AVAGALATIYA 2

1Pegilutye imyaka minyichumi na gitayi, ndahele ku Yelusalemu pamwi na Balanaba; ndamutegwe nayi Tito nave pamwi na nene. 2Ndahele uko ukwimila ukugubulilwa na Nguluvi ukuta mbitage. Petwe tukong'ine (apono apawunamu) ndavalonje iwo avanyalulumbo ulwa ulukani ulunofu lwendavadaliche avanu avamyanza. Ndapigite ulo sambi ikipigo changu chendemigite na kila chemiga kilemwe ukuva nda cha malanga hela. 3Umuyangu Tito yetwipamwi, nambi we e mugiliki sivamugogelisi awolwe, 4nambi vepovali avanyalukolo avangi va uwudesi avawendige awolwe. Avanu iwo visopite mwa hwehwe kwa wusugu sugu sambi vatandile uwutemapetu wetwinawo mukuhanga na Kilisito Yesu, sambi vatusope mu wunyawingi. 5Sitwiyidikisi nawo na ludodo, sambi inachene ya Ulukani Ulunofu yisigale na nyenye mbepali. 6Neke avanu iva avilongwa ukuva valongola-manyi nachene weveviwali, apangi sivevindahihyo kwa nene ulo si kinu nda, pakuva Nguluvi sihigagi ing'ani isiwoneka mwivala, avanu iva vevagaya kinu cha kongelesa mulukani ulunofu lwendidalika. 7Pambele valukagwe ulwa Nguluvi eamelye ikipigo icha ukudalikila avanu vesivawoole, ndawe Petulo nave apelitwe ikipigo cha ukuvadalikila Ulukani Ulunofu vevawoolitwe. 8Pakuva, yula yealesile Petulo ahwane ukuva mwigendo kwa Avayudaya, ye yuyo yealesile nane nywane ukuva mwigendo kwa avanu avamyanza. 9Pevalukagwe ulwa uwuwuya wendapelitwe nene Yakobo, Kefa na Yohane vefye fipanda fya ililugu lila, vatupelye nene na Balanaba ululumbo lwa ikilega cha ukupiga pamwinga, sambi hwehwe tubite ku vamyanza na avene kwa vala avawoole. 10Neke, pamwi na lulo, vatulagise hwehwe kinu kimwi ukutigila tulemwage ukuvasemwa avanu vala avamikaa, na ulo lwe lukani lwe mbepali ndisugunala ukupiga. 11Neke Petulo peasile ku Andyokiya ndamukenyee pa vanu mbevali, pakuva aalasomite. 12Pakuva pevesivalasa vala avevatumitwe na Yakobo, Petulo alisige pamwinga na avamyanza. Neke peyevafisile avanu iwo, swe Petulo akwikwega, ilemwa ukulya na avamyanza, pakuva ogopige avanu vala avawendige avamyanza nawo vawoolwagwe. 13Na avanyalukolo avangi Avayudaya vavanzile ukwiyidikisa na Petulo mulukani ulu lwa uwubuganisi, nayi Balanaba nave ihanga muwubuganisi wawo. 14Sweno, pendivawene ulwa uwima hilo wawo ukwimila Ulukani Ulunofu swavi wugolwike; ndamulonje Kefa pa mbevali, “Nambi veve we wi Muyudaya, ukwikala ndawe avanu avamyanza na wiva nda si wi Muyudaya! Mbino, ukuvagogelesa ndawuli avanu va ing'i isingi vikale nda Avayudaya?” 15Nachene, hwehwe ye twi Vayudaya uluhuma idaha, na sitwivanu Avamyanza avanyanzanangifu! 16Nahwe tukulukagula hilo ukuta umunu sahwana ukuvalilwa wugolofu pa Nguluvi kwa ukwinatila indagilo, pesi kwa ukumufuuwa Yesu Kilisito hela. Nayi hwehwe kangi tumufuuvitwe Yesu Kilisito ndahihyo, sambi tuhwane ukwidikilwa na Nguluvi ukwimila ulufuuwo ululi mwa Kilisito, na si kwa ukwimila ukwinatila indagilo. 17Lino wone petwisaka tuwuyapwe vagolofu ukukola mukuhanga na Kilisito hwehwe twiwoneka twivanyanzanangifu, ndawe avamyanza weviwali, Ngali kwekutigila Kilisito akututangilisa mukupiga inzanangifu? Nangi na ludodo hela! 18Neke wone mbange ukusenga kikila kangi chendamamwe pamwandi, ipo pepene pengwiyolelela yinene ukuta ndimwananzi. 19Pakuva, ulwa indagilo iso nene ndimufu indagilo sisene sambulige, sambi melwe uwumi ukwimila Nguluvi. Nene ndafwe pamwi na Kilisito pa musalaba gwakwe, 20na kulino ndimumi, ulwene si nene kangi pesi Kilisito yeinana mugati mwa nene. Uwumi uwu we ndinana lino, ndinanila mu lufuuwo ukukola Umwana va Nguluvi yeanzendite mbaka awutawule uwumi wakwe ukwimila nene. 21Sindiwenda ukubedala uwuwuya wa Nguluvi. Neke wone umunu ayiwuyapwa mugolofu ukukola indagilo, sweno, Kilisito afwee chaka hela!

will be added

X\