2 AVAKOLINDO 4

1Sweno, Nguluvi kwa ulusungu lwakwe ulukomi, atupelye ikipigo iki nambi nahwe sitwifulugala. 2Nahwe tukasileche ng'ani mbesili inyonga nyoni na isa ikinyele. Twikana ukupiga sila isa wulyalya nambi ukuluhesigila ulukani lwa Nguluvi, nambi twilonga pawelu ulwanachene sambi mbevali vatukagule ulwa twilonga hilo pa Nguluvi. 3pakuva, wone Ulukani Ulunofu lwetwidalika lufihime, lufihime hela kwa vala veviyaga. 4Lino iwo sivifuuwa pakuva yula nguluvi va mung'i avapufise uluhala lwawo sambi valemwe ukuluwona ulung'ali lwa Ulukani Ulunofu lwa indolo sa Kilisito, yula ye lwihwano lwa Nguluvi. 5Pakuva hwehwe situkwidalika yihwehwe, pesi Kilisito Yesu yula Umutwa, neke hwehwe twiva twivakami venyu ukwimila Kilisito. 6Nguluvi yagafile itigila, “Ulung'ali lung'alikage uluhuma mulwisa,” yeyula yeing'alika inumbula setu, nu kutupela ulung'ali lwa ukusikagula ing'ani isa indolo sa Nguluvi sesikutung'alikila uluhuma muwusu wa Kilisito. 7Sweno, hwehwe yetwina ifisande fya Umuhe, twindawe ifinu ifigade, sambi luwoneke pelu ukuta uludali ulo ulukomi lwihuma kwa Nguluvi si kwa hwehwe nda. 8Mbepali twiguda, neke sitwifwila ng'ani, twihuguvala neke sitwifulugalila ng'ani; 9twiteseka, neke sitwigaya uwutanzi nambi twivagwise pasi, sitwiwulagilwa ng'ani. 10Mbepali tukave we tutegwe ifwa ya Kilisito mumivili jetu, sambi uwumi wakwe Kilisito wuwoneke mumivili jetu. 11Ena, muwumi wetu mbepali tulaving'ine ni fwa ukwimila Yesu, sambi uwumi wakwe Yesu wuwoneke mumivili jetu iginya kufwa. 12Ulu kwe kutigila mugati mwa hwehwe ifwa yipiga ikipigo, neke mugati mwanyenye uwumi wewipiga ikipigo. 13Uwandike Uwelu witigila, “Ndafuuvitwe nambi ndalonzile.” Nayihwehwe kangi twina numbula yiyo ya ulufuuwo. Twifuuwa, nambi nahwe twilonga. 14Tukulukagula ulwa yula yeamusilibwe Umutwa Yesu alatusilibula na yihwehwe nahwe pamwi na Yesu na kutuvika palumwene pamwi na yinyenye. 15Mbesili isi sikwimila kwa ukwambula kwenyu, sambi luve ndawe uwuwuya wa Nguluvi wukuvafikila avanu wolofu hilo na hilo, sambi iwo valumbe hilo indolo sa Nguluvi. 16Nambi kwa ulo sitwidedela; nambi uwugave wetu wa kwivala wisakala, neke mugati mwahwehwe twiwuyapwa vapya pepekukisaga. 17Ukuguda kwetwiguda kudodo na kwa lusika ludodo hela; neke kukutupela indolo isilutye na amahosa mbegali, indolo ingaya wudugo. 18Palulo twilavisa si wita ifinu fyefiwoneka, pesi fila fyesifiwoneka. Pakuva fyefiwoneka ifyo fya lusika ludodo hela; neke fila fyesifiwoneka ifyo fya uwutasila.

will be added

X\