1 AVATESALONIKE 1

1Ye nene Pawulo, pamwinga na Silivano na Timoti tukuvandikila nyenye mwe vanu va mu likanisa lya ku Tesalonike, avanu vakwe Nguluvi Dada, na va Umutwa Yesu Kilisito. Nguvasukila uwuwuya na uwikalakunoga. 2Tukumulumba Nguluvi mbepali ukwimila nyenye mbemuli na ukuviwuka mbepali petukwifunya. 3Pakuva, pa Nguluvi udadetu, tukwiwuka lwe mukululagila ulufuuwo lwenyu mufipigo, lwe uwende wenyu wukuvatanga ukupigila muwupifu, na lwe uluhuvi lwenyu ulukwilaniche kulu Mutwa vetu Yesu Kilisito. 4Vanyalukolo, tukulukagula ulwa Nguluvi avenda na ukuta avahagwe muve vanu vakwe, 5pakuva ulusika lwe twavadaliche lula Ulukani Ulunofu silwe lwa malanga hela, pesi muludali na kwa Umuhe Umwelu, kono we tukulukagula hilo, ukuta ulukani ulo lwe lwa nachene. Mukulukagula ukuta petwikalasige na nyenye, twikalige ukwimila ukwambula kwenyu. 6Nanye mwatwigite hwehwe na ukwiga Umutwa; nambi luve mwagudite hilo neke mwanuche ulukani mu luhekelelo ulwihuma kulu Muhe Umwelu. 7Nambi palulo nyenye mukave mwina valongosi vanofu kwa avafuuvitwe mbevali vakwiga nyenye mu Makedoniya na mu Akaya. 8Pakuva, ukwimila uwupifu wenyu ulukani lwa Umutwa lupulise si ukuta ku Makedoniya na ku Akaya hela, ulufuuwo lwenyu kwa Nguluvi lukatagalye mbekuli. Kangi sitwiwenda ukulonga tulutise. 9Avanu iwo vilonga ulwa ulugendo lwetu ukwenyu, lula lwe mukatwanuche, na lwe mukafilekite ifihwana nguluvi swe mukumupitukila Nguluvi u mumi na uva nachene, 10na kulino mukumusindila umwanakwe iike uluhuma kuchanya, Yesu, ye Nguluvi amusilibwe uluhuma kuvafwe, na ye akutupoka mwilakali lya Nguluvi ilikusa.

will be added

X\