1 TIMOTI 2

1Wesindilalonga kinu, ndilagisa isa ukwisukila inofu ukwifunya, ukwisukila na ululumbo, fitawulwagwe kwa Nguluvi ukwimila avanu mbevali, 2Ukwimila na avatema sambi twikale mumikalile ja uwusikimafu, uwikalakunoga, ukumogopa Nguluvi na mumigendele iminofu. 3Ulukani ulu lunofu lukumunogela Nguluvi umupoki vetu, 4yeaisaka avanu mbevali vapokwe neke vakulule inachene. 5Pakuva kwali Nguluvi yumwi, kangi kwaliyumwi umunyakuvatang'asa avanu Nguluvi na umunu uyo ye Kilisito Yesu, 6ye itawe yumwene ukuvakombola avanu mbevali uwukombolwa wesawolelelwa palusika ulukwilaniche. 7Pa ulo, nene ndatumitwe mbe mwigendo na mwigisi va avanu avamyanza ndiludalike ulukani lwa ulufuuwo na inachene. Nachene ndilonga sindideta! 8Ino ngembwenda ukuta mumakanisa mbegali pemwisunyalila avagosi vifunyage, vakang'we amawoko wevitawulye ng'ani kwa Nguluvi vagaya lilakali nambi lwitakilo. 9Kangi ndiwenda avang'inetu vafwala imyenda ija wusikimafu valativa ifwili nambi ukwihamba na ifiwuyapile isahabu nambi ukwifwika imyenda ija lutogo, 10pesi ukuta vapigage ifipigo ifinofu ifinogela mumigendele ja avang'inetu avanyachoga kwa Nguluvi. 11Avang'inetu luvavaje ukwikala vakatwike na ukuva vilevesi pevakwiyigisa. 12Nene singumutawula umung'inetu amwigise nambi ukumusagila umugosi, lumuvaje ukwikala asikimee. 13Pakuva Adamu yeatasile ukugawa, neke pease Hawa. 14Sikwekutigila Adamu yeasanjilwe, pesi yu mung'inetu yeasanjilwe, swe idenya indagilo sa Nguluvi. 15Nambi ndahihyo umung'inetu saapokwa ukwimila ukwegala avana, wone anane mulufuuwo, muwende na muwelu na muwilevesi.

will be added

X\