IFIPIGO 7

1Nave umutambisi Umuvina amuwusise itigila, “Be ing'ani isi sa nachene?” 2Sitefani apitwe, “mumulikise nye vanyalukolo vangu, nanye mwevadadangu! Nguluvi umunyandolo amuwoneche ukukwetu Abulahamu peeali ku Mesopotamiya wesalahamila ku Halani. 3Neke Nguluvi amulongelage ukutigila: ‘Hege mung'i yako; uvalekage avanyalukolo vako, bitage kung'i ye ngulagila nene!’ 4Swe ndawe, Abulahamu ahegige mung'i iya uwukalidayo asakuhamila ku Halani. Na peyeafwe udade, Nguluvi amuhamise kangi ahege pa Halani nu kumuleta mung'i iyi yemukwikala nyenye lino. 5Nguluvi samupeli nambi lutanana ludodo mung'i iyi sambi live lilungulu lyakwe nda. Neke nambi ndahihyo Nguluvi amwilapye ukutigila saamupela ing'i iyi, yive yakwe na imbegalo yakwe, pealutye umwwene, kono we ulusika ulo Abulahamu ali mugaya mwana. 6Ulu lwe Nguluvi amulonje: ‘Imbegalo yako sayikala mung'i inzagile na avanu vangi, kwesavava vanyawingi nu kupigilwa fivi kwa myaka magana gatayi. 7Neke nene sandivahombela umukole avanu va ing'i iyo vesavavavika muwunyawingi. Sweno sandivahesa mung'i yawo, sambi muse musunyalile apono ipa.’ 8Sweno Nguluvi avisile ukuwoolwa sambi kive kilagilo cha ulufingano. Nambi, Abulahamu amuwoolite umwanakwe Isaki ikimunyi cha munana ukuhuma pakwegalwa. Nayi Isaki ndahihyo, amuwoolite Yakobo. Nayi Yakobo avapije ndahihyo vala avakukwetu avanyichumi na vavili. 9“Nawo avakukwetu vamuwonie igila Yosefu vamugusise nu kumusindika kuwunyawingi ku Misili. Neke Nguluvi alipamwi nu mwene. 10Amupokite mu neseko mbesili. Nguluvi amupelye uwuwuya nu luhala pa Falawo umutwa va mung'i ya ku Misili, mbaka Falawo amutemye ave muvina mung'i yiyila, mbaka na mukaye yakwe ya uwutwa. 11Sweno, chagwe ikinge mung'i mbeyili ya mu Misili na ku Kanani, nacho chaletite neseko ngomi, na avakukwetu sivavi na cha ukuponela. 12Neke Yakobo avelige ipulika ulupweng'enyu ulwa uko ku Misili kofili ifilyo, ndawe avatumige avanakwe vala avakukwetu, sambi vabite ku Misili ulugendo ulwa ukutala. 13Ulugendo ulwa kavili, Yosefu ilonzile kwa vanyalukolo vakwe, na Falawo peavakagwe vanyalukolo va Yosefu. 14Yosefu atumite ulukani kuludade na kwa vanyalukolo vakwe mbevali, kwa mbevali vevafikite vanu machumi gimufung'ati na vahanu, ukutigila vasage ku Misili. 15Sweno, Yakobo ndawe abitige ku Misili, uko kwe umwene na avakukwetu avangi vafwilye kuko. 16Neke imifimba jawo vagisindike mbaka ku Sekemu, kwe vagitasile muchanga cha Abulahamu cheagusile na amagobole ku vana va Hamoli. 17Ulusika lwavelige lwikwila, Nguluvi akwisise uluhuviso lweeamwilapye Abulahamu, avanu kula ku Misili yevewolwike na ukuva wolofu hilo. 18Pambele Umutwa uyungi atemite yeali samuseli Yosefu. 19Uyo avatesise hilo avakukwetu avapije fivi, akuvatigila vavahumyage mwivala avana fyali pevawonike valanana. 20Musa awonike ulusika lulo, nave ali mwana munyawunofu uwiyena. Alolelilwe pa dade kwa myesi gidatu! 21Na vave vakumuhumya kwivala, Umwalive va Falawo amwinwe, nukumulolela wita mwanakwe yeamweje. 22Musa igisiwe mbesili sa uluhala lwa ava Misili, swe iva mupifu mu milongele nu kupiga. 23“Peyeafikite myaka machumi gatayi ukuhuma ukwegalwa alamwe akavagose avanyalukolo vakwe va Isilaeli. 24Uko amuwene uyumwi va avanyalukolo vakwe ipigilwa fivi, ahele ukumutanga nu kwihombela umukole amuwulige yula umumisili. ( 25Atige apangi ulwa vanyalukolo vakwe va Isilaeli valukagula ulwa Nguluvi ake akola umwene ukuvakombola, neke silwavi ndahihyo.) 26Ikimunyi cha kavili, afisile va Isilaeli vavili vakwitova agelite ukuvalamula akuvatigila, ‘Nyenye mwilukolo lwi ndawuli kangi mukwipigila fivi we nyenye ng'ani?’ 27Yula yeamutovige umuyagwe amusugikise Musa palubali akumutigila: ‘Ye nani yeakakuvisile veve uve wimulongola na ve mulamusi vetu? 28Ngali ukwenda umbulage ndawe lweukamuwulige yula Umumisili igolo?’ 29Musa avelige ipulika iso, akimbye mu Misili ikimbilila kung'i ya ku Midiyani na uko kweegalye avana vavili vakwamisi. 30“Peyegilutye myaka machumi gatayi, munyivaha va Nguluvi amuwoneche Musa mukisaka chechakige umoto ku balali pipi na ikidunda cha Sinayi. 31Musa asasave pakomi, pealuwene ulukani ulo, ndawe ahegelelige pipi alave wunofu; ndawe apulikige iliswi lya Umutwa. 32‘Nene ndi Nguluvi va avakuko, Nguluvi va Abulahamu, Isaki na Yakobo!’ Musa akuvye kwa muhwehwe na siigelii ukuva pealava. 33Umutwa amutige, ‘Wopole indatu sako pakuva apono ipa pewimite pelu. 34Ndisiwene ing'ani imbi sevipigilwa avanu vangu kula ku Misili. Ndikipulike ikivembo chawo, nane nzusile ukuvapoka. Sweno wuse ipa ngutume ku Misili.’ 35“Musa ye yula yevamubihye avanu va Isilaeli. Vakumutigila, ‘Yenani akuvisile veve uve mulongola na umulamusi vetu?’ Yumwene Musa ye Nguluvi amutumite ave mulongola na umukombosi, ukukola kwa yula munyivaha va Nguluvi, yeamuwoneche mukisaka chechakige umoto. 36Ye yuyo yeavahesise avanu ukuhuma mung'i ya ku Misili, ikola mufipigo fya uwuhulo mung'i ya ku Misili na mu Bahali ya mu Shamu na mubalali kwa ulusika lwa myaka machumi gatayi. 37Ye mwene yuyo Musa yeavatige avana va Isilaeli, ‘Nguluvi saavahagulila Umuvisi ye indawe nene ukuhuma muvanyalukolo venyu.’ 38Na ulusika avanu va Isilaeli lwevakong'anige ku balali, ye Musa yeekuko pamwi nawo. Ali alikuko pamwi na avakukwetu, pamwi na yula munyivaha va Nguluvi yevalonganige nave mu kidunda cha ku Sinayi, yeyuyu yeanuche ing'ani sa uwumi, sambi atupele hwehwe. 39“Neke ye mwene ye avakukwetu vabihye ukumupulika, vamusugikise kulubali, vadobokage ukupiluka ku Misili. 40Ndawe vamulongelige Haluni: ‘Tuwuyapilage fihwana nguluvi fyefitulongolela kuwutalo, pakuva situlalukagula lwe lumuwoneche Musa yeakatulongolelige uluhuma ku Misili!’ 41Ipo peviwuyapye ikihwananguluvi kinyalwihwano lwa ingwada vakukitambikila na ukukiheyela ikinu ikiwuyape na amawoko gawo vavene. 42Neke Nguluvi ahesile pavene, avalesile vasunyalile ing'eng'esi sa kwilanga, ndawe lwandikwe mu kitabu cha avavisi, ‘Nye mwe vana va Isilaeli! siye nene yemwanawulye inambika na ifitawulwa kwa myaka machumi gatayi kula ku balali! 43Nyenye mwapikige ilihema lya kihwana nguluvi Moloki, na ifihwana ing'eng'esi fya nguluvi venyu Lefwani. Ifihwana nguluvi fyemwiwuyapye ifyo fyemwafisunyalye. Na uwimila lulo ndivasindika mwivagalule kutali ukulutila na ku Babiloni!’ 44Uko ku balali avakukwetu vevina ilihema lyelyolelelige ulwa Nguluvi pwali. Nalyo lyeliwuyape ndawe Nguluvi mwealamulonje Musa, sambi live mu lwihwano lulula lwealamulagilye. 45Sweno, avakukwetu vilekelige ilihema mbaka ulusika lwa Yosuwa, lwevingilye ukuyisagila ing'i yevavaposile ing'olo se Nguluvi aliasidasile sihege pavene. Ipo likalite mbaka ulusika lwa Daudi. 46Daudi apelitwe uwuwuya pa Nguluvi, swe akumusuka Nguluvi amutawule amusengele uwikalo wumwene Nguluvi va Yakobo. 47Neke Solomoni yeamusenje Nguluvi ikaye. 48“Neke nambi ndahihyo, Nguluvi Umunyandolo siakwikala mukaye inzenge na amawoko ga avanu, ndawe lweilonga umuvisi: 49‘Umutwa itigila: Kuchanya chekigoda changu cha indolo, na ing'i wewukanyago wa amagulu gangu. 50Lino kaye iyindawuli yemuhwana ukunzengela? Apono apalikwi pe suupa nene? Ifinu ifi mbefili ye nene yendafigafile? Mbi tutigile siyenene?’ 51“Nyenye mwivatalamu ukupulika! Inumbula na amapulikilo genyu gindawe ga avanu vesivamuseli Nguluvi (avamyanza) nyenye mwihwana avakukwenyu. Mbepali mwakumubesa Umuhe Umwelu. 52Mbi kwali umuvisi nambi yumwi ye avakukwenyu sivamutesisi? Vavawulagige avanu avevatumitwe na Nguluvi, uluhuma pidaha vadalike ukusa kwa umukami vakwe umugolofu. Neke lino nyenye mwamupitwike nu kumuwulaga. 53Na nyenye ye mwanuche indagilo seasiletite kwa nyenye umunyivaha, va Nguluvi, nanye simwinati nambi.” 54Vala avavaha va pawuhigilo pevapulike iso, vavifile hilo, vagelesulage na mino kwa ililakali. 55Neke Sitefani we amemite Umuhe Umwelu, alafile kuchanya swe akusiwona indolo sa Nguluvi na Yesu ikalite ulubali lwa kundyo kwa Nguluvi. 56Atige, “Mulavage! Ndiwona kuchanya kudindwike na Umwana va Umunu imite kulubali lwa kundyo kwa Nguluvi.” 57Ipo, avanu mbevali pala pawuhigilo vayofile na ukudinda amapulikilo gawo ni fyala. Ndawe vamusumbilige mbevali sukumwi, 58vamuhumise kwivala ya iboma, swe vakumukinya na amaganga. Vala awolelesi, vavisile imyenda jawo pasi sambi munyakilambo uyumwi ilitawa lyakwe Sawulo agilolele. 59Vaginite ukumukinyanga Sitefani na amaganga, kono umwene we akwifunya itigila, “Ve mutwa Yesu, wanukilage inumbula yangu!” 60Afugime alongele pachanya itigila, “Be Mutwa, ulavahiga uwimila inzangifu iyi.” Peasinzile ukulonga isi, swe baho baho ifwa. Nave Sawulo lwamunoje hilo ulukani ulu lwa ukumuwulaga.

will be added

X\