1 YOHANE 2

1Nye vanangu, nguvandikila ing'ani isi, sambi mulemwe ukupiga inzanangifu. Neke wone lulonga umunu ave apigite inzanangifu, twinave uyumwi ye akutusukila kwa Dada, ye Yesu Kilisito umugolofu hilo. 2Kilisito ye nambika yeyayihesa inzanangifu setu; na siukuta inzanangifu setu hwehwe hela, pesi na inzanangifu sa konivala mbekuli. 3Wone twinatile indagilo sa Nguluvi, apo, pe tuhwana ukuva nu luhuvi ulwa tukumukagula. 4Umunu wone atigile ukuta akumukagula, neke ave siakwinatila indagilo sakwe, apo, umunu uyo mudesi, na inachene yisumuli mulumwene. 5Neke umunu yeyeavesaga yeakwinatila ulukani lwa Nguluvi uyo yemwene yeina uwende uwukwilaniche wa Nguluvi mulumwene. Palulo petuhwana ukuva nu luhuvi ulwa twihanga nave. 6Umunu yeyeavesaga yeitigila ulwa ahanzile na Nguluvi, lumuvaje ikalage ndawe lweikalige Yesu Kilisito. 7Nye vanyawiyendi vangu, ululagilo ulu lwenguvandikila si lupya nda: lwe lulagilo lulula lwa pidaha lwelwemwinalo uluhuma pamwandi. Ululagilo ulo lwa pidaha lwe lula ulukani lwemwalupulike. 8Nambi ndahihyo, ululagilo ulu lwenguvandikila lwe lulagilo ulupya, na inachene iyo yiwoneka mugati mwa Kilisito na mugati umwenyu kangi. Pakuva ulwisa lwikimbila na ulung'ali ulwa nachene yeluvanzile ukung'alika. 9Yeyeavesaga yeitigila ulwa ali mulung'ali, kono weakumuvipila umunyalukolo vakwe, umunu uyo peakaali alimulwisa. 10Yeyeavesaga yeakumwenda umunyalukolo vakwe, uyo ali mulung'ali na mulumwene simokili kinu ikihwanite ukwambusa uyungi apige inzanangifu. 11Neke yeakumuvipila umunyalukolo vakwe, uyo ali mulwisa; igendela mulwisa, na akwipopela pakuva siakukukagula kweibita, pakuva ulwisa lumubofwise amiho. 12Nguvandikila nyenye nyevana, pakuva inzanangifu senyu sidegepilwe mwitawa lya Kilisito. 13Nguvandikila nyenye nye va dada, pakuva mumukagwe yeekwali uluhuma pamuvango. Nguvandikila nyenye vanyakilambo, pakuva mukamulemite yula umwananzi. 14Nguvandikila nyenye nye vana, pakuva mukumukagula Dada. Nguvandikila nyenye va dada, pakuva mukumukagula umwene yeekwali uluhuma pamuvango. Nguvandikila nyenye vanyakilambo pakuva mwina ludali; ulukani lwa Nguluvi lulimugati umwenyu na mukamulemite yula umwananzi 15Mulonga muyende ing'i nambi ichekivesaga cha mung'i. Umunu yeakuyenda ing'i, uwende wa Dada siwuhwaniti wuve mugati mulumwene. 16Ifinu mbefili fya mung'i, uwudobokesi wa umuvili, ifinu fyevakufiwona avanu nu kufidobokela, ulwiwono ulukwambuswaga na uwunono ifyo mbefili sifihumagi kwa Dada, pesi ukuta fihumaga mung'i. 17Ing'i pamwi na ifilimumo mbefili finyakudobosa filutila; neke umunu yeipigaga seiwenda Nguluvi, uyo inana kitasila. 18Vanangu, umudugo yeguhegelye! Yemukapulike ulwa umutavangua va Kilisito akusa, na kulino de avatavangu wolofu va Kilisito yevakafikite, na palulo tukulukagula ulwa umudugo yeguhegelye. 19avanu iwo vakahumite mwahwehwe, neke ulwene nachene sivake vayetu nambi vakatulesile, wone vake vave vayetu, tuke tuva nawo. Neke lino vakawukite, vakwibitilaga, sambi lukagulanike hilo ulwa sivevayetu nangi. 20Neke nyenye mukapelitwe Umuhe Umwelu va Kilisito, na palulo muyikagwe inachene. 21Sweno, nguvandikila, siukuta simuyikagwi inachene, pesi pakuva muyikagwe, na kangi mukulukagula ulwa uwudesi uwewuvesaga siwukwiyidikisagi nda na inachene. 22Umudesi yenani? Ye yula yeakumukana Yesu ulwa ye Kilisito? Umunu yeindawe uyo ye mutavangu va Kilisito akumukana Dada nu Mwana. 23Pakuva yeyeavesaga akumukana Umwana, akumukana nayi Dada nave. 24Ino, ulukani lula lwemwalupulike uluhuma pamuvango lwikalage munumbula senyu. Wone ulukani ulo lwemwalupulike uluhuma pamuvango lwikale mugati umwenyu, sweno, apo mwikala mbepali mu wulilumwi nu Mwana na Dada. 25Nu luhuviso lweatuhuvise hwehwe lwe ulu: Uwumi uwutasila. 26Ndivandiche ing'ani isi uwimila vala veviwenda ukuvayasa nyenye. 27Neke, kulubali ulwenyu nyenye, Kilisito akavapelye Umuhe vakwe. Na wone ave peikala mugati umwenyu, simugulumu munu yeyeavesaga avigise. Pakuva Umuhe vakwe akuvigisa mbefili, na uwigisi vakwe wa nachene, si wa wudesi nda. Ino, mwinatilage uwigisi wa yuyo Umuhe na musigalaga mbepali mu wulilumwi na Kilisito. 28Ena, vanangu, mwikalage mulumwene, sambi ulusika pesaelelwike tuvelage twivakangafu twivagaya muhodo nambi lukani ulwileka twifihe kihonganyoni ikimunyi cha ukusa kwakwe. 29Mukulukagula ulwa Kilisito mugolofu hilo ino, luvavaje ukulukagula kangi ulwa umunu yeyeavesaga yeipigaga ing'ani isa uwugolofu ye mwana va Nguluvi.

will be added

X\