesa inzanangifu. 5Nambi Kilisito peasige mung'i, amutige Nguluvi: “Siwawenditi inambika nambi ikitawulwa, neke ungelanikise umuvili. 6Ifitawulwa fya ukunyanya nambi ifya ukuhesa inzanangifu sifikukunogela. 7Ipo ndatige: ‘Nene ndibaha veve Nguluvi, ndigelanise kukupiga sewiwenda ndawe lwandikwe uwimila nene mu kitabu cha Indagilo.’ ” 8Ulwa ukutala atige, “Siwiwenda, nambi siwinogelwa na inambika na ifitawulwa, ifitawulwa fya ukunyanya nambi fya ukuhesa inzanangifu.” Alonzile ndahihyo nambi ulwene inambika isi mbesili satuwuligwe ukwimila indagilo. 9Kangi ndatige, “Nene ndibaha veve Nguluvi, ndigelanise kukupiga sewiwenda.” Ipo pepene pe Nguluvi ahesise inambika indovela na apono baho ahaalise iya ya Yesu. 10Pakuva Yesu Kilisito akwisise uwende wa Nguluvi, hwehwe tukofugwa inzanangifu setu na yila inambika ya umuvili gwakwe gwe agutawe sukumwi hela, swe yikwila. 11Yeyeavesaga mutambisi va i Kiyudaya aipiga mu wusunyalile mbepali nu kutawula inambika sisilaga kolofu, inambika sesisihwaniti ukuhesa inzanangifu. 12Neke Kilisito atawe nambika yimwi wimila inzanangifu, inambika iyikwilaniche mbepali na mbepali ndawe ikalige kulubali lwa kundyo lwa Nguluvi. 13Uko isindila mbaka avatavangu vakwe pevavisilwe pasi ya amagulu gakwe. 14Sweno, uwimila inambika yakwe yimwi hela avawuyipe vave vakwilaniche kitasila vala avakofugwa inzanangifu sawo. 15Nave Muhe Umwelu akutupela uwolelesi wakwe, ukutala itigila: 16“Ulu lwe lufingano lwembuyapa nawo, ifilo ifikusa, ilonga Umutwa: Nene mbika indagilo sangu mu numbula sawo, nu kwandika mu luhala lwawo.” 17Kangi awilye ukutigila: “Sisanziwuka kangi inzanangifu sawo, nambi ifipigo fyawo fya uwananzi.” 18Sweno, inzanangifu peyesihesiwe, sipava na lukani kangi lwa ukutawula inambika saukuhesekesa inzanangifu. 19Sweno, vanyalukolo kwa idanda ya Yesu twikangaswa imitima ukwingila Apono Apelu. 20Umwene atudindulye ing'asi imya, ing'asi yinyawumi, ukugendela pala pa kibupa, kwekutigila ing'asi ya umuvili gwakwe yumwene. 21Sweno, twinave Umutambisi umutambule umunyaludali mukaye ya Nguluvi. 22Nambi lino tumuhegelelage Nguluvi kwa mitima imigolofu nu lufuuwo ulukwilaniche, mu numbula inzofuge uluhuma mu mahosa amabi, na mu mivili jesimyofuge nu lulenga ululengu. 23Twinatilage uluhuvi lwetu lwetukulwidikila, pakuva Nguluvi yeatwihuvise inyuviso sakwe vanachene. 24Tusugunalage ukwitanga yihwehwe sambi twiwile uludali lwa ukwiyenda nu kupiga inofu. 25Satulaguleka gula umusimu gula gwa ukukong'ana pamwi, ndawe avangi lwevipiga. Pesi lutuvaje twitangage nu ukulutisa, pakuva ndawe lwemukwilavila yinyenye, ulwa Ikimunyi kila cha Umutwa yekihegelye. 26Pakuva, wone tuve petupiga inzanangifu kono we yetulukagwe ulwa nachene, ipo ino sikoyili inambika kangi yeyihwana ukuhesa inzanangifu. 27Lino chekisige ukusindila hela wetwina muhwehwe ugwa ukuhigwa na Nguluvi nu moto ugukwaka pakomi hilo gwesaguvalalisa mbevali vanyalubesa kulumwene. 28Umunu yeyeavesaga yesakwinatila indagilo sa Musa, ayiwulagwa kigaya nambi lusungu wone pave na uwolelesi wa vanu vavili nambi vadatu. 29Mbi ndawuli umunu yula yeakumwelanga Umwana va Nguluvi nu kuyibedala idanda ya ulufingano lwa Nguluvi lwelwamofwige, umunu yeakumuliga Umuhe va Nguluvi? 30Pakuva tumukagwe yula yealonzile, “Nene yenyomba umukole, nene nyomba,” na yula yealonzile kangi, “Umutwa saavahiga avanu vakwe.” 31Ukugwila mumawoko ga Nguluvi umumi ulo lukani lwakogofya hilo na hilo! 32Mwiwukage sesawonike ifilo fila ifya pamwandi pemwang'alikilwe ulung'ali lwa Nguluvi. Nambi ifilo ifyo mwatesike pakomi munzolofu. 33Apangi kangi mwalisilwe nu kuhongelwa inyoni pavanu; apangi mwidiche ukuhanga na vala vevatesekige ndahihyo. 34Mwahanzile uluteseko na vanyandinde, na pevavaposile uwunono wenyu mwakangalye muluhekelelo, pakuva mwalukagwe ukuta mwina uwunono uwulutye na uwutasila. 35Sweno, mulawuleka uwupifu wenyu, pakuva uwo wuvapela amahombo makomi, 36Lwinoga muvelage vakangalisi, sambi muhwane ukupiga sila seiwenda Nguluvi nu kwanukila kila cheahuvise. 37Pakuva ndawe Uwandike Uwelu uwilonga: “Lusige lusika ludodo hela, na yula yeakusa, aasa, na safuvalila nambi. 38Neke umunu vangu yemugolofu afuuwa nu kunana; neke wone apiluke ku mbele nene sindinogelwa na yuyo.” 39Sweno, hwehwe situlimwavawo vala vevipiluka ku mbele nu kuyaga, pesi hwehwe twifuuwa na ukwikwamila inumbula setu.

will be added

X\