IFIPIGO 6

1Pambele pe vanyigendo wongelekelige, pave na lwing'ulanzo mwa vanyigendo vevalongige indongele ya Kigiliki na vala vevalongige iki Hebulaniya, na vevalongige i Kigiliki ving'ulanzige vitigila, avafwile vawo sivavagosigi hilo mu kupelwa ifya muwugulumu wawo wa mbepali. 2Nawo avigendo avanyichumi na vavili vavakemelye lilugu lya avevafuuvitwe mbevali, vakuvatigila,“Silwinoga hwehwe tuleke ukudalika ulukani lwa Nguluvi sambi twingile mukugavila avanu ifinu. 3Sweno, vanyalukolo vetu, muhagulage mwanyenye vanu vimufung'ati, vanyandolo na vevilongoswa na Umuhe Umwelu na uluhala, sambi tuvapele ikipigo iki. 4Neke hwehwe, tuhwesaga mukwifunya nu kudalika ulukani lwa Nguluvi.” 5Ulukani ulo lwavanoje mbevali vevevafuuvitwe. Ndawe vavahagulige Stefani, umunu munyalufuuwo hilo na yeilongoswa na Umuhe Umwelu, Filipo, Polokolo, Nikanoli, Timoni, Palamena, na Nikolao uva ku Andyokiya yepamwandi eapituche ulufuuwo lwa iki Yudaya. 6Swe ndawe vavavikige pa avigendo, nawo vavagelike amawoko nu kuvafunyilila. 7Ulukani lwa Nguluvi lwaginite ukutagalila na vevevafuuvitwe uko ku Yelusalemu, vaginite ukoloka, na ililugu likomi lya avatambisi nawo vanuche ulufuuwo. 8Sitefani we amemile uwuwuya na uludali apigite ifipigo fya imiitu na fya uwuhulo mu vanu. 9Neke veleluke avanu vangi sambi vibese na Sitefani. Avamwi va avanu iwo vevahumite kwisinagogi ilyatambuligwe, “Lisinagogi lya Avanu Avakombole.” (ndawe lwevalitambulige) nawo vevahumite ku Kilene na ku Alekisanda; avangi vevahumite ku Kilikiya na ku Asiya. 10Neke sivamulemiti Sitefani pakuva eina uluhala na kangi eina yula Umuhe yamusogosige ulusika lwealongige. 11Ndawe vavafupige avanu vangi sambi vatigile, “Tumupulike Sitefani ilonga ing'ani isa maligo kwa Musa na kwa Nguluvi!” 12Na kwa ulo, vasongise liyowo muvanu, avavaha na avigisi va indagilo. Swe vakumubitila Sitefani, vakumwibata nu kumusindika pawuhigilo. 13Nawo vavikite awolelesi va uwudesi vevatige, “Umunu uyu mbepali silekagi ukulonga ing'ani sa maligo kwa apono ipa apelu na indagilo sa Musa. 14Pakuva yetwetumupulike ati itigila uyo Yesu uva ku Nasaleti saapananga ipa nu kwananga imisimu mbegili jeatulaje Musa.” 15Na mbevali avali pawuhigilo vamulafile Sitefani neke vamuwone uwusu wakwe wiva nda wusu wa munyivaha va Nguluvi.

will be added

X\