1 YOHANE 5

1Yeyeavesaga munu yeifuuwa ukuta Yesu ye Kilisito, uyo ye mwana va Nguluvi; na yeakumwenda umwegasi aakumwenda nu mwana umwegale na yuyo umwegasi. 2Ulo lwetukulukagula ukuta tuvenda avana va Nguluvi: kwa ukumwenda Nguluvi nu kwinatila indagilo sakwe; 3pakuva ukumwenda Nguluvi kwe kwinatila indagilo sakwe. Ni ndagilo sakwe si nalamu, 4pakuva yeyeavesaga mwana va Nguluvi ahwanite ukuyidwesa ing'i ulu de lwetukuyidwesa ing'i: kwa ulufuuwo lwetu. 5Mbi yenani ino, yeahwanite ukuyidwesa ing'i? Ye yula yeifuuwa ukuta Yesu ye Mwana va Nguluvi. 6Yesu Kilisito yeaasile nu lulenga na idanda, siasili nu lulenga hela pesi nu lulenga na idanda. 7Nave Umuhe akolelela ukuta ulo lwa nachene, pakuva Umuhe ye nachene. 8Sweno, povali wolelesi vadatu, Muhe, ululenga ni danda nu wolelesi wa iva avadatu wukwiyidikisa. 9Wone tukuwidikila uwolelesi wa avanu, apo uwolelesi wa Nguluvi wukomi hilo wulutye; na uwu we wa Nguluvi ukwimila Umwanakwe. 10Yeakumufuuwa mwana va Nguluvi inawo uwo uwolelesi mulumwene; neke yesiakumufuuwa Nguluvi, akumupela umwene uwudesi, pakuva siawufuuvitwi uwolelesi weolelelye Nguluvi ukwimila Umwanakwe. 11Nu wolelesi uwene we uwu: Nguluvi atupelye uwumi uwutasila nu wumi uwo wuli Kulumutwa. 12Yeyeavesaga inave Umwana va Nguluvi inawo uwo uwumi; yeihela u Mwana va Nguluvi, mugaya wumi. 13Nguvandikila sambi mulukagule ukuta mwinawo uwumi uwutasila nyenye yemufuuwa mwitawa lya Umwana va Nguluvi. 14Na hwehwe twivapifu pa Nguluvi pakuva twina luhuvi ukuta wone tumusuke ichekivesaga ndawe lwewigendela uwende wakwe, umwene akutupulika. 15Umwene aakutupulika petuvesaga tukumusuka; na pakuva tukulukagula ukuta umwene akutupulika petuvesaga tukumusuka, tukulukagula kangi ukuta atupela mbefili fyetukumusuka. 16Wone umunu amuwone umunyalukolo vakwe apigite inzanangifu yesiyikumusindika kufwa, lumuvaje amusukile kwa Nguluvi, nave Nguluvi amupela uwumi. Ukwimila inzanangifu yesiyivaji ifwa. Poyili inzanangifu iyivaje ifwa, sinditigila ukuta luvavaje ukumusuka Nguluvi ukwimila yiyo. 17Chechekivesaga kipigo chesikigolofu icho wananzi, neke poyili inzanangifu yesiyisindikagi umunu kufwa. 18Tukulukagula ukuta yeyeavesaga umwegalwa na Nguluvi sipigagi inzanangifu, pakuva Umwana va Nguluvi akumulolela wunofu, nayula umwanangifu sahwana ukumwananga. 19Tukulukagula ukuta hwehwe twivanu vakwe Nguluvi nambi we ing'i mbeyili nzagile na yula Umwanangifu. 20Tukulukagula kangi ukuta Umwana va Nguluvi akasile, ukutupela uwukagusi sambi tumukagule Nguluvi uva nachene; twikale mu uwulilumwi na Nguluvi uva nachene mukuhanga na Umwanakwe, Yesu Kilisito. Uyu ye Nguluvi uva nachene, na uwu we wumi uwutasila. 21Nye vanangu, mwilegage na ifihwananguluvi!

will be added

X\