IFIPIGO 19

1Ulusika lwe Apolo ali mu Kolindo Pawulo agenzile munanana isa mubalali, pambele afisile ku Efeso, uko kwe avafisile avanyigendo avevafuuvitwe avamwi. 2Swe akuvawusa, “Ndawuli mwamwanuche Umuhe Umwelu pala pemwavelige mwifuuwa?” Nawo ndawe vamupitulige, “Nda! Sitwetulapulika ulwa kwali Umuhe Umwelu.” 3Nave ndawe avawusige, “Mbi lino mwabatisiwe na uwubatiso uwindawuli?” Swe vakumupitula, “Uwubatiso wa Yohane.” 4Nave Pawulo ndawe avatigilige, “Uwubatiso wa Yohane walagilige ukuta avanu vahongise na Yohane avalonje avanu vamufuuwage yula yeakusa mumbele mwa umwene, kwekutigila Yesu.” 5Pevapulike ulo, swe vibatisiwa mwitawa lya Umutwa Yesu. 6Sweno, Pawulo ndawe avagelekige amawoko, na Umuhe Umwelu swe akuvasila, swe vivanga ukulonga indongele isingi na ukulonga isa wuvisi. 7Kwa mbevali vevafikite vanu vagosi vanyichumi na vavili. 8Mulusika lwa myesi gidatu Pawulo abitige mu sinagogi, avelige na ililonge lya ukuvagongolesa hilo isa uwutwa wa Nguluvi. 9Neke avangi vave na lubesa, vabihye pakufuuwa, swe vivanga ukulonga fibi ulwa iyo ing'asi ya Uwutwa. Ipo Pawulo ndawe avalekige uwutipulika, swe akuvategula palubali avevafuuvitwe, atinasige nawo mbepali mukaye ya ukwimbila ya Tilano. 10Agitige ndahihyo kwa ulusika lwa myaka givili, mbaka avanyang'i mbevali va mu Asiya, Avayudaya na avamyanza, valupulike ulukani lwa Umutwa. 11Nguluvi apigite imiitu iminyawuhulo ukukola mu mawoko ga Pawulo. 12Avanu vategulige imyenda ija ukupigila na ifitema na igingi jeapigilige Pawulo, ndawe vavasindikilige avatamwa, nawo ndawe vaponige ifitamwa fyawo; na vala ave vina amasoka gahumile mwavene. 13Avayudaya avamwi vevayingige uko na uko vihumya amasoka vagelite ukukola litawa lya Umutwa Yesu vatigilige, “Nguvalagila mwitawa lya Yesu yula ye idalikwa na Pawulo.” 14Avana avimufung'ati va Sikeva, Umutambisi Umuvina va Kiyudaya, vevalipamwi na vawo vevapigige ndahihyo. 15Neke lisoka lyavapitwe, “Ndimukagwe Yesu, na Pawulo nave ndimukagwe, mbi nyenye yunyenye vanani?” 16Sweno, umunu yula munya lisoka swe akuvasumbila kwa ludali mbevali, swe akuvasuuma. Na iwo avana va Sikeva vakimbye vali wufuula ukuhuma mukaye yila kono vina nzeya imivili mbegili. 17Mbevali avikalige mu Efeso Avayudaya na Avagiliki valupulike ulukani ulo, neke vave na muhwehwe, swe ndawe valilumbige ilitawa lya Umutwa Yesu. 18Avevafuuvitwe wolofu vasile vilogole mbesili sevapigite. 19Avamwi pamwandi ve vahavi, vakong'ise ifitabu fyawo fya uwuhavi, vakufinyanya pamiho ga avanu mbevali, ifitabu ifyo fye fihwanite ukugulwa amagobole agafikite mbilima machumi gahanu. 20Na ukwimila lulo, ulukani lwa Umutwa lwaginite ukutagalila na ukukangala. 21Pesilutye iso, Pawulo alamwe ukubita ku Yelusalemu igendela mu Makedoniya na mu Akaya. Atigee, “Pefikite uko, lumbaje ndiyiwone na i Lumi nayo.” 22Sweno, ndawe avatumige avatanzi vakwe avavili, Timoti na Elasito, vatale ukubita ku Makedoniya, nave asigee lusika ludodo uko ku Asiya. 23Ulusika ulo pelyawonike iliyowo likomi uko ku Efeso ukwimila Ing'asi iya Umutwa. 24Alikwali umuponzi amagobole uyumwi yeitambulwa Demetiliyo, yee ina ikipigo cha ukuponda ifitembeli ifya amagobole ifyefihwana na itembeli ingomi ya nguluvi ung'inetu yeitambulwa Alitemi. Avaponzi vambulige kinu mukipigo icho. 25Demetiliyo avakong'ise iwo mbevali vevapigige pamwinga na umwene na avangi avali mukipigo kicho, akuvatigila, “Nyela vayangu, mukulukagula ulwa hwehwe twakwambula kinu kikomi ukuhuma mukipigo iki. 26Lino, mwipulika na ukwilavila yunyenye ing'ani sa Pawulo seipiga, kangi si baha hela pa Efeso, akave ipiga lulu mu Asiya mbeyili. Umwene akuvagongolesa nu kuvapitula avanu na lino yevidiche ukutigila ifihwana nguluvi fyetwiponda ifyo si finguluvi nda. 27Sweno, powuli wutalamu siwita hela uwusulusi wetu wupelwa litawa libi. Kangi silulo hela, pakuva ulukani ulu yelwambusa na itembeli ya ukwisunyalila ya Alitemi yive nda kinu cha wupuva. Pambele na lulumbo lwakwe uyo ye i Asiya, na konivala mbekuli vakumusunyalila luduga.” 28Vavelige yevapulike iso, vave na ililakali, swe vivanga ukuyova: “Alitemi ye muvina mu Efeso!” 29Iboma mbeyili swe yiva mwiyovo. Ndawe vavasumbilige Gayo na Alisitako, avanyang'i va mu Makedoniya, vevagendasige na Pawulo, swe vakuvakweganga mbaka ku luvanza ulwa ifiwungo. 30Pawulo umwene awendige ukwitang'ana na ililugu ilya avanu, neke vala ave vafuuvitwe swe vakumutanila. 31Avatema avangi va ulutanana ulo lwa mu Asiya, veve vanyawiyendi vakwe, vamutumye Pawulo ulukani vakumugongola alemwage ukwambusa uwumi wakwe ukubita ku luvanza ulwa ifiwungo. 32Ulusika ulo, umunu yeyeavesaga ayovige, avangi viyova vilonga ulu na avangi viyova vilonga lula, pakuva umukong'ano gwegusasing'ine. Avangi wolofu sivakikagwi na chechalesile avene vikong'ana pala. 33Avamwi vihosige ulwa Isikanda ye mwene yeasagise liyowo, neke Avayudaya vamutige Isikanda abite pawutalo, swe Isikanda ndawe avasinisige avanu vakatuke pakuva awendige ikanile pa ililugu lya avanu. 34Neke vavelige vakulukagula ulwa umwene Muyudaya, mbevali kwa liswi limwi vayofile, Alitemi ye muvina mu Efeso!” Vave pevayova ndahihyo kwa lusika lwa fivalilo fivili. 35Pambele umwandisi va iboma iyo ahwanite ukuvakatusa akuvatigila, “Vanyang'i va mu Efeso, mbemuli mukulukagula ukutigila iboma iyi ya Efeso ye yayigosa itembeli ya nguluvi Alitemi na ukugosa ikihwana nguluvi kila chechasulunwike ukuhuma kuchanya. 36Asukuli yeahwanite ukubesa ulukani ulu. sweno, musike, mulemwage ukupiga kinu mwivagaya wusikimafu. 37Muvakemelye avanu iva ipa nave sivamulisili nave ukuyilonga fibi itembeli ya nguluvi vetu ung'inetu. 38Wone luve, Demeteliyo na avaponzi avayagwe vina lukani kwa avanu iva, uwuhigilo powoli na avatema va inanana nawo povali, vahwanite ukuvatosa kuko. 39Neke wone mwina lukani lungi kangi, musindike apono apahwanite. 40Pakuva tuke tuhwanite ukwisongela ulwa tusagise liyowo kwa ulwiwoneka namunyi lye ligaya kivalwa. Na tuke tulemwa pakolelela kuvatema mbaka vidikile ikivalwa cha iliyowo ili.” 41Pealonzile ulo, swe ndawe agutagalisige umukong'ano.

will be added

X\