1 TIMOTI 4

1Lino Umuhe ahele ilonga pawelu hela ukuta pamudugo avangi savaluleka ulufuuwo; vakugipulikisa imyuhe ja uwuyasi akwinatila inzigiso sa amasoka. 2Inzigiso isindawe iso, sihele sitagaliswa na avanu avadesi kangi vasanga vanu, ve imitima jawo giva nda minyanye na ichuma ikipyo. 3Avanu iwo vakwigisa na ukuvakanila ukuta valitegula na kangi ukuta valalya ifinu ifingi de. Neke ulwene Nguluvi agafile ifilyo ifyo, sambi vala avafuuvitwe na vala avakuyikagula inachene valisage we vilumba. 4Chechekivesaga kinu ikigave na Nguluvi kinofu, na sikokili ikivaje ukubihilwa, pesi ukuta mbefili fyanukilwage mu lwifunyo na ikilumbo, 5pakuva ulukani lwa Nguluvi na ulwifunyo lwiwuyapaga ikinu icho kidikilwe na Nguluvi. 6Wone uvapele vanyalukolo mbevali uwulagise uwu, apo uva mukami munofu va Kilisito Yesu, kono wukwiyongelesa mu isa Umuhe mung'ani isa ulufuuwo na inzigiso sa nachene, sila se veve ukave ukwinatila. 7Neke veve usilekage isimo sa ulufuuwo ulugaya kinu. Wisovelesage ukwikala mumigendele iginyachoga kwa Nguluvi. 8Pakuva ukwisovelesa isa umuvili kwiletaga ulugilimati kwayo, neke ukwisovelesa isa Umuhe uko kwiletaga ukwambula ukukwilaniche hilo mwa mbesili, uko kwakutuletela ukwambula uwumi wa yilino kangi na wula uwutasila. 9Ululongwa ulu luhwanite ukwidikilwa na ukulufuuwa. 10Hwehwe twisugunala na ukupiga kwa wupifu pakuva twivavikile uluhuvi lwetu, Nguluvi umumi umwene ye mupoki va avanu mbevali, na hilo vala avevamufuuwa. 11Vapelage uwulagise uwo na inzigiso iso. 12Utanage ukwidikila umunu yeyeavesaga ukubedala veve pakuva wimunyakilambo, neke ukalalilage ukuva cholelesi ikikwigwa na avafuuvitwe, mumilongele jako, mumigendele minofu, uwende, ulufuuwo na imikalo minofu. 13Gosage imisika jako, na uwupifu wako mukwimba pamalugu Uwandike Uwelu, ukudalika na ukwigisa, mbaka pesanzusile. 14Ulabedala ikipelwa chewinacho veve chewapelitwe ukwimila ing'ani isa avavisi na pewavikiligwe amawoko na avavaha. 15Wihosage hilo mwa siso mbesili na ukukwisa mbefili pepene pe ukuvina kwako mumipigile pekuwoneka kwa mbevali. 16Komalilage hilo isako yuveve na inzigiso sako. Ginage ukupiga siso, pakuva peupigite ndahihyo, pepene pe wipoka veve pamwi na vala avakukupulikisa.

will be added

X\