IFIPIGO 2

1Na ikimunyi cha i Pendekosite chavelige kifika, vala vevevafuuvitwe vevakong'ine pamwi mbevali. 2Sukumwi kwa kutinukisiwa na umubumo ugwihuma kuchanya gwipulisa witigila kifulufumbi ndawe chamemige mukaye mbeyili yevevikalite. 3Ndawe savawonekelige indimi, witigila lwenge lwa moto gutagalye uko na uko sikuvikila mumitwe jawo yumwi, yumwi. 4Mbevali ndawe vamemige Umuhe Umwelu, swe vivanga ukulonga mundongele isingi ndawe Umuhe mweavasogokisige. 5Na kuko ku Yelusalemu kwe vikalige Avayudaya na avanu avangi va mung'i mbesili vevakumufuuwa Nguluvi. 6Vavelige vipulika umubumo ugo, neke lilugu likomi swe likong'ana, mbevali vasasave hilo, pakuva avanu mbevali vavapulike iwo vilonga mundongele sawo. 7Neke vasasavale na ukutinuka vitigila, “Mbi iva mbevali vevilonga si vanu va mu Galilaya? 8Lwiva ndawuli, hwehwe mbetuli tukuvapulika iva vilonga indongele isa ukwetu kwetwegalilwe? 9Hwehwe yetwipwali twihuma ku Paliti, Mediya na ku Elami, na avangi ukuhuma ku Mesopotamiya, Yudaya, na ku Kapadokiya, ku Pondo na ku Asiya, 10ku Filigiya, na ku Pamufiliya, ku Misili na kumbali sa ku Libiya pipi na ku Kilene; neke avamwi mwahwehwe vihuma ku Lumi, 11Avayudaya na Avamyanza vevevapituche ulufuuwo lwa Kiyudaya; na avamwi mwahwehwe twihuma ku Kilete na ku Alabiya. Neke mbetuli tukuvapulika iva vilonga indongele setu ifipigo ifikomi fya Nguluvi.” 12Mbevali vasasave na ukuhuguvala vasamukwiwusa vavene, “Ulu kwekutigila kiki?” 13Neke avangi vavayovelese vevevafuuvitwe, vitigila, “Avanu iva vagaasi!” 14Neke ndawe Petulo imige pamwi na vala avanyichumi na yumwi ivanga ukuvadalikila kwa iliswi likomi: “Vanyalukolo Avayudaya na nyenye mbemuli yemwikalite mu Yelusalemu, mupulikise musikite isi sendilonga. 15Avanu iva sivagaaliti ndawe lwemwihosa nyenye; mbona pemilawu hela pekivalilo cha wudatu? 16Neke ulwene ulukani ulu lwe lula lwelwelulonge na Umuvisi Yoheli: 17‘Nguluvi itigila de, Mufilo fila fya ku mudugo, Sandivisikisa avanu mbevali Umuhe vangu. Avanenyu, vanyidama na avang'inetu, savadalika ulukani lwangu; Avanyakilambo venyu savagubulilwa ing'ani, na avagogolo venyu savalota amaloto. 18Ena, na avavanda vangu, vanyidama na avang'inetu, sandivisikisa Umuhe gwangu ifilo ifyo, nawo savadalika ulukani lwangu. 19Samiga imiitu kwilanga kuchanya, na ifilagilo konong'i pasi; sakuva na idanda, umoto na ilisusi lisito; 20Ilisuva salipituka ukuva lwisa, na Umwesi sagupitulwa guve danda, Lwesikilafika ikimunyi kila ikikomi cha indolo sa Umutwa. 21Ipo, yeyeavesaga yesaifunya mwitawa lya Umutwa saapokwa.’ 22“Mwevanyang'i va mu Isilaeli, mupulikise ing'ani isi! Yesu uyu va ku Nasaleti e munu munyaludali lwa Nguluvi. Ulu lwawonike wimila mu miitu na uwuhulo we Nguluvi apigite ukukola kulumwene. Nanye mbemuli musisele isi pakuva iso sapigiche pagatinagati apenyu. 23Nguluvi mumigosekese jakwe yumwene, yealalamwe ulwa Yesu saatawulwa kwa nyenye; nayi nyenye mwamuwulige kwa ukuvalekela avanu avanyanzanangifu vamutumbike. 24Neke Nguluvi amusilibwe ukuhuma kwa avafwe na ukumupoka muwuvafi wa ifwa pakuva silweluhwaniti nambi, ifwa yimuleme. 25Nambi Daudi alonzile kulumwene ulwide: ‘Ndamuwonige Umutwa pamiho gangu mbepali; pakuva ealipamwi na nanene ulubali lwangu lwa kundyo, sambi ndemwe ukudengadenga. 26Nambi, inumbula yangu yihekelela, nane ndakufile ingulugulu kwa luhekelelo. Na umuvili gwangu sagwikala mu luhuvi; 27Pakuva veve sisauyileka inumbula yangu kuvafwe, nave ukumutawula umwelu vako awole. 28Veve undaje ing'asi sa ku wumi, na lwe wiwali, na ulwa wipwali ukumela uluhekelelo!’ 29“Vanyalukolo vangu, ndiwenda ndivalongele pelu hela isa Daudi ukukwetu. Uyo afwe na ukutagwa, na ichanga chakwe kilibaho mbaka neng'ino de. 30Neke pakuva ali muvisi, alukagwe ulufingano lwa Nguluvi lweamwilapye kwa ulwilapo ukutigila mumbegalo yakwe, samuvika uyumwi mu kigoda chakwe ateme. 31Mwene Daudi pakuva yealasikagwe iso nambi alulonzile ulusilibuko lwakwe Kilisito peatige. ‘Inumbula yakwe siyalekitwi kuvafwe nambi umuvili gwakwe sigwawosili.’ 32Sweno, Nguluvi amusilibwe uyo Yesu na hwehwe mbetuli twiwolelesi va ulukani ulo. 33Yesu akung'umikwe pachanya mbaka kulubali lwa kundyo kwa Nguluvi, na ukwanukila ukuhuma kulu Dade kila ikipelwa cha Umuhe Umwelu, che alavahuvise nambi isi mbesili semukusiwona lino nu kupulika, kwe kwiswa kwa uyo Umuhe. 34Neke Daudi umwene, siakung'umikwi kuchanya; neke umwene alonzile: ‘Umutwa amutige Umutwa vangu: Wikale kwiwoko lyangu lya kundyo, 35mbaka pendivavikite avatavangu vako vave nda kigoda cha ukugeleka amagulu gako.’ 36“Na avanu mbevali va mu Isilaeli lwinoga valukagule hilo nachene ulwa uyo Yesu yemwamutumbike, ye yuyo ye Nguluvi amuwuyipe ave Mutwa na Mesiya.” 37Sweno, avanu vavelige vipulika iso, swe lwavavafile munumbula, ndawe vavawusige Petulo na avigendo avayagwe: “Vanyalukolo lino tugitage ndawuli?” 38Petulo avapitwe, “Muhongesage nu kubatisiwa mbemuli, mwitawa lya Yesu Kilisito, sambi mudegepelwe inzanangifu senyu, nu kwanukila kila ikipelwa, Umuhe Umwelu. 39Pakuva ulwihuviso ulo mwihuvisiwe yinyenye na avanenyu, na kwa mbevali avali kutali na vala mbevali ve Umutwa Nguluvi saavakemela vamusile.” 40Petulo awolelelye kwa nzolofu, nu kuvasukanisa we akuvagongola avanu akuvatigila, “Mwiponiage nyenye na amalugu inzanangifu senyu.” 41Awolofu ikimunyi icho, vidiche ulukani lwakwe nu kubatisiwa. Wongeleche vanu mbilima sidatu kwa avevafuuvitwe. 42Na iva mbevali viyigisige ukuhuma kuvigendo na ukwikala kinyalukolo, na mukumegula umukate nu kwifunya. 43Pakuva imiitu myolofu na ifilagilo fyolofu fyapigikige mwa avigendo, avanu mbevali vave na muhwehwe. 44Na avevafuuvitwe mbevali vali lumwi, vave vahangite mbefili. 45Vagusige ifinu fyawo, na ukugavana mbevali, umunu mweawendelige. 46Nawo vave pevakong'ana mu Tembeli chechekivesaga kimunyi na valisige ifilyo fyawo pamwi mukaye sawo kwa luhekelelo na mutima gwa uwilevesi, 47Vamulumbige Nguluvi, na ukwendwa na avanu mbevali. Na Umutwa ongelesige avapokigwe we kwache.

will be added

X\