1 AVAKOLINDO 15

1Lino, vanyalukolo vangu, ndiwenda ukuvalongela lula Ulukani Ulunofu lwendavadaliche, nanye swe mukulwanukila na ukwima mwivakangafu mulwene. 2Na kwa ukola Ulukani Ulunofu umo mwe mwipokwa, wone mwinatye ing'ani sendavadaliche, na wone ukufuuwa kwenyu si kwe kwa malanga. 3Neke ndavapelye nyenye ing'ani ingomi hilo se nene ndanuche: ulwa Kilisito afwe ukwimila inzanangifu setu ndawe nzandike Muwandike Uwelu, 4ulwa atasilwe, na ulwa asilibwiswe ikimunyi cha wudatu ndawe lwe nzandike; 5ulwa amweleluche Kefa, na pambele aveleluche vala avichumi na vavili. 6Na pambele kangi aveleluche vanyalukolo avalutye ku magana gahanu sukumwi; avangi mwavawo pewumi, neke avamwi mwavawo vaafwe. 7Swe pambele akumwelelukila Yakobo pambele kangi akuvelelukila avigendo mbevali. 8Pevalutye iwo mbevali, swe akunzelelukila nene, yendi mudodo witigila wanda umunu yemwegale ifilo wesifilakwila. 9Pakuva nene yendi mudodo hilo mwa avigendo, na silunoji nene nambi ukutambulwa mwigendo, pakuva ndalitesise ukulutila likanisa lya Nguluvi. 10Neke, kwa uwuwuya wakwe Nguluvi, ngave de lwendiwali, na uwuwuya wakwe Nguluvi we si wa malanga. Nene ngapigite ukulutila mbevali; neke siyinene nachene, pesi uwuwuya wa Nguluvi wewipiga pamwi na nene. 11Neke nave ndahihyo, wone vavene vevidalika apangi nene yendidalika, ulo silukani nda icho che iki che mbetuli twidalika, na icho che nyenye mwifuuwa. 12Lino, pakuva lwidalikwa ulwa Kilisito asilibwiswe uluhuma ku vafwe, avamwi mwa nyenye vahwana ndawuli ukutigila kugaya ulusilibuko lwa avafwe? 13Wone kugaya ulusilibuko ulwa avafwe. swe, Kilisito nave sasilibwiki, 14na wone Kilisito sasilibwiki, sweno ukudalika kwetu kwa malanga na ulufuuwo lwenyu lwa malanga. 15Ululutye ipo, hwehwe tuke tuva wolelesi va wudesi pa Nguluvi, pakuva twatige ukuta Nguluvi amusilibwe Kilisito uluhuma ku vafwe, na kumbi samusilibwi wone-nachene luve avafwe sivavisilibuka. 16Pakuva, wone nachene luve avafwe sivavisilibuka, sweno nave Kilisito sasilibwiki nangi. 17Na wone Kilisito sasilibwiki, sweno, ulufuuwo lwetu lwa malanga hela, pemukaali mbaka lino mwikalite mu nzanangifu senyu. 18Ululutye palulo, mbevali vala avafwe wevahangite na Kilisito apo vayaje ng'ani. 19Neke wone uluhuvi lwetu mwa Kilisito lukwimila uwumi uwa lino, sweno, hwehwe ye twivanu yetunoje ukuhuguvalilwa hilo ukulutila avangi mbevali mung'i. 20Neke lino inachene ye iyi ukuta Kilisito asilibwike uluhuma kuvafwe, uva ukutala kwa vala avavasise mu fwa. 21Pakuva ndawe lula lwe ifwa yalesilwe mung'i na umunu yumwi, na lwindahihyo nalo ulusilibuko uluhuma ku vafwe lwalesilwe na umunu yumwi. 22Neke ndawe lwe avanu mbevali lwevavifwa kwa ukuhanga na Adamu, lwindahihyo mbevali savasilibuka kwa ukuhanga na Kilisito. 23Sweno umunu iva mumigosekese jakwe: itala Kilisito; pambele vakusa avanu vakwe Kilisito pesaasile. 24Pesilutye iso, uwusililo pesawufika ulusika lwe Kilisito saamutawulila uwutwa Nguluvi Dada, peave adwesise uwutema mbewuli, uludali na uwutwa. 25Pakuva Kilisito satema mbaka Nguluvi peavadwesise avatavangu vakwe na ukuvanyagalika pasi. 26Na umutavangu uwa umudugo yesaadogofywa ye fwa. 27Pakuva Uwandike Uwelu witigila, “Ifinu mbefili safivikwa pasi pa magulu gakwe sambi afiteme, lulipawelu ulwa Nguluvi sakwingila ahange mwilugu lya ifinu, pakuva umwene yeakufivika ifyo pasi ya Kilisito.” 28Neke ifinu mbefili peyefivisilwe pasi ya uwutema wa Kilisito, pepene pe umwana, nave pesaahwana ukwivika pasi ya uwutema wa Nguluvi, yula yeafivisile mbefili pasi ya uwutema wakwe, sambi Nguluvi ateme mwa mbefili. 29Ino wone pave pagaya ulusilibuko, avanu vala avabatisiwige ukwimila avafwe, lino vihuvye ukupelwa kiki? Wone avafwe vave sivisilibukagi, lweki lino uyungi abatisiwe ukwimila avene. 30Nayihwehwe nahwe, lweki twisope mulutalamu imisika mbegili? 31Nye vanyalukolo vangu, ndemuyenyu tulaving'ine na ifwa ifilo mbefili neke lwengwivahila mwanyenye muwunani wetwinawo ukuhanga na Yesu Kilisito Umutwa vetu ulu ulwileka nene ndalike ulu. 32Ngembelage ndonyite isa uwunu hela, ukwihoma kwa nene na amakoko amakali baha ipa pa Efeso, kuke kumeela kiki? Wone avafwe sivisilibukagi, sweno, “Twililage na ukwinywela, pakuva imilawu twifwila.” 33Ena, nachene mulasangwa mumalanga! Uwiyendi uwubi nachene wakwananga imigendele iminofu. 34Mwiwukage! Muvange ukwikala wunofu, na mulava pemupiga inzanangifu. Avamwi mwanyenye sivamuseli Nguluvi na padodo hela. Ulu nguvalongela nachene, lukuvahongela inyoni pakomi. 35Neke umunu ahwanite awuse: “Avafwe vavisilibuka ndawuli? Kangi vava na umuvili uguli ndawuli pesavasilibwike kangi? 36Nyenye mwivapuva! Cheuvyalite sikimelagi pesikifwi tandi. 37Na chewivyala veve ye nyadikwa hela, apangi ya ingano nambi nyadikwa iyingi, neke siwivyala ikimelo mbekili chekiwoneka pambele. 38Sweno Nguluvi akuyipela inyadikwa iyo, umuvili gweiwenda yumwene, na inyadikwa yeyeyivesaga yayipelwa umuvili gwakwe uguli wungi. 39Na imivili ja ifigawa mbefili sigihwana mbegili nda. Imivili ja avanu mbevali gihwana, na ija ifikoko giliwungi, na ija ifidege najo giliwungi, mbaka na imivili ija isomba najo giliwungi. 40Kogili imivili ija kuchanya na kangi kogili ja mung'i; uwunofu wa imivili ja kuchanya wuliwungi, na uwunofu wa imivili ja mung'i, nawo wuliwungi. 41Powoli uwunofu wa ilisuva, na uwa umwesi na wa ing'eng'esi na ing'eng'esi nawo siwihwana wusutine. 42Lwindahiyo kwa ulusilibuko lwa avafwe. Ndawe inyadikwa, umuvili gwagwitagwa mu changa, gwitagwa muwanangifu, neke gwagwisilibukila mu wutakwanangika. 43Gwagwitagwa mu wusakafu, gwagwisilibukila mu ndolo; gwagwitagwa mu wuhomefu, gwagwisilibukila mu ludali. 44Pegwitagwa gwagwiva muvili gwa mumu mung'i, pegwisilibuka gwagwiva muvili gwa umuhe. Pogoli umuvili gwa mung'i na saguva pogoli na umuvili gwa umuhe. 45Pakuva Uwandike Uwelu witigila, “Umunu uva ukutala, Adamu, e kigawa kinyanumbula inya wumi;” neke Adamu uva umudugo, ye Muhe umugava uwumi ku vanu. 46Sweno umuvili gwegwagwitala si gula ugwa umuhe, pesi ukuta gula umuvili gwa mung'i pambele gukusa umuvili gwa umuhe. 47Adamu uva ukutala agafilwe na lilongo ukuhuma mung'i neke umunu uva kavili ahumite kuchanya. 48Sweno, avanu mbevali avahumile kulumwene vihwana na umunu uyo yeagafilwe na ililongo; neke vala ava kuchanya vihwana na yula yahumite kuchanya. 49Ndawe lwe twihwana na yula yeagafilwe mulilongo, lwindahihyo kangi satwihwana na uyo yahumite kuchanya. 50Sweno, vanyalukolo vangu, nditigila de: kila ikigave na umuvili na idanda sikihwaniti ukwingila mu Wutwa wa Nguluvi, na kinyakwanangika sikihwaniti kive muwutakwanangika. 51Mupulikise tandi, nguvalongela nyenye isa ikinyele: hwehwe mbetuli sisatuvasa, pesi mbetuli satupitulwa 52sukumwi hela ulwa ulusika lwa ilipembe lya umudugo, pakuva pakuva pesalikufilwe, avafwe savasilibuka vave muwutafwa kangi, na hwehwe satupitulwa. 53Pakuva lunoje chechekivesaga ikinyakwanangika kifwale uwutakwanangika, umuvili ugwa kufwa gufwale uwutafwa. 54Swe, umuvili ugu ugunyakwanangika pesaguvagufwite uwutakwanangika, na kila ikinyakufwa peyekifwite uwutafwa, ipo pepene pesalukwila ulukani ulwandike: “Ifwa yeyidwesiswe; uwutalemwa yewukwilye!” 55“Lino veve vefwa uwulema avangi wako wulipi? Uludali lwako lwa uwuvafi lulikwi? 56Ifwa yayiva na uludali ukwimila inzanangifu nawo uwanangifu wawipelwa uludali lwakwe mu ndagilo. 57Neke tumulumbage Nguluvi yatupelye uwutalemwa ukwimila Umutwa vetu Yesu Kilisito. 58Sweno, vanyalukolo vangu nyevende, mwimage mukange. Kangi musugunalage mbepali ukumupigila Umutwa muludali, we mukulukagula ulwa ikipigo icho cha ukumupigila Umutwa chemuhele mukumupigila sisakiyaga nangi.

will be added

X\