2 AVAKOLINDO 6 - Kihehe - 1999 Edition - Bible.is - HEHBST

No Text for selected version, book, and chapter

  1  Sweno, petwiva vanyakupiga pamwinga na Nguluvi, tukuvagongola ulwa mulidikila ukwanukila wula uwuwuya uwihuma kwa Nguluvi wuyage chaka.   2  Pakuva itigila de, “Ulusika ulufulwike, ngakupulikise, ulusika lwa uwupoki ngakutanzile.” Sweno lino ulu lwe lusika ulufulwike, lino de che kimunyi cha uwupoki!   3  Sambi ukupiga kwetu kulemwe ukulongwa fibi na umunu yeyeavesaga, sitwiwenda ukumuvikila yeyeavesaga ikikuvaso chechekivesaga.   4  Uluyalo na ulo, hwehwe tukwilagila ulwa twivakami va nachene va Nguluvi mwa mbefili; mu kukangalila ulusika lwa ineseko, mu wubane na mu ludugo.   5  Tutofilwe, tusopitwe mundinde nu kuyoveleswa mu lung'anavala; tupigite ifipigo mbaka tufulugale, tukavasise miho ikilo mbekili we sitwilya kinu.   6  Tukwilagila ulwa twivakami va Nguluvi mu munumbula inzelu, muwimbi, mu kukangalila na mu wunofu; ukwimila Umuhe Umwelu, mu wende uwugaya uwubuganisi,   7  kwa ulukani ulwa nachene na muludali lwa Nguluvi. Uwugolofu lye lihomelo lyetu ilya ulubali lwa kundyo na ulubali lwa kung'igi.   8  Mu ululumbo na ukuhongelwa inyoni, ukulongwa fibi na ukusumilwa. Twipigilwa nda fing'omong'omo, kumbi twivanachene,   9  Nda vesivakagulaniki, kumbi tukagulanike kwa mbevali; wita wanda vevafwe neke ndawe lwemukutuwona, hwehwe twiwumi hilo.   10  Nambi tukapumiswe, situkafwi; nambi wetwivahuguvafu ulwene twihekelela mbepali; nambi we twivamikaa tuhele twinoniya avanu wolofu; twiwoneka wita avanu avagaya kinu chechekivesaga, kumbi twinafyo mbefili.   11  Nye vanyalukolo vetu Avakolindo, tulonzile nanye wima hela, inumbula setu seesile hilo.   12  Wone mwiwona ulwa pokili ikikuvaso chechekivesaga kila, apo icho kiva kwa yinyenye hela, si kwa ulubali lwa hwehwe nda.   13  Lino ndilonga nanyenye nda mwivana, mweesage inumbula senyu ndawe lwe tupigite hwehwe.   14  Mulemwage ukwihwana na avanu vesivafuuvitwi. Mbi, uwunofu na uwanangifu fyakwiyidikisa nachene? Ulung'ali na ulwisa fihwana ukwikalasa?   15  Mbi, Kilisito ahwana wuli ukwiyidikisa na setani? Yafuuvitwe ina uwulilumwi uwindawuli na yesafuuvitwi?   16  Itembeli ya Nguluvi yina uwulilumwi uwindawuli na ifihwananguluvi? Pakuva hwehwe twi tembeli ya Nguluvi umumi. Ndawe Nguluvi yumwene lwalonzile: “Sandikala nawo, na ukugendasa nawo, samba Nguluvi vawo, nawo savava vanu vangu.”   17  Sweno Umutwa ilonga kangi, “Muhegage apawo, mukilege nawo, mulapamisa ikinu ikihongawinya, nani ndivanukila.   18  Nani samba ndi Dadenyu, nanye samuva mwivanangu, avahinza na avakwamisi. Ilonga Umutwa Umunyaludali.”