1 PETULO Ibalula iya ukutala iya Petulo 1

1Petulo, Umwigendo va Yesu Kilisito, kwa yemutagalye, mukwikala mu wugenzi uko ku Pondo, ku Galatiya ku Kapadokiya ku Asiya na ku Bitiniya. 2Mwivahagule na Nguluvi Dada ukwimila lula lwealakelite, na mukawuyipwe Velu na Umuhe, muve na ichoga kwa Yesu Kilisito, na ukofugwa na idanda yakwe. Nguvasukila uwuwuya na uwikalakunoga wongelekelage kwa nyenye. 3Alumbwagwe Nguluvi na Dada va Umutwa vetu Yesu Kilisito! Ukukola ulusungu lwake ulukomi atuwuyipe twegalwe wupya muluhuvi ulunyawumi ukusilibukwa Yesu uluhuma kuvafwe, 4Na palulo twakusa upelwa uwufunyilile, wula we Nguluvi avaviche avanu vakwe. Nguluvi yeavaviche uwufunyilile wuwo kuchanya kula kwe siwuhwana ukuwola, nambi kwanangika, nave kukepa. 5Uwo sawuva wenyu nyenye ye ukukola ulufuuwo mwilolelwa wunofu muludali lwa Nguluvi akwimila uwupoki wula we yewukwilaniche kukugubulwa pawusililo wa imisika. 6Muhekelelage ukwimila ulukani lulo, nambi kulino, kwa lusika ludodo, luvavagila ukuhuguvala pemwingendela mukupelwa ukulipolofu mukuteseka. 7Pakuva ulufuuwo lwenyu pelugelitwe luwoneka wunofu ukulutila isahabu yeyisakalaga, nayiyo yayigelwa mumoto sambi yinane. Lwindahihyo na ulufuuwo lwenyu sambi mwanukile ululumbo, indolo na uwutambule ikimunyi chesa agubulwa Yesu Kilisito. 8Nyenye mumwenda, simulamuwona; mukumufuuwa nambi we simukumuwona lino. Sweno, muhekelage, uluhekelelo lunyandolo lwesilwihwana na ukulongwa, 9pakuva mukwanukila uwupoki wa inumbula senyu ulo lwe lwidonyitwe na ulufuuwo lwenyu. 10Avavisi vagosise neke vatandile isa uwupoki uwo, ndawe vavilige isa uwuwuya wayo we nyenye muke mupelwa. 11Vagelite vagikagule imisika na yeilongwa, tutigile ulusika lwe Kilisito alavaje ulupweng'enyu yeemugati mwawo, avilite ulwa ineseko isesimufika Kilisito na indolo yesayihumila mumo. 12Nguluvi avagubulye ukuta ulusika pevalongige siso ing'ani se nyenye umo yemupulike ukuhuma kwa vala avatume vevavalaaliche Ulukani Ulunofu ukukola uludali lwa Umuhe Umwelu yeatumitwe uluhuma kuchanya, ikipigo chawo siche kwa ukwambula kwawo avene, pesi ukwimila nyenye. Iso se ng'ani se na vanyivaha vake vawenda ukusikagula. 13Lino, mwimage munoge, mwikale miho, muluvikage uluhuvi lwenyu mbeluli mu wuwuya wula wesamupelwa ulusika lwa Yesu Kilisito pesaava awonike! 14Ndawe avana va Nguluvi vanyachoga mulidikila kangi ukwiga uwudobokesi uwuhonganyoni, wemukapigige pamwandi pemuke mukaali vapuva! 15Lino luvavaje muvelage velu mumigendele jenyu mbegili, ndawe yeavakemelye. Mwelu. 16Uwandike Uwelu witigila, “Muvelage mwivelu, pakuva nene ndi mwelu.” 17Wone mukumutigila Nguluvi Dada yeihigaga yeyeavesaga kitabagula ukuling'ana na ifipigo fyakwe, apo mwikomalilage we mwiva na choga mumisika mbegili pemuli ku wugenzi. 18Pakuva mukulukagula ukuta nyenye mwivakombole uluhuma mumikalile jenyu imyaafu gila imilekelwa na avavaha venyu. Neke simwakombolilwe ukukola ifinu finyakwanangika: ukukola amagobole, isahabu, 19pesi kwa idanda iyinyandolo ya Kilisito, yee wita umwanang'olo umugaya wutenda nave limbilila. 20Umwene alimuhagule na Nguluvi ing'i wesiyilagawa, agubulilwe ifilo ifi ifya ukumudugo ukwimila nyenye. 21Ukukola kulumwene, mukumufuuwa Nguluvi yeamusilibwe uluhuma kuvafwe na ukumupela indolo na palulo ulufuuwo na uluhuvi lwenyu luli kwa Nguluvi. 22Pakuva lino, ukukola ukuwidikila uwanachene, nyenye yemusesise inumbula senyu na ukuvenda avayenyu si muwubuganisi nda, lino mwiyendage kwa mutima mbeguli. 23Pakuva ukukola ulukani ulunyawumi lwa Nguluvi, nyenye mwegilwe wupya, sindawe avana va udadawo yeifwisaga, pesi va udadawo yesifwisagi kitasila. 24Ndawe Uwandike witigila; “Yeyeavesaga indawe lisoli, na indolo sakwe mbesili sindawe ililuva lya ilisoli. Ilisoli lyalikalaga na amaluva, gagilagala. 25Neke Ulukani lwa Umutwa lwinanaga kitasila.” Ulukani ulo lwe Lukani ulunofu lwemwadalikilwe.

will be added

X\