2 TIMOTI 4

1Ngukulagila pa Nguluvi, na pa Kilisito Yesu, yesaavahiga avanu awumi na avafwe, pakuva akusa ukutema we Mutwa: 2dalike ulo ulukani, kangalilage ukutagalisa ulukani (ulusika ulunoje na lwesilunoji), kalipilage, kenyelage, na sukanisage avanu na ukuvigisa mu wukangalisi mbewuli. 3Pakuva lukusa ulusika lwe avanu sisavapulikisa inzigiso isa nachene, pesi ukuta savafwata uwudobokesi wawo vavene na ukwilundikila avigisi wolofu vesavavalongela sisila hela se amapulikilo gawo giwenda ukupulika. 4Savabihila ukupulika isa nachene, neke savapitukila sa uwudesi. 5Neke, veve wikalage, miho mwa mbesili, kangalilage ineseko, pigage ikipigo cha uwudalisi wa Ulukani Ulunofu kwisage hilo ikipigo chako. 6Pakuva nene kulubali lwangu, sambi nditawulwa nambika na ulusika lwa ifwa yangu yelufikite. 7Ngave mupifu mulwitalaniso, yesinzile ulugendo mbeluli na ulufuuwo ngalugosise. 8Lino ulusige lwelula lwa ukupelwa uluhombo lwa ukudwesa ukwimila imigendele ja uwugolofu, uluhombo lwe umutwa Umuhisi va nachene, saameela nene ikimunyi icho, na kangi si yinene hela, pesi na vavala mbevali avilavisa muwende ukweleluka kwakwe. 9Wikangasage wangupe wuse kwa nene. 10Pakuva Dema akayendite ing'i iyi akandesile akwibitilaga ku Tesalonike. Kilesike akahele ku Galatiya na Tito akahele ku Dalumatiya. 11Luka, iyena hela yeakasige pamwi na nene ipa. Wusage na Maliko, pakuva ahwana ukunanga mukipigo changu. 12Neke Tikiko ngamutumile ku Efeso. 13Isopeka yangu yendayilesile kwa Kalipo kula ku Toloya; ndetelage pamwi na ifitabu na ing'ingo isa ukwandikila. 14Yula umuponzi va isaba yeitambulwa Alekisanda akamije nzolofu imbi, Umutwa saamupulikisa ukuling'ana na ifipigo fyakwe fyeapigite. 15Wikomalilage hilo nave, pakuva alubesise ulukani lwetu weakalipe. 16Ulusika lwendikanilige ulwa ukutala siepwali umunu yetwahelelise, mbevali vandesile. Nguluvi alavahiga uwananzi ukwimila ulo nda! 17Neke Umutwa eimile pamwi na nene neke peamele uludali, sambi kwa ifipigo fyangu ulukani ludalikwe kwa wukwilanifu, sambi avanu mbevali valupulike, kangi ndapokitwe wita mumulomo gwa inyalupala. 18Umutwa amoka mwambesili isa uwanangifu, andolela wunofu mbaka kuwutwa wakwe kuchanya. Kulumwene sivesage indolo mbepali na mbepali! Ena. 19Vahungilage Pilisika na Akila, pamwi na va mukaye ya Onesifolo. 20Elasito asige ku Kolindo, nave Tolofimo ndamulesile uko ku Mileto, pakuva emutamwa. 21Wikangasage wuse ikitungwi pesikilagwa. Ebulo, Pude, Lino na Kulawudio vakukuhungila na avanyalukolo avangi. 22Umutwa avesage na veve munumbula yako. Nguvasukila mbemuli uwuwuya.

will be added

X\