1 YOHANE 3

1Mulavage ndawuli uwende wa Dada weatupelye hwehwe, nambi twitambulwa vana va Nguluvi, ulo lwe twiwali. Nambi ing'i siyikutukagula hwehwe, pakuva siyimukagwi Nguluvi. 2Vanyawende vangu, hwehwe twivana va Nguluvi lino, neke ulwene silulava lukagulika hilo lwesatulava. Neke tukulukagula ukuta, ulusika lwe Kilisito alava kweleluka, satwihwana nave pakuva satumulava lula lweiwali. 3Ino, umunu yeyeavesaga ina uluhuvi ulu mwa Kilisito, akwiyesa ndawe lula Kilisito lweesiwe hilo. 4Yeyeavesaga munu ipiga inzanangifu uyo akwananga indagilo sa Nguluvi, pakuva inzanangifu kwe kula ukwananga indagilo. 5Mukulukagula ulwa Kilisito aasile ukuhesa inzanangifu setu, na ukuta kulumwene kugaya nzanangifu sesesivesaga. 6Ino, yeyeavesaga akwikala mukuhanga na Kilisito sipigagi inzanangifu; neke umunu yeyeavesaga ipiga inzanangifu uyo siealamwuwona nangi nambi ukumukagula Kilisito. 7Ino, nye vanangu, mulonga mwidikile ukuyasiwa nu munu yeyeavesaga. Umunu yeipigaga ifipigo ifigolofu uyo mugolofu ndawe lula Kilisito lwe mugolofu hilo. 8Neke yeipigaga inzanangifu uyo va umwanangifu, pakuva umwanangifu ipigaga inzanangifu uluhuma pamuvango. Neke Umwana va Nguluvi aasile konivala ukufyananga ifipigo fya umwanangifu. 9Yeyeavesaga mwana va Nguluvi sipigagi inzanangifu, pakuva ulwihwano lwa Nguluvi luli mulumwene; sahwaniti ukupiga inzanangifu pakuva umwene mwana va Nguluvi. 10Neke yeyeavesaga yesiipiga ing'ani ingolofu, nambi yesakumwenda umunyalukolo vakwe, uyo si mwana va Nguluvi. Na uwo we uwuliwungi uwipwali pagatinagati pa avana va Nguluvi na vala avana va setani. 11Na ulukani lwemukalupulike uluhuma pamuvango lwe ulu: Lutuvaje twiyendage! 12Tulonga twihwane na Kayini mu kusogoswa na yula umwanangifu, neke ifipigo fya umwanakwe fye figolofu! 13Sweno, vanyalukolo vangu, mulasasavala wone ing'i yikuvavipila nyenye. 14Hwehwe tukulukagula ulwa yetulutye ukuhuma mufwa nu kwingila muwumi pakuva hwehwe tuvenda avanyalukolo vetu. Umunu umugaya uwende uyo isigalaga mufwa. 15Yeyeavesaga akumuvipila umunyalukolo vakwe uyo muwulasi; nanye mukulukagula ulwa umuwulasi yeyeavesaga yula mugaya uwumi uwutasila mulumwene. 16Hwehwe yetuwukagwe uwende che kiki, pakuva Kilisito awutawe uwumi wakwe ukwimila hwehwe. Nahwe lwindahihyo lutuvaje ukuwutawula uwumi wetu ukwimila vanyalukolo vetu. 17Sweno, wone umunu ave na uwunono wa ifinu fyamung'i, neke amuwone umunyalukolo vakwe agulwime, sweno ave na inumbula nalamu alemwe akumuwonela ulusungu, uyo ahwana wuli ukutigila ulwa amwenda Nguluvi? 18Nye vanangu, uwende wetu wulonga wuve wa pamulomo hela, pesi wuvelage wa nachene na wa mufipigo. 19Ipo pepene petuva nu luhuvi ulwa hwehwe twivanu va nachene; na sisatulava nu wuhuguvafu pa Nguluvi. 20Pakuva, nambi inumbula yetu yikutuhiga, tukulukagula ulwa Nguluvi muvina hilo ukulutila inumbula, na ulwa umwene afikagwe mbefili. 21Vanyawende vangu, wone inumbula yetu siyikutuhiga lukani, sweno, ipo petuhwana ukuva nu wupifu pa Nguluvi, 22na ukwanukila kulumwene chekivesaga chetukumusuka, pakuva tukwinatila indagilo sakwe nu kupiga sila isikumunogela. 23Ululagilo lwakwe lwe ulu: Ukumufuuwa umwanakwe Kilisito, nu kwiyenda ndawe lweatulajee. 24Yeakwinatila indagilo sa Nguluvi akwikala mu wulilumwi nave. Ukukola Umuhe ye Nguluvi atupelye hwehwe, tukulukagula ulwa Nguluvi akwikala muwulilumwi na hwehwe.

will be added

X\