1 Vanyalukolo vangu, nane nene singahwaniti ukulonga nanye witigila mwinave uyo Umuhe. Ndawene lunofu ndonge nanye witigila mwivanu va mung'i, witigila mwivana vadodo mumikalile ija uwukilisito. 2 Ndawene lunofu ndivapele lisiva, si uwugali, pakuva simwemuhwana ukulya. Na kulino de simuhwaniti ukulya, 3 pakuva na kulino de nyenye pemwivanu va mung'i. Mbi si nachene ukutigila ukwenyu pekwina igila na ulwitakilo weyinyenye ng'ani? Ulo chekilagilo ulwa nyenye pemukaali mwivanu va mung'i, mukwikala we mukwiga imikalile ija mung'i. 4 Uyumwi venyu peitigila, “Nene ndiva Pawulo.” na uyungi, “Nene ndiva Apolo,” mbi, ulo sichekilagilo ukutigila nyenye mukaali pemwiga imikalile ija mung'i mumu hela? 5 Mbi Apolo ye nani? Na Pawulo yenani? Hwehwe twivakami hela yetwavaletye nyenye ulufuuwo. Yeyeavesaga mwahwehwe ipiga ikipigo che apelitwe nu Mutwa. 6 Nene ndavyalite inyadikwa, Apolo swe iboholela ululenga; neke umunyakuleka yimele ye Nguluvi. 7 Lino ipo umunyakupiga hilo si yula yavyalite inyadikwa, nambi yula yaboholye ululenga, ipo munyakupiga hilo ye Nguluvi yalekite inyadikwa yimele nu kutaalipa. 8 Yula yeavyalite na yula yaboholye ululenga mbevali valing'ene, nawo mbevali savanukila ikipelwa ikihuma muwupifu wa ikipigo chawo. 9 Pakuva hwehwe twilukolo, twivanyakupiga pamwinga na Nguluvi, na nyenye mwilungulu lyakwe, kangi nyenye mwikaye yakwe inzenge. 10 Na kwa ukukola uwuwuya wa Nguluvi wamelye, ndawe musenzi umupifu, ndavisele ulutu na uyungi isenge baho pachanya. Ino lwinoga umunu yeyeavesaga yeisenga baho pachanya, alavisage hilo. 11 Pakuva asukuli umunu yungi yeahwana ukuvika ulutu ulungi kangi pe silulula lwelwavisilwe pamwandi, kwekutigila ye Yesu Kilisito. 12 Pachanya pa ulutu ulo umunu yeyeavesaga ahwanite asengele isahabu, amagobole nambi amaganga gegagigusiwa amagobole molofu; ahwanite asengele amagoda, amahamba na apangi ilisoli. 13 Kwa lwelweluvelaga, muwunofu wa ikipigo cha yeyeavesaga munu sawuwoneka ikimunyi kila che Kilisito sawuvika pelu. Pakuva, ikimunyi icho saguwoneka umoto, na umoto ugo sagugosa uwunofu wa ikipigo chakwe. 14 Na chechekivesaga kinu che umunu akwete pakusengela mulutu, wone sakihwane ukukuluka mu moto gula, sweno umunu uyo saanukila ikipelwa chakwe, 15 neke wone ikinu chasenje, manyi sachuse kipye kisile, sweno umunu uyo sisaanukila ikipelwa chakwe, pesi ulwa umunu uyo umwene, saapokwa witigila yakulwike ukuhuma mumoto. 16 Mbi, simukulukagula ukutigila nyenye mwitembeli ya Nguluvi, nu kutigila Umuhe va Nguluvi aakwikala mwa nyenye? 17 Sweno, wone umunu anange i tembeli ya Nguluvi, Nguluvi amwananga umunu uyo; pakuva i tembeli ya Nguluvi nzelu, na i tembeli iyo ye nyenye. 18 Uyungi alemwage ukuvasanga! Umunu yeyeavesaga mwa nyenye yeitigila ina uluhala aakwiga ulwa mung'i, ikiba itigile mupuva sambi ave na uluhala lwa nachene. 19 Pakuva uluhala lwa mung'i ulo wupuva pamiho ga Nguluvi. Pakuva Uwandike Uwelu wilonga, “Nguluvi aakuvibata vanyaluhala mu wusugu wawo.” 20 Na kangi, “Umutwa alukagwe ukutigila amahosa ga avanyaluhala sigahwaniti kinu.” 21 Sweno, umunu alemwage ukwivahila avanu. Pakuva ifinu mbefili fyeenyu. 22 Pawulo, nambi Apolo nambi Kefa, nambi ing'i, nambi uwumi nambi ifwa, nambi ing'ani isa lino na sesasusa, mbesili isi seenyu. 23 Neke nyenye mwivanu va Kilisito, nave Kilisito va Nguluvi.
Copyright © 1999 The Bible Society of Tanzania; ℗ 2010 Hosanna