1 TIMOTI 6

1Avanyawingi mbevali luvavaje vavelage na ichoga kwa avavina vawo sambi pave pagaya lukani ulukwambusa ukuligwa ilitawa lya Nguluvi na inzigiso setu. 2Avanyawingi ve avavina vawo Vakilisito valemwage ukuvabedala pakuva iwo vanyalukolo vawo. Ulungi na lulo luvavaje vavapigilage wunofu na ukulutisa, pakuva iwo vevakwambula ukuhuma mufipigo fyawo ve vanyalufuuwo vevavenda. Lukuvaje ukwigisa ing'ani na ukudalika isi. 3Umunu yeyeavesaga yeakwigisa isisutine na ing'ani isi na yesakwidikila ing'ani sa nachene sa Umutwa vetu Yesu Kilisito na inzigiso, isa ulufuuwo, 4uyo amemile kidada na sikokili cheakisele. Ye munu yeaiwenda ulwiyendo na ulwitakilo mung'ani isa malanga hela, na lulo lwakwambusa uwifu, lwitakilo, maligo, na ukuvahosekesa avanu imbi, 5na ulubesa lwesilwidugagi ukuhuma ku vanu ve uluhala lwawo lufuvangike na vala ve vagayite inachene. Avihosa ukuta ulufuuwo ye ng'asi ya ukwikwavila uwunono. 6Ena, nachene lufuuwo lwalwileta uwunono wukomi kulumunu, wone isikimala na ifinu fyeinafyo. 7Pakuva sitwaletiti kinu chechekivesaga ponivala, na kangi sisatutegula nambi kinu ukuhuma mung'i, 8Sweno wone twinafyo ifilyo na imyenda lutuvaje ukusikimala na fifyo. 9Neke vala veviwenda ukuva vanono, vavigwila mukugelwa, na ukwibatika mulutego lwa uwudobokesi uwubi wa kipuva sesakuvakwegela kuwanangifu. 10Pakuva uwudobokesi wa amagobole lye lisina lya inzanangifu mbesili, ukwimila mwalulo vakahele vakibumangila pataali na ulufuuwo nawo vakasitesise inumbula sawo na uwuvafi wolofu. 11Neke veve,vemunu va Nguluvi, wilegage mwa siso, winatilage uwugolofu, ichoga kwa Nguluvi, Ulufuuwo, Uwende, uwusindile, na uwilevesi. 12Dadambale wunofu muligalu ilya ulufuuwo, wibatilile uwumi wa mbepali wewakemelitwe, ulusika lwewalwidikilige ulufuuwo pa wolelesi wa awolofu. 13Ngukulagisa pa Nguluvi yeakufivika ifinu mbefili muwumi, pa Kilisito Yesu yeolelelye na ukwidikila inachene pa Pondyo Pilato, 14ngukulagila winatilage uwulagise wako na ukwinatila wunofu mbaka ikimunyi kila chesaelelukila Umutwa vetu Yesu Kilisito. 15Ukweleluka kwakwe sakuwoneka mukimunyi ikihwanite ikikele na yumwene Nguluvi, umufunyilile, Umutwa va avatwa, Umuvina va avavina. 16Umwene ye iyena hela ainana kitasila, mulung'ali lwesiluhwanite munu alaving'ane nalo. Asukuli umunu ye amuwene na yeahwana ukumuwona. Kulumwene luvelage lulumbo na uludali ulutasila! Ena. 17Uvalagisage avanono mumikalile ja neng'ino validusa, na ulwa valihuvila uwunono wesiwinanagi, pesi ukuta vamuhuvilage Nguluvi, ye ukwimila wudeke wakwe akutupela ifinu mbefili fitunogele. 18Valagilage vapigage ifinofu, vave vanono kwa ukupiga ifinofu, vavelage vadeke ukutawula ifinu fyawo kwa avanu vangi. 19Ukwimila lulo, vivikila ikisande cha uwunono chekiva lutu ulukwilaniche ulusika ulukusa. Ipo pesavanukila uwumi wula uwutasila uwa nachene. 20Veve Timoti, lolele wunofu mbesili sila sewapelitwe. Wikwegage mulubesa lwa umu mung'i ulubesa lwa uwupuva ukwimila kila che avangi vakukitigila, “Uwimbi.” 21Pakuva avangi vakivahite ukuta vimbite, chekiwoneka mumo kwe ukufuvanga ulufuuwo. Nguvasukila mbemuli uwuwuya!

will be added

X\