2 AVATESALONIKE 2

1Lino isa ukusa kwakwe Umutwa vetu Yesu Kilisito na ukukong'aswa kwetu pamwi tumwanukila yumwene, nguvasuka vanyalukolo vangu, 2Mulasomeng'aswa mumahosa genyu apangi ukuhuguvala wone munumbula nambi mu lukani nambi mu balula iyitigilwa yikahumise kwa hwehwe ukuta ikimunyi cha Umutwa kikafikite. 3Mulidikila ukusangwa nu munu yeyeavesaga yula palweluvesaga. Pakuva ikimunyi icho sisachusa pesiwulawoneka uwanangifu wula uwukomi na yula umwanangifu umuvina peawonike ye Nguluvi saamwananga pamudugo. 4Umwene saabesa chekitigilwa Nguluvi nambi kinu cha kusunyalila, kangi saidudumba ukulutila mbefili na ukwingila mu Tembeli ya Nguluvi ikale mugati akwitigila ulwa umwene nave Nguluvi. 5Mbi, simukwiwuka ulwa ndavalonje siso mbesili pende ukwenyu? 6Lino pokili chekikumutanila, nanye mukukikagula ikinu icho. Ino, Ulusika ulumunoje umwanangifu uyo saawoneka. 7Nambi ndahihyo, umwanangifu uyo yesiwoneka pawelu ahele ipiga ikipigo na yilino, neke lino kila chekiwoneka sisakiwoneka mbaka yula ye akumutanila peyahesiwe. 8Ipo pepene pe umwanangifu pesaawoneka; neke Umutwa Yesu saamuwulaga. 9Uyo umwanangifu saasa nu ludali lwa Setani nu kupiga gwegweguvesaga mwitu na uwuhulo wa uwudesi, 10na ukukola uwudesi wewewuvesaga kwa vala vevasutime ku kuyaga. Iwo savayaga pakuva sivanuchi ukuwenda isa nachene sambi vapokwe. 11Nambi Nguluvi avavikite mu ludali lwa uwuyasi, vafuuwe uwudesi. 12Chekiwoneka mumo luva mbevali vesivifuuwa isa nachene, avihekelela inzanangifu, savahigwa. 13Lutuvaje tumulumbage Nguluvi mbepali ukwimila nyenye vanyalukolo, nyenye ye mwivende va Umutwa, pakuva Nguluvi avahagwe uluhuma pamwandi sambi mupokwe kwa uludali lwa Umuhe, sambi muwuyapwe vanu vakwe avelu mulufuuwo lwenyu ulwa nachene. 14Nguluvi avakemelelye mulukani ulu ukukola Ulukani Ulunofu lwetwavadaliche; avakemelye sambi mwanukile ililila lyenyu mu ndolo ya Umutwa vetu Yesu Kilisito. 15Ino, vanyalukolo, mwime munoge na mwinatilage sila imisimu gila jetwavigise petukuvalongela kwa mulomo apangi mu balula. 16Tukwifunya Kulumutwa vetu Yesu Kilisito yumwene na Nguluvi udadetu ye atwendite, na mu uwuwuya wakwe atupelye ulusikimiko lwa mbepali na mbepali na uluhuvi ulunofu, 17agisikimikage imitima jenyu nu kuvakangasa sambi muhwane mbepali ukupiga nu kulonga inofu.

will be added

X\