1 Pakuva ikitinga chetu chetukwikala mung'i, chanangitwe, twinayo ikaye iyihuma kwa Nguluvi, yesinzenge kwa mawoko, iya mbepali kuchanya. 2 Neke kulino, mung'i umu twivawa kono we twidoboka hilo, tufwikwe uwikalo wetu we wuli kuchanya. 3 Ena, luvaje tufwikwe ndahihyo sambi satuleke ukuwoneka pa Nguluvi twiwufula. 4 Petwiva tukaali mulihema ili mung'i, twivemba twivabane; si ukutigila twisaka ukuguhesa umuvili ugu ugunya kufwa, pesi ukuta twidoboka ukufwikwa umuvili gwesigwifwisagi, sambi kila ikinyakufwa kidadilile ng'ani na uwumi. 5 Nguluvi umwene yatuviche ukupituka uko, nave atupelye Umuhe vakwe ave kipingiko cha mbesili seatuvichee. 6 Twivakangafu ulusika mbeluli, tukulukagula ulwa ukwilegeha kwikala mumuvili twiva pataali na Umutwa. 7 Pakuva tukwikala kwa ulufuuwo, si kwa ukulava. 8 Neke twivakangafu na tuketwiwenda ukuhama mu wikalo uwu, tuhamile kulu Mutwa. 9 Neke ulukani ulunofu ululutye hilo, twiwenda ukupiga isikumunogela, nambi tuvelage petwikala umu mung'i nambi kuko. 10 Pakuva mbetuli satwima pa kigoda cha pawuhigilo cha Kilisito, sambi yeyeavesaga mwa hwehwe saanukila amahombo agategine na ifipigo fyapigige ulusika lwa uwumi wakwe mung'i, inofu apangi imbi. 11 Sweno, hwehwe tukulukagula ulwileka tumogope Umutwa, nambi kwa lulo hwehwe twiva twivapifu ukuvakwega avangi. Nguluvi nave atukagwe hilo, nani ndihuvye ulwa nanyinyenye mulukagwe hilo. 12 Si ukutigila wanda hwehwe twisaka ukwiyendelesa kwa nyenye, neke twigela kangi ukuvalagila nyenye isileka hwehwe twilumbe ukwimila nyenye, sambi muve na ulwa ukuvapitula vala vevakwilumbila isa mwivala hela ukulutila lula ulwene lweviwali munumbula. 13 Wone lukawonike ulwa tugulwike, ulo luva ukwimila Nguluvi; na wone kangi twina uluhala lunofu hela, ulo luvelage kwa ukwambula kwenyu. 14 Pakuva uwende wa Kilisito wukutusogosa hwehwe yetukulukagula ulwa umunu yumwi hela yeafwe ukwimila mbevali, na ulo kwekutigila mbevali vihanga mufwa yakwe. 15 Afwe ukwimila avanu mbevali, sambi mbevali awumi valemwe ukwikala ukwimila uwumi wawo vavene, pesi kwa ukwimila umwene yafwe, kangi asilibwike ukwimila vavene. 16 Sweno, uluhuma lino, hwehwe situkumugela umunu yeyeavesaga kwa ikigelo cha avanu. Nambi ulusika ulungi twamugelite Kilisito kwa ikigelo cha avanu, lino silwindahihyo kangi nda. 17 Umunu yeyeavesaga peahangite na Kilisito aiva kigawa kipya, isa pidaha yesilutye, lavage imya susile. 18 Mbesili isi che kipigo cha Nguluvi umunya kutulamula hwehwe nave, ukwimila Kilisito, swe akutupela nahwe ulwa ukuvalongela avangi vilamule nave. 19 Pede kwekutigila: Nguluvi, akave akwilamula na ing'i ukwimila Kilisito, wesakwinatila ulwa inzanangifu sa avanu. Umwene akatupelye ulukani ulwa ukuvalamula avanu na Nguluvi. 20 Sweno, hwehwe twivatume na Kilisito, nave Nguluvi umwene ikola mwa hwehwe ukuvagongola nyenye. Sweno, tukuvagongola ukwimila Kilisito, mwilamulage na Nguluvi. 21 Kilisito ali mugaya nzanangifu, neke Nguluvi amuwuyipe ingile mu nzanangifu ukwimila hwehwe, sambi kwa ukuhanga nave, tupelwe uwugolofu wakwe Nguluvi.
Copyright © 1999 The Bible Society of Tanzania; ℗ 2010 Hosanna