1 Neke lino nditigila; Umunyalilila peakaali mudodo, pesalakimilwa saliwungi na umukami, nambi we umwene ye munyamwenafyo va mbefili. 2 Ulusika mbeluli ulo aiva mumawoko ga uwimilisi wa avavaha, mbaka pelufikite ulusika ulukele na udade. 3 Lwindahihyo, na kwa yihwehwe petwetukaali vadodo, twetwipasi ya uwutwa wa amasoka agatemite mung'i umu. 4 Neke ulusika uluvike lwave lwifika, Nguluvi amutumite Umwanakwe umwegale nu mung'inetu, nave ikalite pasi ya uwutema wa indagilo, 5 sambi avakombole vala avali muwutema wa indagilo, hwehwe sambi tuwuyapwe vana va Nguluvi. 6 Pakuva, lino nyenye mwivana, Nguluvi amutumite Umuhe va Umwanakwe mu numbula setu Umuhe yeikemelaga, “Dada.” 7 Nambi kulino veve sipe wimunywawingi kangi, pesi ulwa wimwana. Na pakuva wimwana, sweno wanukila mbesili se Nguluvi avaviche avanakwe. 8 Umutalo, simwemumuseli Nguluvi, nambi mwafipigilige ifihwananguluvi, ifinguluvi fya uwudesi. 9 Neke lino yemumukagwe Nguluvi, apangi tutigile pakuva yemukagulanike kwa Nguluvi, mbi lino ndawuli kangi mwipiluka kumbele ku amasoka amamikaa na amahomefu ge mwisaka kangi mugapigile? 10 Mukwinatila ifilo, myesi, imisika na imyaka. 11 Nene ndihuguvala ulwa salulava ikipigo chengapigite kwa nyenye kive cha kufwaha hela. 12 Vanyalukolo vangu, nguvagongola muvelage ndawe nene, lwendindawe nyenye. Simwamiji kinu kibi chechekivesaga nene. 13 mukulukagula ulwa uwutamwa wangu wewamelye ikilega ndivadalikile Ulukani Ulunofu pamwandi. 14 Nambi we ndahihyo ulusika ulo simwambedii nambi ukunzinyala ukwimila uwuhomefu wangu, nambi muve mwageligwe mupige lulo, neke ulwene nyenye mwanzanuche wita munyivaha va Nguluvi na kangi wita ndi Kilisito Yesu yumwene. 15 Mwemwina luhekelelo; mbi kikawonike kiki? Nene ndilongela mumwene, ukuta mulusika lulo mwemuhwanite ukung'amatula amiho genyu, mumele nene. 16 Mbino ndawuli! Yembe mutavangu venyu penguvalongela inachene? 17 Vala avanu avangi vakuvagudila nyenye, neke chevakuhosekesa sikinofu nda. Viwenda ukuvalekasa na nene sambi nanye muvagudile avene. 18 Neke ulwene lunofu mbepali ukuvagudila avangi mu ing'ani inofu, si mulusika lula lwe nene ndipwali na nyenye. 19 Vanangu, ndawe umung'inetu umunyafilo lweaiguda peakwegala nani ndiguda kangi ukwimila nyenye mbaka pala pe Kilisito ava ahanzile mwa nyenye. 20 Ike yiva kiba ngembe pamwi na nyenye ino, penge melwa uwimo uwusikime ukwimila nyenye. Pakuva ndina wuhuguvafu wukomi ukwimila nyenye! 21 Lino mundongelage, nyenye yemwiwenda ukuva pasi pa indagilo. Mbi yemwemupulike indagilo wesilonga? 22 Nzandike mu Uwandike Uwelu ukuta Abulahamu eina vana vavili uyumwi mwegale nu umung'inetu umunyawingi, uva kavili kulumung'inetu umutemapakwe. 23 Umwana va umunyawingi emwegale ndawe lwevakwegalwa mbevali hela, pesi yula va umung'inetu umutemapakwe, uyo emwagale ukwimila uluhuviso lwa Nguluvi. 24 Lino ing'ani iso nzivililo: avang'inetu iva se ndagano isivili: Ulumwi lwihuma ku kidunda icha ku Sinayi, ulukwegalila anana mu wunyawingi; umung'inetu uyu ye Hagali, 25 Nave Hagali, yeiva nda ikidunda cha ku Sinayi, chekili ku Alabiya, nacho che kiganiso cha i Yelusalemu iya lino iyilimuwunyawingi pamwi na avanakwe. 26 Neke i Yelusalemu iya kuchanya ye boma iyili mu wutemapakwe, na iyo yeyuvetu hwehwe. 27 Pakuva Uwandike Uwelu witigila: Hekelelage veve ve muguumba yesukwegalagi, Koolage veve yesiwe ulegala mwana. Pakuva avana va yula yealesilwe wolofu, sivaling'eni na va yula yeina uvakwe.” 28 Sweno, vanyalukolo vangu, nyenye mwivana va Nguluvi ukwimila uluhuviso lwakwe ndawe Isaki weeiwali. 29 Neke ulusika lula yula yeegilwe ukukola imigendele ija mbepali hela amufwahisige yula yeegilwe ukukola imigendele ija kinya muhe, na lwelwiwali lino. 30 Ino Uwandike Uwelu witigila ndawuli? witigila, “Umudagage umung'inetu umunyawingi pamwi na yumwanakwe, pakuva umwana va umunyawingi sahwana ukuhala ililila pamwi na umwana va umung'inetu umutemapakwe.” 31 Sweno vanyalukolo vangu hwehwe sitwivana va munyawingi, hwehwe twiva umung'inetu umutemapakwe.
Copyright © 1999 The Bible Society of Tanzania; ℗ 2010 Hosanna