2 TIMOTI 1

1Nene Pawulo, ye Nguluvi awendite mbe mwigendo va Kilisito Yesu sambi ndivalongele wula uwumi we twetwivahuvise mu kuhanga na Kilisito Yesu, 2ngukwandikila veve ve mwanangu umwende Timoti: Ngukusukila uwuwuya, ulusungu na uwikalakunoga ukuhuma kwa Nguluvi Dada na Kilisito Yesu Umutwa vetu. 3Ngumulumba Nguluvi ye ndangumupigila kwa mutima mwelu ndawe lwevapigite avavaha vangu uluhuma pidaha, ngumulumba pembesaga nguviwuka mukwifunya kwangu pakilo na pamunyi. 4Ngwiwuka na inzihosi sako, ndidoboka hilo ukukuwona, pepene pemba memile uluhekelelo. 5Ngwiwuka ulufuuwo lwako lwa nachene, ulufuuwo lweeinalo upapo Loisi na kangi na yuyuwo Ewunike. Ngwihuvila ukuta na yiveve nave winalo. 6Nambi ngukwiwusa ukuta ukifungisage kila ikipelwa chewapelitwe na Nguluvi ulusika pendakugelekige amawoko gangu. 7Pakuva Umuhe yeatupelye Nguluvi siva muhwehwe, sindahihyo nda twapelitwe Umuhe va uludali, uwende na ichoga. 8Sweno, ulamuwonela inyoni ukumolelela Umutwa vetu, na ulawona nyoni pakuva nene ndili mundinde ukwimila umwene. Ulwene hangage muneseko ukwimila Ulukani Ulunofu, wigelela uludali lulula lwewipelwa na Nguluvi. 9Umwene atupokite, neke atukemele tuve vanu vakwe yumwene, si ukwimila uwugolofu wa ifipigo fyetu, pesi ukwimila lula lwealalamwe na uwuwuya wakwe. Atupelye uwuwuya wuwo ukwimila Kilisito Yesu pe umuvango gwesigulava gufika, 10lino yewugubuliwe kwa hwehwe, ukwimila ukusa kwakwe umupoki vetu, Yesu Kilisito, umwene apesise uludali lwa ifwa, ukukola Ulukani Ulunofu awuvikite uwumi pawelu wula uwutafwa. 11Nguluvi anyagwe nene mbe mwigendo na mwigisi ukwimila ukudalika Ulukani Ulunofu, 12nane nditeseka mwa isi mbesili ukwimila lulo. Neke ulwene pe ndina luhala lunofu hela pakuva ndimukagwe yula yendamufuuvitwe, kangi ngwihuvila hilo ukuta umwene ahwana ukukilolela wunofu kila cheamelye, mbaka pa kimunyi kicho. 13Winatilage inzigiso sila sa nachene, na ukwikala mwalulo ulufuuwo na mu wende wetu mukuhanga na Kilisito Yesu. 14Ulukani lula ulunyandolo lwewapelitwe kalalilage ukulolela muludali lwa Umuhe Umwelu yeali mugati umwetu. 15Ndawe lweukapulike, avanu mbevali va mulutanana lwa mu Asiya vakandesile, mwavawo valimumo va Figelo na Helimagene. 16Umutwa avadegepelage va mukaye ya Onesifolo; pakuva mbepali uyo ambuyapige, siamboneligi inyoni pakuva ndilimundinde, 17ave ifika hela ipa pa Lumi, swe ivanga ukumbusa mbaka peakumbona. 18Umutwa amusungukilage ikimunyi kila! Nave ukulukagula wunofu inzolofu seamije uko ku Efeso.

will be added

X\