IFIPIGO 15

1Sweno, avanu avangi vafisile ku Andyokiya vihuma ku Yudaya ndawe vavangige ukuvigisa vala vanyalukolo swe vitigila, “Wone mulemwe ukuwoolwa ndawe imisimu jealaje Musa, simuhwaniti ukupokwa.” 2Ulukani ulo lwambwise ulubesa lukomi, na Pawulo na Balanaba vavelige visinda ukulongana nawo, ndawe vavahagulige Pawulo na Balanaba pamwinga na avevafuuvitwe avamwi va ilikanisa lya ku Andyokiya vabite ku Yelusalemu, vakavawuse avigendo na avavaha ukwimila ulukani ulu. 3Swe, ilikanisa ndawe lyavasindikige, nawo pevalutilige mu Foinike na mu Samaliya vavalonje lwe avamyanza vakamupituche Nguluvi. ing'ani isi pevapulike vala avanyalukolo mbevali vahekelye hilo. 4Vavelige vifika ku Yelusalemu likanisa lyavanuche, pamwinga na avigendo na avavaha; nawo ndawe vawolelelige mbesili se Nguluvi akapigite ikola avene. 5Neke avevafuuvitwe avangi va mu Kilugu cha Avafalisayo vimite, vitigila, “Lulagile avamyanza vawoolwagwe na ukwigisiwa ukwinatila indagilo sa Musa.” 6Sweno, avigendo na avavaha vakong'ine pamwi ukugosa hilo ulukani ulo. 7Na peyevalongine misika hilo, Petulo imite, ndawe atigilige, “Vanyalukolo vangu, nyenye mukulukagula ulwa pamwandi Nguluvi awendite ukuhagula nene mwanyenye ndalike ulukani ulunofu, sambi avamyanza vapulike na ukufuuwa. 8Nave Nguluvi yeasisele inumbula sa avanu, akangise ukutigila avidiche pakuvapela Umuhe Umwelu ndawe lweatupelye hwehwe. 9Savisili uluhagu kwa hwehwe na avene; asofwige inumbula sawo kwa ulufuuwo. 10Neke lino, mbi ndawuli tumugele Nguluvi kwa ukuvatwika avafuuvitwe ikitegulo che avakukwetu nave hwehwe chatulemite pakupika? 11Lulemwe ukuva ndahihyo, neke tufuuwagwe ulwa hwehwe na avene mbetuli twipokwa ukwimila uwuwuya wa Umutwa Yesu.” 12Neke baho ililugu mbelili lwave sili, likuvapulikisa va Balanaba na Pawulo pevakolelela imiitu na uwuhulo we Nguluvi akapigite kwa ukukola mwa vene mu vanu vesivamuseli Nguluvi. 13Vavelige visinda ukolelela, Yakobo avanzile ukulonga, “Vanyalukolo vangu mumulikisage! 14Simoni alonzile lwe Nguluvi pamuvango avalolelige avamyanza, swe ihagula avamwi mwa vene vave vanu vakwe. 15Ulukani ulu luling'ene hilo na Ing'ani isendonge na avavisi, ndawe uwandike uwelu lwewitigila: 16‘Pambele pesilutye ing'ani isi samiluka, sanzenga kangi ikipagalo kila cha Dawudi ichagwe; sambuyapa kangi amahame na ukusenga wupya. 17Ipo avanu avangi mbevali, avanu va ing'i mbesili, vendavakemelye vave vanu vangu savamusaka Umutwa. 18Ulu lweilonga Umutwa, umwene yeagisile ulukani ulu lukagulike uluhuma pidaha.’ 19“Apo, nene ndilamula dee: tulemwage ukuvafwahisa avanu vesivamuseli Nguluvi (avamyanza) vevakumupitukila Nguluvi. 20Neke tuvandikilage hela tuvatigilage ulwa valemwage ukulya ifinu ifinyawinya ifitawule inambika kufihwananguluvi, na vikomalilage na mu wugoni; valemwage ukulya ing'oko yeyibuditwe na ukunywa idanda. 21Pakuva uluhuma idaha ing'ani sa Musa sikave sidalikwa muboma mbesili na ukwimbwa mumasinagogi mbegali mufimunyi ifya isabato.” 22Avigendo, avavaha na ilikanisa mbelili valamwe ukuvahagula avanu avangi ukuhuma mwavene sambi vavatume ku Andyokiya vabitase na Pawulo na Balanaba. Sweno, ndawe vamuhagulige Yuda yeitambulwa kangi Balanaba, na Sila iwo mbevali vevakagulike hilo mu vanyalukolo. 23Ndawe vavapelige ulwandiko ulu, “Hwehwe vigendo na avavaha, vanyalukolo venyu tukuvatigila kamwene mbemuli vanyalukolo vetu ye mwiva mung'i isingi yemwikalite uko ku Andyokiya, ku Siliya na ku Kilikiya. 24Tukapulike ulwa avanu vangi ukuhuma kono vakasile ukwenyu na ukuvatindasa na ing'ani sawo, na ukuvahuguvika imitima jenyu. Neke vakapigite ing'ani iso wesivalagile na umunu yeyeavesaga mwahwehwe. 25Neke lino, hwehwe mbetuli tulamwe pamwi ukuvahagula avanu avangi na ukuvatuma kwa nyenye pamwinga na vanyawende vetu Balanaba na Pawulo, 26vevakitawe uwumi wawo ukwimila ilitawa lya Umutwa vetu Yesu Kilisito. 27Neke lino, tukuvatuma Yuda na Sila kwa nyenye; iva vavalongela vavene isi setuvandiche. 28Sweno, Umuhe Umwelu na hwehwe twiyidikise ulwa tulemwage ukuvatwika ikitegulo ikisito pesi sisila hela ing'ani ingomi: ulwa 29mulemwage ukulya ifinu ifitawule nambika kwa ifihwana nguluvi; na uliya idaho; na inyama ya ing'oko iyibuditwe; mwikomalilage na mu wugoni. Pemupigite ulo muva muwuyipe lunofu. Kamwene mbemuli!” 30Peyevavilasile, vala avatume vahele ku andyokiya, vavelige vifika vakong'ise umukong'ano gwa avevafuuvitwe mbevali, ndawe vavapelige lula ulwandiko. 31Peyevimbite ulwandiko lula ing'ani isenzandike savakangise imitima jawo, swe vihekelela hilo, 32Yuda na Sila, venawo ve vavisi, vatinise na iwo vanyalukolo kwa misika myolofu vakuvakangasa imitima na ukuvapela uludali. 33Peyevikalite uko kwa lusika de, vanyalukolo va mu Andyokiya ndawe vavilagige vakuvasukila uwikala kunoga, sweno ndawe vapilukige kwa vala avevavatumite. [ 34Neke Sila awene lunofu ukusigala kuko.] 35Neke Pawulo na Balanaba vasigee kuko ku Andyokiya kwa lusika ludodo kangi; vakwigisa na ukudalika ulukani lwa Umutwa, viva pamwinga na avanu avangi wolofu. 36Pefilutye filo fikefu de, Pawulo amutige Balanaba, “Tupiluke tukavagendele vala vanyalukolo muboma mbesili kwetudalikige ulukani lwa Umutwa, tukilavile lweviwali kulino.” 37Balanaba asakige vamutegule nayi Yohane yeitambulwa kangi Maliko. 38Neke Pawulo siawendigi ukumutegula Maliko, ye pamwandi avalesile kula ku Pamufiliya na ukubihila pakupigasa ikipigo. 39Swe ndawe lwalamukige ulubesa lukomi hilo, mwavene, swe vilekana Balanaba amutegwe Maliko swe vihova ikipugu ikikomi vibita ku Kipulo. 40Nave Pawulo ndawe amutegulige Sila, peye vanyalukolo va apono ipo yevamuvikite muwulolesi wa uwuwuya wa Umutwa, ndawe ahegige. 41Mulugendo ulo, akwete mu Siliya na mu Kilikiya akugakangasa amakanisa.

will be added

X\