3 YOHANE 1

1Nene nde muvaha, ngukwandikila veve Gayo, munyawiyendi vangu, yengwenda munachene. 2Munyawende vangu, ngukusukila uwunofu wewewuvesaga, ngukusukila ulugilimati ulwa muvili ndawe lula lwewinalo munumbula. 3Nyekelye hilo pe vanyalukolo avamwi pevafikite ipa, vakolelye ulwa uwuhuvilwa wako ulwa nachene; ena, veve uhele ukwikala mbepali mu wanachene. 4Sikokili kinu chekikunogela hilo ukulutila ukupulika ulwa avanangu vakwikala mu wanachene. 5Munyawende vangu, veve wimuhuvilwa mbepali peukuvapigila avanyalukolo, nambi vave avagenzi! 6Avanyalukolo iwo vakalilonje ilikanisa ipa ing'ani isa uwende wako. Ngukugongola uvatangage pevali mulugendo lwawo mung'asi iyikumunogela Nguluvi. 7Pakuva vivanga ulugendo lwawo mukumupigila Kilisito wesivakwanukila nambi uwutanzi uwewuvesaga ukuhuma kuvanu vesivafuuvitwi. 8Ino, hwehwe lutuvaje ukuvatanga avanu iva, sambi nayihwehwe tuhange mukipigo chawo ukwimila uwanachene. 9Ndivandiche lukani ku likanisa; neke Diyotelefe, yeaiwenda ukwilongolesa, sakwidikila ululagi lwangu. 10Ino, wone nzuse sa nzolelela mbesili seahele ipiga na ukundonga fibi. Na kangi sindahihyo ahele ibihila pakuvanukila ukwakwe avanyalukolo na kangi akuvakanila vala aviwenda ukuvanukila avagenzi ahele akuvadaga vahume mulikanisa. 11Munyawende vangu, ulonga wige imigendele imyaafu, pesi ulwa wigage iminofu. Yeyeavesaga ipiga inofu ye va Nguluvi, neke yeipiga uwaafu uyo sialamuwona Nguluvi. 12Yeyeavesaga munu akumusumila Demetiliyo; ena, uwanachene wuwene wukumusumila. Nahwehwe kangi twilonga uwolelesi wetu kulumwene, nave we ukulukagula ukuta twilongela mumwene. 13Pendinaso nzolofu isa ukukulongela, neke sindiwenda ukuvandikila mwikalatasi nu wino. 14Ndihuvye ukuvagendela ifilo fifi na ipo tutinasa pamwi na nyenye. 15Ngukusukila uwikalakunoga. Vanyawiyendi vako vakukuhungila. Kamwene kwa vanyawiyendi vetu mbevali umunu na ilitawa lyakwe.

will be added

X\