IFIPIGO 25

1Neke umwene Fesito peyeafikite pala pa lutanana na ukwikala filo fidatu, ahesile pa Kaisaliya ibita ku Yelusalemu. 2Avatambisi avavina pamwinga na avalongola va Avayudaya vamulonje ulwa inongwa yevinayo kwa Pawulo. Vamugongolite Fesito, 3sambi avasindikile Pawulo ku Yelusalemu; pakuva yevevagahite ukumusigamila vamuwulage mung'asi. 4Neke Fesito avapitwe, “Pawulo asigala mundinde kuko ku Kaisaliya na yunene sinyava pakubita kuko. 5Mulekage avalongola venyu tubitase nawo sambi vakatose inongwa yawo na Pawulo wone akapigite ikinu chechekivesaga cha wananzi.” 6Fesito ikalite nawo kwa ulusika lwa ifilo fyefifikite kufimunana na apangi finyichumi de, ndawe apilukige ku Kaisaliya. Peyekuche ahele pawuhigilo, swe ilagila vamulete Pawulo umo. 7Neke peafikite Pawulo, Avayudaya avevahumite ku Yelusalemu vamupilime swe vivanga ukumusongela ing'ani nzolofu ingomingomi sesavalemite ukukangasa ulwa vilongela mumwene. 8Pakwikanila, Pawulo atige, “Nene sindananzili kinu chechekivesaga icha indagilo isa Avayudaya, nambi kwa Itembeli, nave kwa Kaisali.” 9Neke Fesito awendige ukwiyendelesa kwa Avayudaya ndawe amuwusige Pawulo, “Ndawuli uke uwenda ukubita ku Yelusalemu sambi uko ukahigwe inongwa yako pa nene?” 10Neke Pawulo apitwe, “Nene nzimite ipa pawuhigilo wa Kaisali, na baha ipa pepahwanite nene nyigwe. Ndawe na yuveve we ukulukagula wunofu, ukutigila nene sindavananji Avayudaya ikinu chechekivesaga. 11Sweno, wone mboneke ndimwananzi na kwa uwananzi uwo nene hwanite nyigwe ukufwa apo nene sindigongola ukudegepelwa nda. Neke wone ing'ani sevakusongela nene avanu iva sawudesi, asupali yeanawula nene kwavene. Nene ndihamya inongwa iyi yibite kwa Kaisali!” 12Sweno, Fesito peyealongine na avavaha vakwe swe akumutigila Pawulo, “Ususile ukuhamya inongwa yibite kwa Kaisali, sweno, ubita kwa Kaisali.” 13Peyefilutye filo fikefu, Umutema Agilipa na Belenike vafikite ku Kaisaliya sambi vamuhungile Fesito. 14Vikalise na Fesito kwa ifilo fyolofu uko nave Fesito ndawe amolelelige Umutema inongwa ya Pawulo ukutigila, “Ipa pwali umunu uyumwi ye Felisi amulekite musope mundinde. 15Ndavelige ndibita ku Yelusalemu avatambisi na avavaha va Avayudaya vamusonje kwa nene na ukusuka ndimuhige. 16Neke nene ndavapitwe ukutigila ugo simusimu gwa Avalumi ukumuhiga umunu we salatang'ana na vala vanyakumusongela na ukupelwa ikilega nave agele ukwikanila mwa ing'ani iso sevakumusongela. 17Sweno, peyevafisile ipa sindahaafili, swe ndikong'asa avanu pawuhigilo ikimunyi cha kavili, swe ndilagila umunu uyo vamulete. 18Vala vanyakumusongela vimite neke sivamusonji ulukani ulubi nambi lwa uwananzi ndawe lwe nene ndihosige. 19Neke ndalukagwe ulwa vibesige nave mung'ani isingi singi isa ulufuuwo lwawo na ulwa umunu uyumwi yeitambulwa Yesu yealafwe, neke Pawulo peibatilila ukutigila umunu uyo pemumi. 20Nene sindaseliti ulwa ukupiga mwidati ilyo. Sweno, ndamuwusise Pawulo wone awenda abite akahigwe pawuhigilo kula ku Yelusalemu ulwa inongwa yakwe. 21Neke Pawulo peasusile ukuhamya inongwa, asuusile asigale mundinde mbaka uwulamusi wa inongwa iyo wulamulwe na Kaisali. Nambi nene ndalamwe ukumuleka mundinde mbaka pemba yenywanite umusindika kwa Kaisali.” 22Swe Agilipa amutige Fesito, “Nane ngembwenda ukumupulika umunu uyo yunene.” Fesito akumutigila, “Umupulika imilawu.” 23Sweno, peyekuche, Agilipa na Belenike vasile mu bwalo ya umukong'ano kwa lulumbo viva pamwinga na avavina va avanyigalu na avatema va iboma. Fesito ndawe alagilige vamuletage Pawulo mula mubwalo, 24ndawe atigilige, “Ve Mutema Agilipa na mbemuli yemwipwali ipa pamwinga na hwehwe! Ipa apenyu pwali umunu ye Avayudaya mbevali avipwali ipa na vala va ku Yelusalemu vasuusile mige lukani kulumwene we viyova vitigila umunu uyu silukuvagila ulwa avelage peanana. 25Neke nene sindaluweni ulukani ulubi nambi lwa uwananzi weweuvesaga wewuhwanite uyu ahigwe ukufwa. Neke, pakuva Pawulo umwene akasusile ukuhamya inongwa yibite kwa Kaisali, ngalamwe ukumusindika. 26Pede kwa ulubali lwa nene ndimugaya lukani hilo lwehwanite ndimwandikile Kaisali ulwa umunu uyu. Nambi nene ndimulesile ipa panyenye na pa veve ve Mutwa Agilipa, petumugosise, sambi ndive na cha ukwandika. 27Ndihosa ulwa luva lukani lwa wupuva ukumusindika umunyandinde wesiwilonga inongwa iyene yevakumusongela.”

will be added

X\