1 AVAKOLINDO 9

1Mbi, nene sindi mutemapangu? Mbi nene sindimwigendo? Ngali apangi sindamuweni Yesu umutwa vetu? Neke nanyenye nanye, sinyenye mwe maveleko ga ikipigo changu kulu Mutwa?. 2Nambi nene mbe sindi mwigendo ku vanu vangi, neke nane ndi mwigendo kwa nyenye. Nyenye wewolelesi wa uwigendo wangu, kwa ukuhanga na umutwa. 3Neke ulukani lwangu kwa vala vevakumbesa lwe ulu: 4Ngali ndawuli hwehwe silukutuvagila ukupelwa ichakulya nu lulenga ukwimila ikipigo chetu chetwipiga? 5Ngali hwehwe silutuvaji ukugendasa ulugendo na umung'inetu yeyeavesaga ndawe lwevipiga avigendo avangi na avanyalukolo va umutwa, nayi Kefa nave? 6Apangi tutigile ye nene hela na Balanaba yelutuvaje tupigage ifipigo tandi, sambi twikwavile fyetugulwime? 7Mbi, umunyigalu yalikwi akwihombelaga yumwene peipigila uwunyigalu wakwe? Ngali yealikwi yeayilima umugunda neke aleke ukwambula amaveleko ga imisabibu kangi alemwe ukulya amaveleko? Kangi yenani yeaikwamila ifikwamilwa, neke alemwe ukunywa ilisiva lya ifikwamilwa fyakwe? 8Ngali nyenye mukwihosa ukuta ndilonga isi mung'asi ya uwunuwunu hela? 9Ndawe nzandike mu ndagilo sa Musa, “Lemwage ukuyipinga isenga kumulomo peyikukutanga ukupata isanga.” Mbi, kwekutigila Nguluvi ilonga ulwa isenga? 10Mbi, siukulukagula ukuta alongige lwa hwehwe peilonga ulo,silwa isenga nda. Ena, isi nzandike nachene ukwimila hwehwe; pakuva yula yeilima na yula yeibeta, mbevali ndawe vavili vihuvye ukwanukila isanga. 11Neke wone hwehwe twavavyalye inyadikwa ya Umuhe mwa nyenye, mbi, luva lubi wone twambule ukwangula amaveleko genyu ga mung'i? 12Wone avangi vanoje na vilavisa iso ukuhuma kwa nyenye, mbi, hwehwe ndawuli siyetulutye hilo kwa vawo? Neke, hwehwe sitwawenditi ukwimila lulo. Sweno ulungi lwa palulo, twakangalye mbefili sambi tulemwe ukulufuvalisa Ulukani Ulunofu lwa Kilisito. 13Mbi, simukulukagula ukutigila vala vevavipiga mu Tembeli vavilya fya mumo mu Tembeli, na ukutigila vevavitawula inambika pifunyo vavipelwa ulusago ulwa ikitawulwa kicho? 14Lwindahihyo nayi Mutwa alaje avadalisi va Ulukani Ulunofu vapelwage ichakulya chawo ukuhuma mumo. 15Neke, nene sindapigiti nambi ikimwi mwa siso. Na pengwandika sinditigila sambi melwe kinu, nene ikiba pefwe silwindawe ukuleka uyungi anigile ngwidudumba chaka hela. 16Neke pendidalika Ulukani Ulunofu, ulo si lukani lwa kwidudumbila, icho che kipigo chendapelitwe. Neke ndinalyo wone ndemwe ukudalika Ulukani Ulunofu! 17Neke ndalimbe nyagwe yinene ukupiga ulu kwa ukwiyendela hela, sweno, ngembwenda ukwanukila amahombo; neke lino ndipiga pakuva ndimulagile, sweno kwekutigila ndipiga ululagile kwa nene. 18Sweno, amahombo gangu si kinu kangi? Amahombo gangu kiki hela ikilega cha ukudalika Ulukani Ulunofu kitahombwa, we sindiwenda ukwanukila isimbaje mu kudalika. 19Sweno, nambi, nene sindi munyawingi va umunu yeyeavesaga, ngivikite ndi munyawingi va mbevali sambi ndimuletele Kilisito avanu wolofu ndawe lweluhwana. 20Kwa Avayudaya ndikalite we ndi mu Yudaya sambi ndivalete Avayudaya, kwekutigila, nambi nene sindipanyi ya Indagilo, neke kwa avene nginatye Indagilo, sambi ndivalete iwo vevakwinatila Indagilo. 21Na kwa vala avagaya Indagilo, ngwikala ndawe avene, ndimugaya Indagilo, sambi ndivalete iwo avagaya indagilo. Ulo si kwekutigila nene ndimugaya Indagilo sa Nguluvi aa nda, pakuva nene nachene ndilipanyi ya Indagilo sa uwukilisito. 22Kwa vala avahomefu nane ngave nda ndimuhomefu sambi ndivalete nawo. Nane ngipitwe polofu na kwa mbevali sambi ndivapoke avamwi. 23Nene ndipiga mbesili isi ukwimila Ulukani Ulunofu, sambi melwe uwufunyilile. 24Mbi, simukulukagula ulwa muluvanza, avakimbisi, vavikimbila mbevali, neke umunu yumwi hela yeaisuuma avayagwe swe yeaipelwa ikipelwa? Lino mukimbilage sambi mupelwe ikipelwa. 25Avakimbisi mbevali vaviva na ulusika ulwa ukwigelanisa ukukimbila vatigine hilo, vakwiyima na ukupiga isingi; sambi vanukile ikinu iyikwanangika! Neke hwehwe twipiga isi sambi twanukile ikinu chesikikwanangikagi. 26Nambi, nene sindikimbila chaka, sinditoosa ifunzi nda umunu yeitova ing'ala; 27Na umuvili gwangu nguguvika mumigendele imitalamu sambi guve na choga nachene, sambi lulava nene ndidalikila avangi vanukilwe kwa Nguluvi neke nene sambihilwe pambele.

will be added

X\