PETULO 2

1Vawonike avavisi ava uwudesi pagati nagati pa avanu, na lwindahihyo avigisi ava uwudesi savawoneka pagati nagati apenyu. Avanu iwo savigisa inzigiso isihahite na ukumubihila Umutwa yeavakombwe, na ukwimila lulo savasukanisa ukwiyambusa sambi vasile. 2Kangi avanu wolofu viiga imigendele gijo imyaafu, vakuvambusa vavene, avangi savabedala ing'asi iya uwanachene. 3Ukukola uwudobokesi wawo uwubi vakwavila uwunono ukwimila ukuvalongela isimo isa uwudesi, uluhuma pidaha uluhigilo lwawo pololi na lwisindila! 4Avanyivaha vavelige vipiga inzanangifu, Nguluvi savawonii ulusungu, pesi avasopite ku moto gwa ku Gehena kula kwevapinge visindila ikimunyi kila icha uluhigilo. 5Nguluvi siayiwonii ulusungu ing'i iya pidaha, pesi alaje ing'uka ingomi yuse mung'i yila iya avanu avagayi choga kwa Nguluvi; neke Noha ye awudalike uwugolofu, Nguluvi amupokite pamwi na avanu avangi avimufung'ati. 6Nguluvi ayihigite iboma iya ku Sodoma na ku Gomola, ayilalise na umoto, akusiwuyapa sivelage cholelesi cha ing'ani isikusa ukuvafika avanu agayi choga kwa Nguluvi. 7Amupokite Luti, umunu munofu, ye avifisiwe pakomi na imigendele imyaafu ija avanu avayasi. 8Luti ikalige pagatinagati pa avanu vawo, na ifilo fyolofu inumbula yakwe yahuguvalige pakomi peyeapulike isa ifipigo fyawo ifyaafu. 9Sweno, Umutwa alukagwe lwe avapoka uluhuma mukugelwa avanu avanyachoga kwa Nguluvi, na lula lweavavika avanangifu vapumage mbaka ku ikimunyi kila icha uluhigilo, 10na hilo vala vevakwiga uwudobokesi uwubi uwa imivili na ukubedala ululagi. Avanu iwo vagaya choga kangi vanyalwitupyo; vakufiliga na ukufibedala ifigawa ifinyandolo ifya kuchanya. 11Neke avanyivaha, vala vevina ululagi na uludali ukulutila vawo avigisi ava uwudesi, sivakufisongela nambi ukufiliga ifyo pa Nguluvi. 12Avanu iwo veviligaga chechekivesaga kila chesivakiseli, vindawe ifikoko ifigaya uluhala, fyefyakwegalwa na pambele vakufibata vidumula! Savasindwa ukwimila uwanangifu wawo vavene, 13na savahombwa ineseko ukwimila ineseko sevakambwise. Uluhekelelo lwawo kwekupiga chechekivesaga chekikwisa isa uwudobokesi uwa imivili jawo, kangi upigila siso mukimunyi hela. Avanu avindahihyo vileta uwuhonganyoni pevikong'ana na nyenye mumbungo senyu mufingi ifikomi, kono we uhekelela imigendele jawo ija uwuyasi. 14Amiho gawo gamemile uwugoni na uwutiganu wawo ukupiga inzanangifu wugaya wudugo. Vakuvakwegelesa avanu vesivasikimafu mulufuuwo, avana vanyaluleko. 15Vakayilesile ing'ani ingolofu, vakayasile na ukwiga ing'asi yeafwatite Balamu, umwana va Beoli, ye awendite apelwe ukwambula ikola uwudesi, 16swe ikenyelwa ukwimila uwanangifu wakwe. Idogovi inyakibubwi yalonzile, yidogofya uwugulufu wa umuvisi. 17Avanu iwo wita imifwilo igikasile, wita amafufu agipugwa na ikifulufumbi; uwikalo wawo wevagelanisiwe pepala apono panyalwisa ulukomi. 18Vilongaga ing'ani isalwitupyo na isa uwupuva, na ukukola uwudobokesi wawo uwaafu uwa imivili ukuvagwilisa vala vevakilegite ifilo fya pipi uluhuma kuvanu avakwikala muwanangifu. 19Vakuvahuvisa avanu avangi ukutigila vava vatemapawo, kumbi avene we vanyawingi va uwuyasi, pakuva umunu aiva munyawingi wa chechekivesaga chekimuvika muwutema wacho. 20Avanu vevakasupatwike uluhuma muwuyasi wa umu mung'i peyevamukagwe Umutwa na Umupoki vetu Yesu Kilisito, neke wone vidikile ukwibatika na ukusagilwa kangi na uwuyasi wuwo, iwo vakwanangika wuhulo ukulutila ulwa pamwandi. 21Luke luva iikiba kwa avene wone vevalemwe ukuyikagula ing'asi iya uwugolofu sindawe ukuyikagula na kangi ukuyileka na ukuluyasa ululagi ulwelu lwevanuchee. 22Poluli ululongwa ulwitigilaga! “Imbwa ya yakugapilukila amadeesi gayo yiyene.” na ulungi ulwitigilaga: “Ingubi inzofuge yakwigalangasa mulidope kangi!” lwelwiwali kw avene lino.

will be added

X\