PETULO 1

1Simoni Petulo, umukami na umwigendo va Yesu Kilisito. Kwa nyenye mbemuli yemukanuche ulufuuwo ululing'ene na ulwa hwehwe muwugolofu uwa Nguluvi vetu na umupoki Yesu Kilisito. 2Ukuta uwuwuya na uwikalakunoga wongelekelage kwa nyenye mukumukagula Nguluvi na Yesu Umutwa vetu. 3Ukukola uludali lwakwe lwa ukuva Nguluvi, Nguluvi akatupelye mbesili setwiguluma, sambi twikale mumikalile iginya choga kwa Nguluvi mukumukagula umwene yeatukemelye tuhange indolo na uwunofu wakwe yumwene. 4Mwalulo yeatupelye ifipelwa ifikomi na ifigusiwaga amagobole molofu fyealatuhuvise, sambi ukukola ifipelwa fifyo muhwane ukwilega pataali na uwudobokesi uwubi uwuli mung'i, na muhwane ukuhanga muwunu wakwe wa ukuva Nguluvi. 5Nambi ukwimila lulo, musugunalage na ukuwila uwunofu mulufuuwo lwenyu, muwilage uwukagusi muwunofu wenyu, 6na ukwitanila muwukagusi wenyu, ulwikangaliso mukwitanila kuko, ichoga kwa Nguluvi mulwikangaliso lwenyu, 7muchoga chenyu mukangasage uwunyalukolo, na uwende na uwunyalukolo wenyu. 8Mwiva na ululumbo mbeluli ulo muwolofu, luvatanga ukuva vapisi avapifu na mwambula mukumukagula Umutwa vetu Yesu Kilisito. 9Neke umunu yeagayite iso uyo mubofu, sahwana ukulava, na yeasemilwe ukuta yeakesiwe inzanangifu sakwe indovela. 10Sweno, vanyalukolo vangu, musugunalage hilo ukuluwuyapa ulo ulukemelo lwenyu lwemwakemelilwe na Nguluvi luvelage lukani lwembepali luli muwunani wenyu; wone mugendele lulo sisamugwa nangi. 11Mwalulo pemuhwana ukupelwa uwugolofu uwukwilaniche ukwingila muwutwa uwa mbepali wa Umutwa na Umupoki vetu Yesu Kilisito. 12Kangi nginaga ukuviwusa mbepali ing'ani isi, nambi we yemusikagwe, na mukange muwanachene wemwawanuche. 13Nditigila ulu lukani lugolofu kwa nene, ulusika mbeluli lwembesaga ndinana ipa pa ing'i, ukuvakangasa imitima na ukuviwusa ulwa ing'ani isi. 14Ngulukagula ukuta yesambi tukwileka na umuvili ugu ugunya kufwa, ndawe Umutwa lweandonje wima hela. 15Lino, ngihaga ukuvasakila ifipeto ifya ukuviwusisa ing'ani isi peluvesaga lusika, pemba yefwe. 16Petwavigisige ulwa ukusa kwakwe ukunyandolo Umutwa vetu Yesu Kilisito, sitwakweti isimo hela isa malanga ingaya kinu. Hwehwe twayiwene indolo yakwe mumiho getu yihwehwe. 17Hwehwe twetwipwali peapeligwe ululumbo na indolo na Nguluvi Dada, ulusika pelyapulise iliswi ukuhuma kulumwene ye umwene ye Ndolo Ingomi, litigila; “Uyu ye Mwanangu Umwende, yendinogelwa nave.” 18Kangi, yehwehwe yetwapulike iliswi lilyo ukuhuma kuchanya ulusika petwepamwi nave pala pa kidunda ichelu. 19Kangi, ulukani lwa avavisi vatulonje vikangasa ulukani lwiva nda lung'ali ulwing'alika apono panyalwisa mbaka kukimunyi kikila pesa kwidandaluka na ulung'ali lwa ing'eng'esi inenawufuku pesaying'alika munumbula senyu. 20Ukulutila kwa siso, neke ulwene, mwiwukage ukuta sikwali umunu yeyeavesaga yeahwanite aganule yumwene uwuvisi we wuli muwandike Uwelu. 21Pakuva sikololi ulukani lwa uwuvisi ulwihumaga muwende wa avanu, pesi avanu valonzile ulukani lwa Nguluvi visogoswa na Umuhe Umwelu.

will be added

X\