2 AVATESALONIKE 3

1Pendidugulisa, vanyalukolo mutusukilage, sambi ulukani lwa Umutwa lwangufya ukutagalila na ukwanukilwa kwa ichoga ndawe we lwiwali kwa nyenye. 2Mwifunyage kangi sambi Nguluvi atupoke kuvanu avayasi na avanangifu, pakuva si mbevali vevakulufuuwa ulukani ulu. 3Neke Umutwa yevakwihuvilwa. Umwene avakangasa na ukuvagosa wunofu kwa yula umwanangifu. 4Nave Umutwa akutupela uluhuvi lukomi ukwimila nyenye, na sitwihuguvala ukuta mupiga na muva pemupiga sila setwavalonje. 5Umutwa alongosage inumbula senyu mu wende wa Nguluvi na mu wukangalisi we twipelwa na Kilisito. 6Vanyalukolo tukuvalagila mwitawa lya Umutwa vetu Yesu Kilisito ulwa mwilegage na avanyalukolo mbevali avagata na vesivakwinatila setukavalagise. 7Yinyenye vavene mukulukagula ulwa luvavaje ukwiga lwetwipiga hwehwe. Hwehwe petwe ukwenyu sitwavi vagata nambi. 8Na sitwalii ifilyo kulumunu yeyeavesaga we situmuhombiti. Twapigite ifipigo kwa wupifu nu kuguda pakilo na pamunyi sambi pakilo sambi tulemwe ukumufuna umunu yeyeavesaga ukwenyu. 9Twapigite ulo si ukuta si lwelunoje ukwanukila uwutanzi wenyu nda, pesi ukuta twawendite hela tuvapele chemwiga. 10Petwe ukwenyu, twavalongelige ukutigila, “Umunu yeyeavesaga yesiwenda ukupiga, alalya.” 11Twilonga isi pakuva twipulika ukuta kovali avanu avakwikalaga hela muwugata vipilimapilima wesivipiga kinu. 12Mwitawa lya Umutwa vetu Yesu Kilisito tukuvalagila nu kuvakenyela avanu iwo vavelage ni choga na vapigage ifipigo sambi vikwavile fyevagulwime. 13Neke nyenye vanyalukolo, mufulugala ukupiga inofu. 14Sa lulava ulwa uko kwina munu yesakwinatila ulukani ulu lwetukuvaletela mu balula iyi. Wone luve ndahihyo, mumuvikage pawelu umunu uyo na mulagela ukuhanga nave mwa lwelweluvesaga, sambi iwone inyoni. 15Neke nambi ndahihyo, mulamuvika ukumulava umunu uyo ave nda, mumwigisage wita munyalukolo. 16Umwene Umutwa ye kilamuko cha uwikalakunoga, avapelage uwikalakunoga mbepali na mwa mbesili. Umutwa avelage nanyenye mbemuli. 17Na iliwoko lyangu yinene ngwandika de: Kamwene nene Pawulo ndihungila! Ulu lwe ndangwandika ilitawa lyangu pendisindilisa ibalula. 18Tukuvasukila mbemuli uwuwuya wa Umutwa vetu Yesu Kilisito.

will be added

X\