1 Swe vavelige yevalamwe ukutusindika ku Italiya, ndawe vamuhanzige Pawulo na avanyandinde avangi viva mukumingwa na umulongola yeitambulwa,“Yuliyo umuvina va Avanyigalu vanyigana va ikilugu cha Agosito.” 2 Twahofile ikipugu ikikomi cha Adilamito chechagendige kikolela mumwani inzolofu isa mulutanana lwa Asiya, swe ndawe twavangige ulugendo. Alisitako umunyang'i va ku Makedoniya ukuhuma ku Tesalonike eali pamwinga na hwehwe. 3 Peyekuche twasuupite pa mwani iya ku Sidoni. Yuliyo amupije lunofu Pawulo pa kumutawula avahungile vanyawiyendi vakwe sambi vamupele ifinu na ifuka yakwe. 4 Ukuhuma ipo twave mulugendo neke ikifulufumbi chekikomi chahumige kwetubita, swe twigendela ulubali lwa ing'i ya ikigunguli cha ku Kipulo kwe ikifulufumbi chekidodo. 5 Neke ndawe twalowokige ibahali ya ku Kilikiya na ku Pamufiliya, swe twisuupa pa Mula, iboma iya Lukiya. 6 Ipo yula umulongola va avanyigalu akifikite ikipugu ikikomi cha Alekisandeliya chechabitige ku Italiya, ndawe atusopige mumo. 7 Kwa ifilo fyolofu twagendige mola mola na kwa kutoka twafisile pipi na ku Nido. Pakuva ikifulufumbi chatupilulige kumbele, twahele kuwutalo twigendela mulubali lwa ku Kilete pipi na ku Lasi Salimone kwe ikifulufumbi che kidodo. 8 Twakwete palubali twigenda mola mola mbaka tufike apono pepitambulwa, “Pa kilowoko ikinofu.” Pipi na pa boma ya Laseya. 9 Ulusika lolofu yelwelulutye, na ulusika lwa ukwiyima ukulya yelwelulutye. Nalo lwe lutalamu ukubitaga nu lugendo mukipugu kila, ndawe Pawulo avakenyelige ukuta, 10 “Nye vanyalukolo, nene ndihosa ukutigila ulugendo lwetu ulu luva lutalamu na tuyasa fyolofu si kufinu ifilimumu hela na ikipugu, pesi kangi na wuwunani wetu.” 11 Neke yula umulongola va avanyigalu aginite ukumupulikisa yula umunyakugendya ikipugu ikikomi na yula umwenacho ukulutila ing'ani sealonzile Pawulo. 12 Na pakuva pa kilowoko kila pesipahwaniti vikale ulusika lwa pakitungwi, awolofu vawendige vaginage ukubita nu lugendo, na wone luhwane vafike ku Foinike, kula kwe vevahwana ukwikala ulusika lwa ikitungwi. Foinike che kilowoko cha ku Kilete ikidonyite ulubali lwa kusika kumihago na kunena kumihago. 13 Sweno, ulukala ulunofu ulwihuma kulutanana lwavanzile ukupuga, nawo swe vakwihosa ulwa ulo luvatanga; swe vivanga ulugendo vigendela pipi hilo na imwani iya ku Kilete. 14 Neke silwaluti lusika, ikifulufumbi ikikomi ikitambulwa, “Ikifulufumbi cha ku Kusika cha kumihago.” Chavanzile kihuma pa ing'i ya mu kigunguli. 15 Ikifulufumbi chatofile ikipugu ikikomi, na pakuva ikifulufumbi yechekitulemite swe ndawe twakilekige kiyunzwage na ikifulufumbi kila. 16 Neke ing'i iyimwi indodo ya mu kigunguli chekitambulwa Kawuda chatusikite ludodo na ikifulufumbi kila; na petukwete ulubali lwa kunena lwa apono pala twavanzile ludodo ukulongosa, nave ndahihyo ye kwa kutoka. 17 Vala awogesi va ibahali vakikwegite ikipugu ukuhuma mugati mwa ikipugu ikikomi, ndawe apingige ikipugu ikikomi nu mulegesi vipilimya swe vikangasa, wogopige ulwa vahwanite vahopele mulidope pala pa kilowoko cha Libiya. Swe ndawe visige ilyenda vakukileka ikipugu ikikomi kiyunzwage na ikifulufumbi. 18 Ikifulufumbi chaginite ukupuga na ikimunyi chakavili swe vavanzile ukutosa ifitegulo mululenga vihumya mukipugu ikikomi. 19 Ikimunyi chawudatu, vavanzile ukutosa kangi ifinu fya mukipugu ikikomi kwa amawoko gawo vawene. 20 Kwa ifilo fyolofu sitwaliwonigi ilisuva nambi ing'eng'esi, ikifulufumbi chaginite ukupuga na uluhuvi lwa ukuponia uwumi wetu lwayasile. 21 Peyetwikalite filo fyolofu wesitwilya, Pawulo imite pagati apawo, itigila, “Vanyalukolo, mwemuve mumulikise tutane ukuhega ukuhuma ku Kilete, mwemupige ulu. 22 Neke lino nene nguvasuka mukangase imitima; asupali nambi mwa hwehwe umunu uyumwi yeayasa uwumi wakwe pesi iki ikipugu ikikomi hela. 23 Pakuva igolo pakilo munyivaha va Nguluvi yula ye nene ndi munu vakwe na yeyuyo ye nene nda kumusunyalila akanzusye, 24 akunigila: ‘Pawulo, lemwage ukogopa! Lukuvaje veve usakwima pa Kaisali; nave Nguluvi, kwa uwuwuya wakwe, akupelye uwende kwa ukuvapoka mbevali vemugendise na veve sambi valemwe ukuyaga.’ 25 Sweno, Vanyalukolo, mukangasage imitima! Pakuva nene ngumufuuwa Nguluvi ukutigila luva ndahihyo ndawe lweandonje. 26 Neke tutosewa mukilowoko cha pa kagunguli akangi de.” 27 Neke pakilo ikimunyi icha ichumi na fitayi, ikifulufumbi chatuyunzige uko na uko mubahali ya Adiliya. Neke pipi na mukilo mugati awogesi va ibahali valukagwe ulwa tuve twipipi na ing'i ing'afu. 28 Swe ndawe vagelige ukulava ikiseela icha ululenga vitoosa umulegesi umuwope ikinu ikisito, vapatite nzwambo machumi gatayi. Pambele vatoosise kangi vipata nzwambo machumi gadatu. 29 Pakuva wogopige ukubumila amatalawe, vatosise ifinu fitayi ifisito kumbele ya ikipugu ikikomi; swe ndawe vifunyige sambi kwangupe kuche. 30 Awogesi va ibahali vawendige ukukimbila, na yevevasulunwise kila ikipugu ikidodo mululenga viva ndavasogwe ukutosa ifinu ifisito kula kuwutalo wa ikipugu ikikomi. 31 Neke Pawulo amulonje yula umulongola va avanyigalu na vanyigalu vakwe ukutigila, “Wone awogesi iva va ibahali valemwe ukusigala mu ikipugu ikikomi, simupokwa nda.” 32 Ipo vala vanyigalu vadumwe imilegesi jejegibete kila ikipugu ikidodo, swe ikipugu kila vakilesile kitegulwe na ululenga. 33 Pesambi kwicha, Pawulo avagongolite mbevali valisage, “Neng'ino de kimunyi cha ichumi na fitayi we muhuguve simwilya nambi kinu. 34 Sweno, nene nguvagongola ulwa mulisage pemuhwana ukunana. Pakuva asupali nambi munu uyumwi mwa nyenye yeayaga.” 35 Pealonzile ulo, Pawulo aategwe umukate, akumulumba Nguluvi pamiho gawo mbevali, swe imegula, ilisaga. 36 Ipo swe mbevali viva na uludali, swe ivanga nawo ukulya. 37 Kwa mbetuli twetufikite vanu magana gavili na machumi gimufung'ati na vimutanda mula mukipugu ikikomi. 38 Pembetuli yetulye twigwite, vakepwise uwusito wa ikipugu ikikomi vitosa ifilyo mubahali. 39 Peyekuche, awogesi va ibahali sivayikagwi ing'i yila, swe vakupawona apono apepina ikilowoko; swe valamwe wone luhwane vakime baho. 40 Sweno, ndawe vadumulige ifinu ifisito fyefyefibete ikipugu ikikomi fikale mubahali, swe vikunga ilyenda ilimwi, sambi ilikala livasindike pa kilowoko. 41 Neke vafisile apono pe ing'asi sivili isa ibahali sitang'ana, swe ikipugu ikikomi kitwambagala. Kuwutalo ikipugu ikikomi chahopye mulidope nambi kuhogoleka kumbele ikipugu ikikomi chavanzile ukumegulangika kihuma polofu ukwimila amavingo gala amakomi. 42 Vanyigalu vawendige vavawulage vanyandinde mbevali wogopige ukutigila wogelela mbaka pakilowoko vakimbile. 43 Neke pakuva yula umulongola va avanyigalu asakige ukumupoka Pawulo, avatanie valemwage ukuvawulaga. Swe ilagila vala vevawusele ukogelela vasumbage vahume wogelele vafike pamwani, 44 na avangi vahumage mumbele vibatage ifibawo fya ikipugu ikikomi chekimegulangike. Ulo lwelwave mbetuli twafikite pamwani twivatelefu.
Copyright © 1999 The Bible Society of Tanzania; ℗ 2010 Hosanna