AVAEFESO Ing'ani isitala 5

1Pakuva mwivana va Nguluvi avende, luvavaje muvelage ndawe lweiwali umwene. 2Mugendelage uwende, ndawe Kilisito lweatwendite, neke itawule yumwene ave kitawulwa cha inambika iyinung'ilila wunofu na iyikumunogela Nguluvi. 3Pakuva mwivanu va Nguluvi uwusafi, na uwaafu mbewuli filatambulwa mwa nyenye. 4Kangi ing'ani inyonga nyoni, sa uwupuva nambi ulubesa, iso mbesili sisihwana kwa nyenye; ikiba ing'ani sa ukumulumba Nguluvi, ali iso sesihwanite. 5Mulukagulage ulwa umugoni yeyeavesaga nambi umwaafu, (nambi umusunyalila ifihwananguluvi), nambi umunu yeyeavesaga yeindawe iwo, sisaambulila kinu Muwutwa wa Kilisito na wa Nguluvi. 6Mulagela mwidikile ukusangwa na umunu kwa ing'ani sakwe isa uwubanga pakuva uwimila ing'ani sesindawe iso ililakali lya Nguluvi lyakuvasila avanu mbevali vesivakumogopa. 7Sweno, muliyidikisa nawo. 8Pamwandi nyenye mwe mulwisa, neke lino nyenye mulimulung'ali kwa ukuhanga na Umutwa. Sweno mwikalage nda mwivana va ulung'ali: 9pakuva amaveleko ga ulung'ali we wunofu mbewuli, uwugolofu na inachene. 10Mugelage ukulukagula lula lweiwenda Umutwa. 11Mulahanga mu fipigo fyesifiveleka ifya mulwisa, pesi ulwa mufivikage pawelu. 12Mbi ing'ani isipigwa mu kinyele nyonganyoni na pakutambula pamulomo. 13Neke ing'ani sila isipigwa mulung'ali, na inachene yakwe yayivikwa pawelu, 14na chechekivesaga kipigilwa pawelu chakiva lung'ali. Nambi Uwandike Uwelu witigila: “Lamuke veve yugonelye, silibuke uluhuma kuvafwe, nave Kilisito akung'alika.” 15Sweno, mwikomalilage lwe mwigenda: mulikala ndawe avapuva, pesi ulwa muvelage ndawe vanu avasugu. 16Mwikomalilage hilo lwe mukugipigila imisika pakuva ifilo ifi fya uwanangifu. 17Sweno, mulava mwivapuva, neke mugelage ukulukagula lula lweiwenda Umutwa. 18Mulemwage ukugaala idifai pakuva iyo yivayusa, lino mumemage Umuhe Umwelu. 19Muvelage mwitinakisa mung'ani isa mu Sabuli, nzimbo na uwimbe wa munumbula, mumwimbilage Umutwa inzimbo na sa musabuli kono we mukumulumba munumbula senyu. 20Mumulumbage Nguluvi Dada mbepali ukwimila mbesili mwitawa lya Umutwa vetu Yesu Kilisito. 21Yeyeavesaga munu avelage na ichoga kumuyagwe ukwimila ukumogopa Kilisito. 22Avang'inetu vavelage na ichoga ku vanu vawo ndawe lwe vakumogopa Umutwa. 23Pakuva umugosi ina lulagi ku vakwe, ndawe Kilisito lwe ina lulagi ku likanisa nave Kilisito yumwene yeakulikombola ilikanisa, umuvili gwakwe. 24Ndawe lula lwe likanisa likumogopa Kilisito, lwindahihyo, avang'inetu vavelage na ichoga ku vawo mwambesili. 25Nayinyenye nye vagosi, muvendage avenyu ndawe Kilisito lwe alyendite ilikanisa, neke itawulage yumwene ave nambika ukwimila likanisa. 26Apigite ulo sambi kwa ulukani lwakwe, alifunyilile kwa Nguluvi, peyealyesise kwa ukulyofuga na ululenga, 27sambi ikwavile likanisa ilyelu na ilyesiwe hilo, ilikanisa iligaya mambilila ga uwaafu nambi wulema nambi ikingi ikindawe siso. 28Sweno, avagosi luvavaje vavendage avanu vawo ndawe imivili jawo vavene. ( 29Asupali umunu yakuguvipila umuvili gwakwe; ulungi nalulo aakugulisa na ukugufwika. Lwindahihyo nave Kilisito lweakulilolela ilikanisa, 30pakuva hwehwe twifigawamuvili fya umuvili gwakwe.) 31Ndawe Uwandike Uwelu uwitigila, “Sweno, umugosi amuleka udade na uyuve, abaning'ana na uvakwe nawo ndawe vavili vava muvili gumwi.” 32Mung'ani isi moyili inachene iyifihime, ndiwona ukuta isi sidonya ulwa Kilisito na likanisa lyakwe. 33Neke kangi sidonya na kwa nyenye: umugosi yeyeavesaga lumuvaje avelage na ichoga ku munu vakwe.

will be added

X\