1 PETULO Ibalula iya ukutala iya Petulo 3

1Nayi nyenye mwe vang'inetu muvelage na ichoga ku vanu venyu, sambi wone vave povali avagosi vesivalafuuwa ulukani lwa Nguluvi vafuuwe pevilave imikalile jenyu. Simwikangalwa ukulonga lukani, 2pakuva vagiwona imigendele jenyu iminofu na ja ichoga kwa Nguluvi. 3Ukwihamba kwenyu kulava kwihamba kwa mwivala hela, ndawe imiwuyapile igilipolofu ja ukutiva ifwili na ukufwala ifinu ifiwuyapile isahabu, na ukufwala imyenda ja ulutogo. 4Pesi wuwunofu wenyu wuvaje wuvelage wa mugati muwunani wenyu uwanachene, uwunofu wesiwukwanangika uwulele wa inumbula, we wunyandolo pa Nguluvi. 5Ulo lwevihambite pidaha avang'inetu avagolofu, vevamuhuvilige Nguluvi, vevina ichoga ku vanu vawo. 6Ndawe icholelesi cha Sala, ali na choga kwa Abulahamu na amukemelige muvaha. Nyenye mukave lino vaalive wone mupige inofu wesimwituga kinu. 7Lwindahihyo nayi nyenye mwevagosi, muminanile na avavenyu luvavaje ukulukagula ukuta avene vadedemu palulo muvapigilage muchoga; pakuva nawo kangi savanukila ikipelwa cha uwumi cheakuvapela Nguluvi. Ipo pepene pe ulwifunyo lwenyu silubihilwa nda. 8Pendisindilisa nditigila de: luvavaje ukuva na numbula yimwi, mahosa gamwi, luvavaje ukwiyenda kinyalukolo, ukuva vilevesi nyenye kwa yinyenye. 9Mulihombela ku vanu isa uwanangifu, liligo nanye mukwipilulila liligo; pesi muvasukilage uwufunyilile, pakuva nyenye mwakemelitwe na Nguluvi mwanukile uwufunyilile. 10Ndawe lwewilonga Uwandike Uwelu; “Yeiwenda anogelwe na uwunani, ukufiwona ifimunyi ifya uwunofu. lumuvaje alemwa ukulonga isa uwananzi na ukuwuleka uwudesi. 11Kangi ilegage na uwanangifu, apigage inofu, asakage uwikalakunoga na awinatilage. 12Pakuva Umutwa akuvalava wunofu avagolofu na ukulupulika ulwifunyo lwawo. Neke akuvapitukila umugongo avanu avanyakupiga isa uwanangifu.” 13Ngali yenani yeahwana ukuvabedala nyenye wone mukwinatila ukupiga inofu? 14Wone nambi luvavagile ukuteseka ukwimila ukupiga inofu, apo mwina winomi. Mulogopa umunu yeyeavesaga, na mulidikila musine. 15Neke mumupelage indolo Kilisito iva Mutwa munumbula senyu. Muvelage mwimite munosile ukumupitula yeyeavesaga munu yeavawusa isa uluhuvi ululi mugati mwanyenye, 16ulwene mupigage ulo muwulele na ichoga. Muvelage na ulwiyiwuko ulunofu, sambi pemwiligwa, vala vevilonga imbi mumigendele jenyu iminofu wita mwivakilisito, vahongelwe inyoni. 17Pakuva iikiba ukuteseka ukwimila ukupiga inofu wone Nguluvi awende, sindawe ukuteseka ukwimila ukupiga isa uwanangifu. 18Pakuva Kilisito yumwene afwee ukwimila inzanangifu setu; afwee sukumwi hela swe lwikwila, umunu umunofu ukwimila avanangifu, sambi avasindike nyenye kwa Nguluvi, vamuwulige umuvili neke iva mumi ku lubali lwa umuhe; 19na ukukola uwunani wakwe ulubali lwa Umuhe ahele ukugidalikila imyuhe ja avafwee je mundinde. 20Iwo vevala vevabihye ukumwidika Nguluvi peavasindilige mulwikangaliso imisika Noha peawuyapige kila ikipugu. Mugati mu kinu icho vanu vakefu hela, kwekutigila vanu vimunana avapokilwe mululenga, 21ulwe kiganiso cha uwubatiso wewukuvapoka nyenye lino. Uwubatiso siwita hela wihesa ilikwi mumuvili, pesi lwe luhuviso lwa Nguluvi ulwipigikila mulwiyiwuko ulunofu. Lukuvapoka ukukola ulusilibuko lwa Yesu Kilisito, 22yula yeahele kuchanya na lino akong'ome ulubali lwa kundyo lwa Nguluvi, pamwi na avanyivaha imbali mbesili mbike kulumwene.

will be added

X\