1 TIMOTI 1

1Yenene Pawulo, umwigendo va Kilisito Yesu kwa ululagi lwa Nguluvi umupoki vetu na Kilisito Yesu uluhuvi lwetu, 2ngukwandikila veve Timoti, umwanangu hilo mulufuuwo. Ngukusukila uwuwuya, ulusungu na uwikalakunoga ukuhuma kwa Nguluvi udadetu, ulusungu na uwikalakunoga uluhuma kwa Nguluvi Udadetu na Kilisito Yesu Umutwa vetu. 3Ndiwenda veve wikale kuko ku Efeso, ndawe lwengakususile pengabitige ku Makedoniya. Povali avanu de kuko avakwigisa inzigiso isa uwudesi. Vapesage avanu iwo. 4Uvalongelage vasilekage ng'ani sila isimo isa malanga na ing'oono inaali sa avakukwawo, isiletaga ulubesa hela, sindawe isikwigisa ing'ani isa uwupoki sa Nguluvi. 5Lwetwidonya mu lulagi ulu lwe lwa ukuvalamusa muwende uwihumaga mumutima umwelu, inumbula ingolofu, na ulufuuwo lwa nachene. 6Avanu avangi vayasile na ukupitukila ulubesa lwa uwupufi. 7viwenda ukuva vigisi va indagilo, kono sivakusikagula na ing'ani sawo vavene, nambi sila sevisugunala ukulonga. 8Tukulukagula ukuta indagilo nofu, wone sikole mwesidagiwa sikolage. 9Neke lwiwukwagwe ukuta indagilo simbuyape ukwimila avanu avanofu, pesi ulwa ukwimila vala avipiga isisutine na indagilo, na avananzi, avagaya Nguluvi na avanangifu, vala avagaya choga, aviwulagaga avadadawo na vayuvawo, avawulasi, 10avasafi, avakwivaga vagosi kwa vagosi, avihiisaga avanu vakuvasopa mu wunyawingi, avadesi na vala avakwilapaga we videta na mbevali vala vevipigaga chechekivesaga ikisutine na inzigiso isa nachene. 11Inzigiso iso sihumaga mu Lukani Ulunofu, lwe nene ndapelitwe ndalike. Ulukani Ulunofu lwa Nguluvi umunyandolo na umufunyilile ye nene ndapelitwe ndalike. 12Ngumulumba Umutwa vetu Yesu Kilisito yeamelye uludali mu kipigo changu. Ngumulumba pakuva ambwene nene ukuta nywanite swe akunyagula ndimupigile, 13nambi pala pamwandi nene ndamuligige na ukumutesa nu kumupigila fibi. Neke Nguluvi ambonele ulusungu, pakuva ndengali ndimugaya lufuuwo, na baho sindalukaguligi lwendapigige. 14Neke Umutwa vetu ameelye uwuwuya wakwe uwolofu, ukumeela ulufuuwo na uwende mu kuhanga na Kilisito Yesu. 15Ululongwa ulu lwa nachene, kangi lwinoga lwidikilwage hilo ukuta Kilisito Yesu aasile konivala ukuvapoka vanyanzanangifu. Na viva kutala vawo ye nene, 16ambonie ulusungu sambi Kilisito alagile uwukangalisi wakwe mbewuli kwa nene, mbe cholelelo kwa vala mbevali ve pambele vamufuuwa na ukwanukila uwumi uwutasila. 17Kulumwene Umutwa va mbepali, yesifwisagi, yesiwonekagi na Nguluvi kulumwene luvelage ululumbo na indolo mbepali na mbepali! Ena. 18Ve mwanangu Timoti, ngukupela ululagilo ulu ulukwimila mung'ani isa uwuvisi isendonge pidaha kwa veve. Ukwikangalisa mwa siso peuhwana ukuhoma ligalu wunofu, 19pakwibatililaga ulufuuwo lwako na ulwiyiwuko ulunofu. Avanu vangi sivasipuliki inziyiwuko sawo na mwalulo vafuvanzile ulufuuwo lwawo. 20Mwavawo pwali Himenayo na Alekisanda vengavatawe kwa setani, sambi vigisiwe valemwe ukumuliga Nguluvi.

will be added

X\