1 AVAKOLINDO 8

1Neke lino ulwa ifilyo ifitawule nambika ku ifihwananguluvi: Tukulukagula ukuta, mbetuli twina wuseela, uwuseela uwo wakwambusa ulwidudumbo neke uwende wawisenga. 2sweno, yula yakwihosa ulwa akisele kinu, kumbi nachene sakiseli chechekivesaga kinu ndawe ulumuvaje akikagule. 3Neke umunu yamwenda Nguluvi, uyo yakagulanike hilo kwa Nguluvi. 4Sweno ulwa ifilyo ifitawule nambika kwa ifihwananguluvi, hwehwe tukulukagula ukuta ifihwananguluvi si kinu nambi ludodo mung'i, mbetuli tukulukagula ulwa Nguluvi yumwi yeiyena hela. 5Nave kofili mung'i na kuchanya ifinu ifitambulwa nguluvi, nave vave kovali vanguluvi na avavina wolofu, 6nambi ndahihyo, kwa hwehwe kwali Nguluvi yumwi hela; Dada, mugafi va mbefili, ye kwa ukwimila yumwene hwehwe twikwali. Kangi pwali Umutwa yumwi hela, Yesu Kilisito, ye kwa ukwimila umwene ifinu mbefili fyagafilwe, na hwehwe twiva wumi kwa uludali lwakwe. 7Neke, si mbevali vevakulukagula ulu. Pakuva povali avanu avangi vevasovyee ifihwananguluvi, avanu ve mbaka neng'ino de pevilya ifyakulya ifyo vakufiwona ulwa fitawule kwa ifihwananguluvi. Na pakuva inumbula sawo sina lufuuwo luhomefu, swe ifyakulya ifyo fikuvapela uwuhongawinya. 8Neke nambi ndahihyo ifyakulya sifihwaniti ukutuhegelesa pipi hilo na Nguluvi. Na pesitulii ichakulya kicho sitwi neema kinu nda, na petulye sitwiwilwa kinu nda. 9Neke, mwikomalilage; uwutemapenyu wenyu wulemwage ukuvambusa avangi vanyalufuuwo uluhomefu vagwile mu nzanangifu. 10Pakuva, umunu ye inumbula yakwe nyomefu, peakuwene veve ye wina uwuseela wilya ifyakulya ifyo mugati mu Tembeli ya ifihwananguluvi, mbi, siwitigila ukuta ulo lumukuvilisa uyo agine ukulya ifyakulya, ifitawule nambika kwa ifihwananguluvi? 11Sweno, uyo umunyalukolo vako umuhomefu ye Kilisito amufwilye, ayaga ukwimila uwuseela wako. 12Neke wone muvambuse avanyalukolo venyu ulwindahihyo, na ukwananga inumbula sawo nyomefu, apo mwiva mumwananje Kilisito. 13Sweno, wone ichakulya kikwambusa umunyalukolo agwe, sisandya inyama nambi, longa nzambuse umunyalukolo vangu agwile munzanangifu.

will be added

X\