1 PETULO Ibalula iya ukutala iya Petulo 4

1Pakuva Kilisito atesiike umuvili, nayi nyenye kangi luvavaje mukangalage mwikola ing'asi yiyo iyakwe; pakuva umunu peyeeatesike umuvili siivelagi kangi munzanangifu. 2Uluhuma lino, imikalile igivasigalye umu mung'i givagilwa ukusogoswa na seiwenda Nguluvi, si muwudobokesi wa uwunu. 3Ulusika ululutye muke na lusika lukomi ukupiga ing'ani sevipigaga avamyanza ndawe imigendele imyaafu, uwusatila penyu, uwugaasi, ulwitakilo na uwusunyalile uwubi wa ifihwananguluvi. 4Lino, avanu iwo vesivamuseli Nguluvi visasavala pevakuvawona nyenye simwihanga navene kangi mumikalile ijo imyaafu, na palulo vakuvaliga nyenye. 5Neke lutuvaje ukwilogola ulwa ulukani lulo pa Nguluvi yesahaava ukuvahiga awumi na avafwee! 6Ukukola lulo, Ulukani Ulunofu lwadalikwe na ku vafwee, sambi pevahigitwe umuvili nda vanu, pepene pevahwana ukwikala kinyamuhe ndawe Nguluvi. 7Umudugo wa mbefili yewuhegelye. Sweno luvavaje muvelage na imigosekese na ichoga, sambi muhwane ukwifunya. 8Ukulutila mbesili mwiyendage kwa mutima gumwi, pakuva uwende wawigubika inzanangifu mbesili. 9Muvelage na uwudeke yinyenye kwa yinyenye wesimwihung'una. 10Yeyeavesaga mumo lumuvaje akolage ikipelwa cheapelitwe na Nguluvi ukwimila ukwambula kwa avangi, ndawe umuvisikiswa umunofu va ifipelwa ifilipolofu fya Nguluvi. 11Yeilonga lukani, ing'ani sakwe sivelage wita ing'ani sa Nguluvi, yeipigila lumuvaje apigilage muludali lweipelwa na Nguluvi, sambi mwa mbesili Nguluvi apelwa indolo ukukola kwa Yesu Kilisito, ye indolo na uludali fyakwe mbepali na mbepali! Ena. 12Vanyawende vangu, mulasasavala ulwa ukugelwa kwa ukupugula kwemuhele mwigelwa wita wanda kinu kigenzi kikuvasila nyenye. 13Neke ulwene muhekelelage ukuta mwihanga ineseko sa Kilisito sambi muve na uluhekelelo lukomi ulusika pe indolo sakwe pesigubulwa. 14Muvinomi nyenye wone mwiligwa ukwimila litawa lya Kilisito; ulukani ulo lwilagila ukuta Umuhe va indolo, tutigile Umuhe va Nguluvi akwikala mwanyenye. 15Alava pwali munu yeiteseka pakuva muwulasi, muhiisi, mwananzi apangi mwanangifu. 16Neke wone umunu ateseke pakuva mukilisito, sweno, aliwona nyoni, pesi amupelage indolo Nguluvi, pakuva umunu uyo itambulwa mwitawa lya Kilisito. 17Ulusika lwa uluhigilo yelufikite ukuvangila muvanu vakwe Nguluvi yumwene. Lino wone uluhigilo ulo lwivangila ukwetu hwehwe, sweno, ludugila piya kwa vala vesivifuuwa Ulukani Ulunofu lwa Nguluvi? 18Na “Wone lutalamu ku vanu avagolofu ukupokwa; luva ndawuli lino, kwa avagaya choga kwa Nguluvi na vanyanzanangifu? 19Sweno, vala veviteseka ukugendela seiwenda Nguluvi, luvavaje ukukola ifipigo fyawo ifinofu, ukwivika pa lulagi lwa umugafi vawo yula ye uva ukwihuvilwa hilo.

will be added

X\