1 AVAKOLINDO 16

1Lino, ulwa umuhangu gula kuvanu va Nguluvi: mupigage ndawe lwe ndavalaje mu makanisa ga ku Galatiya. 2Nyenye mbemuli, mufilo fya i Jumapili mugavage amagobole agangi mwivika palubali ndawe lwe umunu ahwana ukukwava, sambi kulemwe ukuva nu kuhangula penzusile. 3Nane pe nzusile ukwenyu, ndivatuma avamwi mwanyenye vemuvahagula, sambi vasindike ibalula na ifipelwa fyenyu fya uwuwuya ku Yelusalemu. 4Wone luhwane nane mbite, swe, tubitasa nawo. 5Nene nzusa ukwenyu peyengendye mu Makedoniya, pakuva ndihosa ukugendela kuko ku Makedoniya. 6Apamwi ndikala ukwenyu kwa lusika, apangi nywanite ndikale nanye ulusika mbeluli lwa ikitungwib sambi munange ulugendo lwangu kwekwekuvesaga kula kwembita. 7Sindiwenda ukugendela ukwenyu na ukwangufya ukuhega pemba mulugendo lwangu. Ndihuvye ukwikalasa nanyenye musika, wone Umutwa awende. 8Sweno, sigala baha pa Efeso mbaka ikimunyi cha i Pendekosite. 9Pakuva umulyango gulimwasi gwa ukupiga ikipigo ikikomi chekipwali ipa, nambi povali wolofu avanyalubesa avakumbesa. 10Timoti peasile ukwenyu, mumulavisage, alava na muhwehwe gwegweguvesaga ulusika pe alipamwi na nyenye, pakuva nave ahele akumupigila Umutwa ndawe yinene. 11Sweno, umunu yeyeavesaga alamubedala, pesi ukuta mumutangage sambi ave mu wikalakunoga peiva mulugendo ukunzusila nene kangi, pakuva nene ngumulavisa hilo aase pamwi na avanyalukolo vetu. 12Ulwa munyalukolo vetu Apolo, nene ngamugongolite hilo aase ukwenyu, pamwi na avanyalukolo avangi, neke umwene siwendela ng'ani kulino ukusa kuko lino, neke ulwene aasa hela pe ulusika luva lufikite. 13Sweno, mwikalage miho, mwimage mukange mu lufuuwo, mwivagaya muhwehwe, kangi muvelage na uludali. 14Na chechekivesaga chemupiga, mupigage mu wende. 15Vanyalukolo vangu, muvaseele ava mukaye ya Sitefana; ulwa avene ve vanu vevatasile hilo ukwanukila ulufuuwo ulwa uwukilisito mu Akaya, na lwe vakitawe ukuvapigila avanu va Nguluvi. Nane nguvagongola nyenye vanyalukolo vangu, 16muvigage avanu vevindawe iwo na uwulongosi wawo na mu wulongosi wa umunu yeyeavesaga yeipigasa pamwinga nawo. 17Nene ndihekelela hilo ulwa ukusa kwa Sitefana, Folotinato na Akayiko vakafikite na ukolelela uwuneemu we tuke twinawo pe nyenye muke musupali. 18Ulu lukuyinogela inumbula yangu, kangi na inumbula isenyu. Sweno, lwinoga muviwuke avanu iva. 19Amakanisa mbegali ga mu Asiya gakuvatigila kamwene. Nave Akila na Pilisika pamwi na avanu mbevali va Nguluvi va mukaye yawo vakuvatigila kamwene munogage mulu Mutwa. 20Na vanyalukolo mbevali vakuvatigila kamwene. Nanye mbemuli mwinonelage mu wende wa Nguluvi. 21Nene Pawulo nguvatigila kamwene, pengwandika kwa iliwoko lyangu yinene. 22Yeyeavesaga yesakumwenda Umutwa, uyo avelage akotwike. Malanata-ve Mutwa, wusage! 23Uwuwuya wa Umutwa vetu Yesu Kilisito, wikalage na yinyenye. 24Uwende wangu wikalage na yinyenye kwa ukuhanga na Kilisito Yesu.

will be added

X\