2 AVAKOLINDO 1

1Ukuhuma kwa Pawulo, umwigendo va Kilisito Yesu kwa uwende wa Nguluvi, na ukuhuma kwa munyalukolo vetu Timoti, tukuvandikila nyenye mwe likanisa lya Nguluvi uko ku Kolindo, na avanu mbevali va Nuguluvi pepepavesaga mu Akaya. 2Tukuvasukila uwuwuya na uwikalakunoga uluhuma kwa Nguluvi udadetu na Umutwa Yesu Kilisito. 3Alumbwagwe Nguluvi na Dada va Umutwa vetu Yesu Kilisito, Dada munyalusungu na kangi Nguluvi mulunyamaso mbeluli. 4Umwene akutunyamasa hwehwe mulugudo lwetu mbeluli, sambi nahwe tuvanyamase avangi muludugo lwawo, kwa ulunyamaso lulula lwetukwanukila uluhuma kwa Nguluvi. 5Ena, peluva lwigina uluteseko lwa Kilisito mugati mwetu, na ndahihyo petwigina ukunyamasiwa nave. 6Wone tuve twiguda, sweno lwiva kwa ulunyamaso na uwupoki wenyu. Na kangi petunyamasiwe, lwiva kwa ukwimila ukuvanyamasa nyenye na ukuvatanga muve na uludali lwa ukwikangasa muneseko sisila setwiteseka hwehwe. 7Kangi, uluhuvi lwetwinalo kwa nyenye lukangafu; tukulukagula ulwa pemuhanzile muneseko setu, muhanga kangi na mu lunyamaso lwetu. 8Nye vanyalukolo vetu, hwehwe twiwenda ukuvalongela ulwa ukuguda kwetukagudite kula ku Asiya; ukuguda uko kuke kukomi hilo, na uluhuvi mbeluli lukagayite ulwa tuva petwi wumi kangi. 9Ena, tuke tukave witigila avanu avahige ukufwa, sambi twigisiwe ukumwihuvila Nguluvi yeaisilibula avafwe, tulihuvila uludali lwetu yihwehwe. 10Umwene atupokite mu lutalamu ulwa ifwa kangi atupoka hwehwe na yihwehwe tuvisile uluhuvi lwetu mulumwene ulwa saatupoka kangi, 11nyenye kangi ututangage ukukola ukutwifunyila hwehwe, sambi avanu wolofu valumbe pa hwehwe uwufunyilile wetwapelitwe lwiva lupitulo lwa inzifunyo nzolofu. 12Hwehwe tukwivahila kinu kimwi hela: ulwa inumbula setu sikutolelela ulwa twikalite mono ing'i iyi, na tutigile hilo ipa pa nyenye, kwa uwilevesi na uwugolofu wetwapelitwe na Nguluvi; sitwasogosiwi na uluhala lwa avanu pesi kwa uwuwuya wa Nguluvi. 13Nambi tukuvandikila Ing'ani semuhwanite mwimbe na ukusikagula. Nahwe twihuvye ulwa musikagula wunofu hilo, 14Pakuva mbaka kulino de mung'agwe padodo hela. Ndihuvye ulwa pambele pemutukagulila ng'ani pa ikimunyi kila cha Umutwa Yesu, pesamuhwana ukwilumba ukwimila hwehwe, ndawe hwehwe lwe tukwilumba ukwimila nyenye. 15Sweno, ukwimila uluhuvi lulo, ndahosige nale ukusa ukwenyu, sambi mwanukile uwuwuya kavili. 16Ndahosige ukugendela ukwenyu pendibita ku Makedoniya kangi, na pendipiluka, sambi nanye munange mulugendo lwangu pendibita ku Yudaya. 17Mbi, mwitigila pende nyosise ulo ngali mba ndimugaya kisiko? Mbi, mwitigila ndilamula ifinu ukwimila amahosa ga avanu na ukuta nywanite nigile “Ena” na baho kangi nigile “Nda?” 18Nguluvi ye va nachene hilo; sweno, kila chetwavalonje nyenye si lukani lwa “Ena” na “Nda.” 19Pakuva Kilisito Yesu, Mwana va Nguluvi, nene, Silwano na Timoti yetwamudalike kwa nyenye, siee munu va “Ena” na “Nda” neke kulumwene mbepali aliye “Ena” ya Nguluvi. 20Pakuva mulumwene inyuviso mbesili sa Nguluvi sikave “Ena, Nambi kwa lulo “Ena” yetu yilongwa ukwimila umwene, ukumupela indolo Nguluvi. 21Neke Nguluvi yumwene yakutukangasa hwehwe na nyenye kangi mung'asi ya Kilisito, na ye mwene yatubasile amafuta, 22na ye mwene yeatutemite uluhagi sambi tuve uwunono wakwe yumwene na ukutupela Umuhe munumbula setu sambi ave kipingiko kwa mbesili seatuviche. 23Na Nguluvi ye molelesi vangu, umwene yayisele inumbula yangu! Nene sindasili kangi ku Kolindo ati ukwimila kuvawonela ulusungu. 24Sitwiwenda ukuvakangala mu lufuuwo lwenyu; nyenye mukakange mulufuuwo lwenyu. Ulwisakwa kwa nyenye, lwe lwa ukuhanga ukupiga ikipigo pamwi na hwehwe, ukwimila uluhekelelo lwenyu.

will be added

X\