IFIPIGO 8

1Na ikimunyi icho kwave na luteseko lukomi mu likanisa ilye ku Yelusalemu. Avevafuuvitwe mbevali, vatagalye vibita mung'i sa mu Yudaya na mu Samaliya, pesi vala hela avigendo vevasigee. 2Avanu avamwenda Nguluvi vamutasile Sitefani nu kumuvembela ikivembo kikomi. 3Na lulusika lulo, Sawulo eagahite aliduse ilikanisa. Ingilige mukaye mbesili, sambi akwegangage avevafuuvitwe vagosi kwa vang'inetu, avasopage mundinde. 4Vala avevafuuvitwe vevevatagalye, vahele mbekuli vakidalika lula ulukani. 5Nave Filipo inje mu Samaliya akumudalika Kilisito kwa vanyang'i vabaho. 6Avanu wolofu vakong'ine pamwi ukupulikisa kwa uwinatifu lula ulukani lweadalikige Filipo na ukwilavila gila imiitu jeapigige. 7Pakuva avanu wolofu ave vina amasoka, gahumige kono we giyoya. Na awolofu ave vina matela mumivili jawo na avalema mbevali vaponiswe. 8Kwave na luhekelelo lukomi hilo muboma yila. 9Sweno, pepwali umunu uyumwi yeitambulwa Simoni yealapigite nzolofu isa uwuhavi muboma iyo kwa ifilo ifyefilutye yeavahuguvikige avanya Samaliya, uyo ivahige uwuvina. 10Avanu mbevali, avavina na avadodo, vamupulikisige kwa winatifu vitigila, “Simoni ye lula uludali lwa Nguluvi ulwitambulwa ‘Uludali ulukomi.’ ” 11Vamupulikisige hilo pakuva yealavahuguvike kwa uwuhavi wakwe kwa filo fyolofu. 12Neke vavelige vakumufuuwa Filipo ulwa ulukani ulunofu lwa uwutwa wa Nguluvi, na ilitawa lya Yesu Kilisito, vabatisiwe vagosi na vang'inetu. 13Nayi Simoni nave afuuvitwe; na peyeabatisiwe ave pamwinga na Filipo, na peilavilige ifilagilo na uwuhulo fyefyapigike asasave pakomi. 14Neke vala avigendo avali ku Yelusalemu peyevapulike ulwa avanyang'i vamu Samaliya nawo yevanuche ulukani lwa Nguluvi; vavasindiche va Petulo na Yohane. 15Na vavelige vifika vavasuche sambi avevafuuvitwe vamwanukile Umuhe Umwelu, 16pakuva ulusika ulo Umuhe Umwelu siealamwikila umunu yeyeavesaga mwaavene, yevevabatisiwe hela mwitawa lya Umutwa Yesu. 17Sweno, ndawe vavagelekige amawoko gawo nawo vamwanuche Umuhe Umwelu. 18Na ipo Simoni alukagwe kwa ukugelekwa amawoko ga avigendo avevafuuvitwe vanuche Umuhe Umwelu ndawe avapelige amagobole va Petulo na Yohane itigila, 19“Mumelage nane uludali ulu sambi umunu yeyeavesaga yendimugeleka amawoko gangu, sambi amwanukile Umuhe Umwelu.” 20Neke Petulo amupitule, “Yagilage kutali veve na amagobole gako pakuva wihosa ulwa uhwanite ukugula ikipelwa cha Nguluvi na amagobole! 21Veve wimugaya nambi kigawo nave uwulilumwi mukipigo iki pakuva inumbula yako si ngolofu pa Nguluvi. 22Lino, hongesage inzanangifu iyi wifunye kulu Mutwa, apangi udegepelwa ilihosa lya munumbula yako. 23Pakuva ngukuwona umemite igila, kangi upinzilwe ni nzanangifu!” 24Simoni apitwe itigila, “Nguvagongola musukile kulu Mutwa sambi mbesili semulonzile silemwe ukunzusila nambi yingi.” 25Avene va Petulo na Yohane vavelige visinda ukolelela nu kudalika ulukani lwa Umutwa, vapilwike ku Yelusalemu, vidalika ulukani ulunofu mu fijiji fyolofu fya ava Samaliya. 26Na munyivaha va Umutwa amutige Filipo, “Wigelanise ubite ulubali lwa kusika wigendela ing'asi iyihuma ku Yelusalemu yisogwe ku Gasa.” (Ing'asi iyo yigendela mubalali.) 27Sweno, Filipo ndawe avangige ulugendo. Na ulusika lulo epwali munu Muetopiya, mupase, yeali mulugendo ibita ukwawo. Umunu uyo ali mulongola va avalolesi va uwunono va Kandake, umunumwehe va ku Etopiya. (Mutwa mung'inetu) Ahele ku Yelusalemu ukumusunyalila Nguluvi, na ulusika lulo apilukige ahofile umutuka ugwa ukukwegwa. 28Na peapilukige ave weakwimba ikitabu cha Umuvisi Yesaya. 29Sweno, Umuhe Umwelu amulonje Filipo, “Hegelele pipi na umutuka ugo mugendase.” 30Filipo agukimbilye umutuka gula ndawe amupulikige umunu uyo akwimba mukitabu cha Umuvisi Yesaya. Ipo Filipo amuwusise, “Be usikagula sukwimba iso?” 31Umunu uyo amupitwe, “Mbi ndisikagula ndawuli pesawoniki umunu yeanzigisa?” Swe ndawe amugongolige Filipo ahove vateng'emalase. 32Sweno pala peimbige mu wandike uwelu pe ipa, “Asindikwe ndawe ing'olo iyisindikwa kukudumulwa, wita chana cha ing'olo wekisikaga pekisegetwa uwubahila. Nave ndahihyo asikite salonzili nambi lukani. 33Vamuhonje inyoni na pakuhigwa vamuwonie. Sikwali yeahwana ukusima sa imbegalo yakwe, pakuva uwumi wakwe yewuhesiswe mung'i.” 34Uyo Umwetopiya amutige Filipo, “Ndongele uyu umuvisi ilonga ing'ani sa nani? Ngali sa umwene apangi sa umunu yungi?” 35Nave Filipo avanje pa uwandike wuwo uwelu, nave amudaliche isa Yesu. 36Nape vasogolige, vafikite pa lulenga na umunu uyo atige, “Lavage ipa pololi ululenga ndawuli mbi kokili che kikunanila ukubatisiwa?” ( 37Filipo atige, “Wone yeufuuvitwe mu numbula yako mbeyili, lukwilye ukubatisiwa.” Nave apitwe swe itigila, “Ena ndifuuwa ulwa Yesu Kilisito ye Mwana va Nguluvi”) 38Umunu uyo alaje umutuka gwime. Na mbevali ndawe vavili, Filipo na umunu uyo vasulunwike pa lulenga. Neke Filipo ndawe amubatisige. 39Na pevahumite pa lulenga, Umuhe va Umutwa amunyelebwise Filipo, na uyo Umwetopiya siamuweni kangi: neke umwene ndawe ibitilige na ulugendo lwakwe kono ina luhekelelo lukomi 40Neke Filipo iwene ali ku Asoto. Nave ave peadalika Ulukani Ulunofu muboma mbesili, mbaka pambele afikite na ku Kaisaliya.

will be added

X\