1 AVAKOLINDO 4

1Umunu atuhosage hwehwe ulwa twivakami va Kilisito na avavisikise isa ikinyele sa Nguluvi. 2Ipo chekigoswa kwa yula umuvisikise ulwa avelage munu yeakwihuvilwa. 3Neke kwa nene si kinu wone nyenye munyige kwa ukukola lwevavihiga avanu, neke nene singwihiga kinu. 4Nene inumbula yangu siyikusongela kwa ikinu chechekivesaga, nambi ndahihyo sinditigila nene ndimugaya lwehwanite nzanange nda. Neke Umutwa yakunyiga nene. 5Sweno, mulahiga ulusika pesilulava lufika, pa Umutwa salasa. Uyo saavika pelu ing'ani isa ikinyele isifihime, na ukugalagila pelu amahosa ga inumbula sa avanu. Ipo umunu yeyeavesaga saanukila ikilumbo ikimuvaje. 6Vanyalukolo vangu, iso mbesili ndonzile ukwimila mwa Apolo na nene, icho kilagilo kwa nyenye, ukwimila ikilagilo chetu nene na Apolo ndisaka sambi mulukagule nachene indongele iyi, “Mwinatilage inzandike.” Kwa nyenye pavelage pagaya umunu yakumududuvila uyungi nambi ukumubedala umunu yungi. 7Mbi nani yakukuwona veve ulwa uli pachanya ya avangi? Mbi lino wina kiki veve chesiwimupele na Nguluvi? Na wone wapelitwe, lwakiki widuduvila icho wiva nda siwapelitwi? 8Lino luvakwilye! Lino yemunonite! Kangi yemuve vatema lwe hwehwe situlava! Ena, nachene, luke lunoga nyenye muteme, sambi na hwehwe petuhwana pamwinga ukutema nanyenye. 9Lwiwoneka pelu kwa nene ukuta Nguluvi atupelye hwehwe avigendo ikilega cha mu mbele, sambi tuve wita avanu avahige ukufwa, twavisilwe tuve vanu va kuhekwa mung'i mbeyili, kwa avanyivaha na kwa avanu. 10Hwehwe twivapuva ukwimila Kilisito, neke nyenye mwivanyaluhala ukwimila ukuhanga na Kilisito, hwehwe twivahomefu, neke nyenye mwavanyaludali. Nyenye mwipelwa ululumbo neke hwehwe twibedalwa. 11Na kulino de, hwehwe tudagine, kangi tukelwike, tufuulike, twipunangwa mufyolofu, twivagaya nambi pono pa wuvaso. 12Kangi twiguda, kono we twipiga ifipigo kwa amawoko getu yihwehwe. Na pevatwelanga, hwehwe tukuvasukila uwufunyilile, na petwitesewa, hwehwe twikangalila; 13na pevakutufila, hwehwe twipitula kwa wulele, mbaka kulino de, hwehwe tukave mahwahwa mung'i. 14Nene singuvandikila ing'ani isi sambi ndivahongele inyoni nda, pesi ulwa ndivandiche isi, sambi ndivigise hela, nyenye nye vanangu avende. 15Pakuva nave mwinawo avalolesi mbilima nzolofu mumikalile ija uwukilisito, nambi ndahihyo mwinave udadenyu yumwi swe, pakuva kwa ulubali lwa uwukilisito nene yendavejee kwa ukuvadalikila Ulukani Ulunofu. 16Sweno, nguvagongola munzigage nene. 17Nambi nene ndimutumite Timoti aase ukwenyu. Uyo ye mwanangu umwende yengumufuuwa mwitawa lya Umutwa. Uyo aviwusa ing'asi ye nene Pawulo ndigendela mumikalile ija uwukilisito; ing'asi yengwigisa bahapavesaga mumakanisa mbegali. 18Neke apamwi avangi mwa nyenye, vavanzile ukwivika pachanya vakwihosa ukuta nene sinzusa kangi ukwenyu. 19Neke, ulwene mulukagulage ukuta, wone Umutwa awende, ongo nzusa ukwenyu lilino, napenzusile, pepene pesandilavila yinene, ichene chevahele vilonga vawo vevakwivika pachanya, pebaho pendilavila na luludali lwawo lwevinalo. 20Pakuva uwutwa wa Nguluvi, siwakwimila mung'ani sa ndahihi hela, pesi muludali. 21Mbi lino nyenye mwiwenda ululikwi? Ngali nzusage ukwenyu weng'olye ulugoda, apangi nzusage na inumbula iya uwende na uwulele?

will be added

X\