2 AVAKOLINDO 7

1Sweno, Vanyawende vangu, kono we twivapele inyuviso isi mbesili, twiyeesage mwa mbesili sesihwanite ukutifusa imivili na inumbula setu, sambi tuve tweesile hilo, na twikalage we tukumogopa Nguluvi. 2Tukuvasuka mutwanukilage wunofu mu numbula senyu! Pakuva situkamwananje umunu yeyeavesaga, situkamutesisi nambi ukumusanga yeyeavesaga. 3Sindilonga ing'ani isi sambi ndimuhige munu, pakuva, ndawe lwengengalonzile, nyenye muli mugati munumbula setu, tufwisasage pamwinga, tunanage pamwinga. 4Nguvihuvila pakomi, pendilonga nanye; ngwipulika hilo ukwimila nyenye! Mu kuguda kwetu mbekuli pemelwa ikinyakusikimika kikomi na ukuhekelela pakomi. 5Nape yetufikite ku Madedoniya twalemilwe nambi ukusuupa. Imbali mbesili twetwivabane na ukuguda; kwivala lwitakilo; mugati muhwehwe. 6Neke Nguluvi, umunyakuvapela avahomefu ilihomelo, atusikimike umutima hwehwe kwa ukusa kwakwe Tito. 7Si kula hela ukusa kwakwe Tito, pesi kangi pakuva nyenye mukamusikimike. Umwene atulonje lula lwe mwidoboka ukumbona, na lwe muhuguve mwiwenda ukunanga mu nalamu. Ulukani ulo lwelwileka ndihekelela ukulutila. 8Pakuva, nambi ibalula yangu yila yikavahuguvike, ndimugaya ulukani ulwa ukuleka nene lumbave munumbula. (nambi we lwambafile) Ena, ndiwona ulwa ibalula iyo lukavahuguvike neke kwa lusika ludodo. 9Lino ndihekelela, si pakuva muhuguve, pesi ukuta kwa ukuhuguvala kwekukavawuyipe mupituke na ukuhongesa ulwa amahosa genyu. Mukahuguve mumigosekese imivike na Nguluvi, na kwa ulo hwehwe situkavananji nyenye kwa lwelweluvesaga. 10Ukuhuguvala ukwihumaga kwa Nguluvi, kwiletaga ulupifuko inumbula, ulupituko lwiletaga uwupoki; palulo sikololi ulwa ukuleka nyenye luvavave. Neke ukuhuguvala ulwa mung'i kwakwiletaga ifwa. 11Lino muhwanite mwilavile amaveleko agihuma mukuhuguvala kwe aiwenda Nguluvi; kulino ye muve vanu avapifu, mukwilagila ulwa mugaya chemwananzile, mulilakali mu kukabuswa nu muhwehwe, na mukudoboka ukupiga inofu, mukumogopa Nguluvi, kono mwigelanise mbepali ukwihoma na mbesili isa uwananzi. Muwonike ulwa mwivagaya nambi lukani lwelweluvesaga ulwa wananzi. 12Nambi ndavandiche ibalula yila, siye nzandike ukwimila yula ye ananzile, apangi si kwa yula yee mwanangile. Nene nzandike sambi luwoneke pelu pa Nguluvi lula lwe nyenye muve mwivapifu ukwimila hwehwe. 13Nambi hwehwe ulo lwatunoje ukulutila. Si ukutigila lwatunojee hela, kangi Tito atunojee kwa uluhekelelo lweeinalo lwe nyenye mukamupelye munumbula yakwe. 14Nene ndivalumbite hilo nyenye pa umwene, na kwa ulo nene sindisangwa. Tukave mbepali tukuvalongela ulwa nachene, na kula ukuvalumba nyenye pa Tito lukave lukani ulwa nachene hilo. 15Nambi uwende wakwe uwa munumbula kwa nyenye ukongelekela ukulutila peakwiwuka lwe nyenye mbemuli mwiyidikise ukuva vanyachoga, na lwe mukamwanuche kwa ichoga nu kukuvila. 16Ndihekelela hilo ulwa kulino ngwihuvila pakomi mwa nyenye.

will be added

X\