AVAKOLOSAYI 1

1Ye nene Pawulo umwigendo va Kilisito Yesu kwa uwende wa Nguluvi, pamwinga na umunyalukolo vetu Timoti, 2tukuvandikila nyenye nyevanu va Nguluvi uko ku Kolosayi vanyalukolo vetu yemwihuvilwa mukuhanga na Kilisito. Tukuvasukila uwuwuya na uwikalakunoga ukuhuma kwa Nguluvi udadetu. 3Mbepali twatukumulumba Nguluvi, Udade va Umutwa vetu Yesu Kilisito, petukuvasukila. 4Pakuva tukapulike ulwa ulufuuwo lwenyu mwa Kilisito Yesu na uwende wenyu kuvanu mbevali va Nguluvi. 5Pelufikite lula ulukani ulwa nachene, Ulukani Ulunofu ulwasile pakutala kwa nyenye mwapulike ulwa uluhuvi ulwihuma umo ino ulufuuwo na uwende lukwimila mu luhuvi lulo, lwemwivavikile wunofu kuchanya. 6Ulukani Ulunofu lwigina ukuveleka nu kutagalila mung'i mbesili ndawe we lukapigite ukwenyu nyenye uluhuma ikimunyi kila pemwalupulike lwilongwa ulwa uwuwuya wa Nguluvi na ukuyikagula inachene. 7Mwiyigiise ulwa uwuwuya wa Nguluvi uluhuma kwa Epafala, umukami muyetu, ye mupisi yeihuvilwa va Kilisito ukwimila hwehwe. 8Umwene atulonje isa uwende wemwapelitwe na Umuhe. 9Na ukwimila lulo tukave mbepali tukuvasukila petukwifunya peyetupulike isa nyenye. Tukumusuka Nguluvi avamemye uwuseela uwukwilaniche wa uwende wakwe, avamemyage uluhala mbeluli na ifigaho ifiletwaga uwiletwagwa na Umuhe vakwe. 10Apo pemuhwana ukwikala ndawe lweiwenda Umutwa na mbepali mupigaga isikumunogela umwene. Imikalile jenyu giva giveleka amakowo mbegali ga imigendele iminofu nanye muvina mufigaho ifya ukumukagula Nguluvi. 11Nguluvi avapelage uludali lwakwe ulunyandolo sambi, muhwane ukukangalila kwa chechekivesaga muwusindile mbewuli. 12Muluhekelelo mumulumbage Dada yealekite nayi nyenye muve na ililila lyenyu mufinu fila fye Nguluvi alavaviche avanu vakwe kuwutwa uwa ulung'ali. 13Umwene atupokite uluhuma muludali ulwa ulwisa neke atulete wunofu kuwutwa wumwanakwe umwende, 14ye ukukola kulumwene twiva na uwukombolwa na ukudegepelwa inzanangifu setu. 15Kilisito ye lwihwano lwa Nguluvi yesiwonekagi. Ye Muvele kufigawa mbefili. 16Pakuva ukukola kwa yuyo ifinu mbefili fyagafilwe, mung'i na kuchanya, ifiwonekaga na fyesifiwonekagi; ifigoda ifya uwutwa, apangi uwubana malungulu, apangi uludali lwa amasoka, apangi indagi. Mbefili fyagafilwe ukukola mulumwene na ukwimila mulumwene. 17Kilisito epwali na pesifilagawa mbefili, kwa ukuhanga na umwene, mbefili finana pefipwali. 18Umwene ye mutwe gwa umuvili gwakwe, kwekutigila likanisa, umwene che kilamuko cha uwumi uwa umuvili gugo. Umwene gwe muvango, umuvele yatasile ukusilibusiwa ukuhuma kuvafwe, sambi ave uva ukutala mwambefili. 19Pakuva Nguluvi alamwe uwukwilanifu wakwe wave mulumwanakwe. 20Kwa ukukola mulumwanakwe, Nguluvi alamwe ukupilula ifinu mbefili kulumwene, Nguluvi akwisise uwikalakunoga ukwimila ifwa ya mwanakwe mu musalaba na palulo apilwe ifinu mbefili kulumwene ifya mung'i na ifya kuchanya. 21Pamwandi nyenye nanye mwepataali na Nguluvi mwe vatavangu vakwe pakuva amahosa na imigendele jenyu je myaafu. 22Neke lino kwa ifwa ya umwanakwe yeikalige mung'i Nguluvi akavatang'ise nave, sambi avalete kulumwene mwiva mwivelu, awofuge, vesivananga kinu. 23Ino luvavaje muginage ukuva mulufuuwo kono wemuvisilwe na ukusigalila mulutu ulukangafu, mulidikila ukuhogaswa uluhuma muluhuvi lula lwemwapelitwe pemwapulikige Ulukani Ulunofu. Nene Pawulo ngave mukami va Ulukani Ulunofu lulo ulukadalikwe kulu munu yeyeavesaga mung'i. 24Na kulino ndihekelela penditeseka ukwimila nyenye, pakuva ukukola uluteseko lwangu umu mung'i, nyele nditanga ukukwisa kila chekikepa muneseko sa Kilisito ukwimila umuvili gwakwe, likanisa. 25Nene ndavisilwe mbe ndi mukami va likanisa ukugendela imigosekese jakwe Nguluvi jeameelye ukwimila ukwambula kwenyu. Na ulwene lwelwa ukudalika uwukwilanifu wa ulukani lwakwe, 26na che uwukinyele chealavafihite avanu uluhuma pidaha, neke lino avalaje pawelu avanu vakwe. 27Lwealavisile Nguluvi lwelwa ukuvalagila pawelu avanu vakwe, ikinyele iki ikikomi na kinyandolo che kikwimila avanu mbevali. Na ikinyele ichene che iki. Kilisito mugati mwenyu, ye luhuvi lwa indolo. 28Na ukwimila lulo tukumudalika ku vanu mbevali; tukuvakenyela na ukuvigisa mbevali muluhala mbeluli, sambi tumulete yeyeavesaga kwa Nguluvi iva akange mukuhanga na Kilisito. 29Sambi lupigike ulu nene ndipiga ikipigo kwa kukangala ndikola uludali ulukomi lwa Kilisito ulwipiga mugati mwanene.

will be added

X\