1 AVAKOLINDO 14

1Lino musugunalage ukuva na uwende. Kangi mupifukage hilo ukuva na ifipelwa ifingi fya Umuhe, na hilo ikipelwa cha ukudalika ulukani lwa Nguluvi. 2Yula yeailonga indongele ingenzi, silonga na avanu pesi ukuta ilongana na Nguluvi. Uyo ailongela muludali lwa Umuhe ing'ani isifihime. 3Neke yula munyakipelwa cha ukudalika ulukani lwa Nguluvi, ailonga na avanu sambi avatange na ukuvasikimika. 4Munyakulonga indongele ingenzi akwitanga iyena hela. Neke umunyakipelwa cha ukudalika ulukani lwa Nguluvi, uyo akulitanga likanisa. 5Sweno, ngembwenda nyenye mbemuli mulongage indongele ingenzi, neke hilo luke lunogela mbemuli muvelage na ikipelwa cha ukudalika ulukani lwa Nguluvi; pakuva umunu umunya kipelwa cha ukudalika ulukani lwa Nguluvi uyo ye anoje hilo ukulutila yula umunyakulonga indongele ingenzi, pesi lwinoga hela avelage pwali umunu yeahwanite aganule iso seilonga, sambi ilikanisa litangwe. 6Sweno, vanyalukolo vangu, wone nzuse ukwenyu na ukulonga nanye, kwa indongele ingenzi mbi, mwambula kiki? Simwambula ikinu chechekivesaga, pesi ukuta apangi wone ndivalongele sa uwugubulilwe wa Nguluvi, nambi isa uwuseela uwungi wewuvesaga, apangi isa ulukani lwa Nguluvi, na apangi sa inzigiso isingi de. 7Wone amagombo amagaya uwumi ndawe ikilanzi na ikimadinde sifyafing'wisa wunofu ndawuli nani yeagukagula umukino gwakwe. 8Wone ingoolo yikoolwe fibi, mbi, nani yeigelanisa wunofu ategule amahomelo ahume kwigalu? 9Sweno lwindahihyo na kwa nyenye, wone indongele yenyu siyikagulanika wunofu, mbi, nani yalukagula lwemwilonga? Ing'ani iso siyaga chaka hela. 10Mung'i mosili indongele nzolofu isiliwungi, na sikoyili indongele nambi yimwi ingaya icha ukuganula. 11Neke wone sindiyiseli indongele yeilonga umunu uyungi, nene ndiva ndimugenzi kwa umunu uyo, nave iva mugenzi kwa nene. 12Sweno, lwindahihyo na kwa nyenye, pakuva mwidoboka ukuva na ifipelwa fya Umuhe, musugunalage hilo, ukwanukila ifipelwa fila fyefikulitanga likanisa. 13Sweno, yeilonga indongele ingenzi lunoje ifunyage apelwe na ikipelwa cha ukusiganula. 14Pakuva, wone ngwifunyila mu ndongele ingenzi inumbula yangu hela ye yikwifunya, neke uluhala lwangu lwisigala lugaya kinu. 15Lino, ngitage ndawuli? Ndifunyila munumbula yangu, kangi ndifunyila na muluhala lwangu; nzimbila munumbula yangu, kangi nzimbila na muluhala lwangu. 16Peukumulumbila Nguluvi munumbula yako hela, luva ndawuli kwa umunu uyungi uva ndahihi yaali mu kanisa pakukwidikisa ukwifunya kwako mululumbo sambi atigile: “Ena,” wone sakulukagula lwewilonga? 17Na apangi ukwifunya kwako mululumbo kuhwanite nachene kuve kunofu, neke uyo uyungi sikumutanga kinu nda. 18Nene ngumulumba Nguluvi, pakuva ndihwana ukulonga indongele ingenzi kolofu hilo ukulutila nyenye mbemuli. 19Neke lino mumikong'ano ja avakilisito, nene ndiwendaga ukulonga nawo ing'ani sihanu isikagulanika sambi ndivigise na avangi, siluling'eni ukulonga ing'ani mbilima yimwi mundongele ingenzi. 20Vanyalukolo, mulava nda mwivana vadodo mumahosa genyu. Kulubali lwa uwanangifu muvelage nda mwivana vadodo, neke mu mahosa genyu lunoje muvelage nda mwivanu yemukange. 21Pakuva nzandike mu ndagilo: “Umutwa itigila de: ‘Ukukola kwa avanyakulonga indongele ingenzi, na kwa imilomo ja avagenzi, sandonga na avanu iva, nambi ndahihyo, sisavamulikisa nene.’ ” 22Ikipelwa cha ukulonga indongele ingenzi icho kilagilo, si kwa ukwimila avanu avanyalufuuwo, pesi kwa vala vesivalafuuwa; neke ikipelwa cha uwuvisi icho ukwimila vala vevafuuvitwe na si kwa vala vesivalafuuwa. 23Sweno, likanisa mbelili pelikong'ana pamwi, na mbevali swe vivanga ukulonga indongele ingenzi, wone vaase avanu ava ndahihi apamwi vesivalafuuwa vakuvafika ndahihyo, mbi sivavatigila nyenye mugulwike lukwale? 24Neke, wone mbevali vave vidalika ulukani lwa Nguluvi, wone aase umunu uva ndahihi apamwi yesalafuuwa, mbesili sapulika simumolelela ulwa uwanangifu wakwe yumwene; mbesili sapulika simuhiga. 25Isa ikinyele cha munumbula yakwe sivikwa pelu, nave afugama na ukwifunya kwa Nguluvi itigila. “Nachene Nguluvi alipamwi na nyenye.” 26Vanyalukolo, tulonge kiki, lino? Pemwikong'ana uyumwi ina lwimbo, uyungi lwigiso, uyungi uwugubulilwe indongele ingenzi apangi uwuganusi. Mbesili sivelage kwa ukulitanga likanisa. 27Wone vave povali avanyafipelwa ifya ukulonga indongele ingenzi, valongage vavili apangi vadatu, valalutisa ipo, kangi vivalage yumwi yumwi; na avela pwali umunu umunya kuganula isilonzilwe. 28Sweno, wone asupali umunu yahwanite ukuganula, swe, umunyakulonga indongele ingenzi akatukage mu likanisa, alongage na inumbula yakwe yumwene swe na Nguluvi. 29Lekage avavisi vavili nave vadatu valonge neke avangi vagelanisage ing'ani sawo. 30Wone uyumwi peilonga neke uyumwi va vevipulikisa apelitwe lukani uluhuma kwa Nguluvi, swe, yula yeilonga akatuke tandi. 31Pakuva mbemuli muhwanite ukudalika ulukani lwa Nguluvi, mukwivala yumwi yumwi; sambi mbemuli mwiyigise na ukukangaswa. 32Ikipelwa cha ukudalika ulukani lwa Nguluvi lwinoga kivelage muwulongosi wa yuyo umunyakipelwa. 33Pakuva Nguluvi si Nguluvi va iliyowo, pesi va uwikalakunoga. 34Ndawe welwelwiwali mu makanisa mbegali ga avanu va Nguluvi, avang'inetu vakatukage mu mikong'ano ja avafuuvitwe. Sivatawule ukulonga; pesi ulwa vavelage vanyachoga ndawe indagilo weyilonga. 35Wone vave na lukani lwa ukuwusa, vavawusage avavaha vawo mukaye sawo, pakuva lwihonga nyoni kwa umung'inetu ukulonga mu mikong'ano ja avafuuvitwe. 36Mbi, ndawuli mwihosa ulwa ulukani lwa Nguluvi lwavanje mwa nyenye, na apangi tutigile lwavasye nyenye mwiyena hela? 37Wone pwali umunu yeihosa ulwa Umwene mukami va Nguluvi yatumitwe, apangi ulwa ina ikipelwa cha Umuhe, alukagulage ulwa isi senguvandikila nyenye lwe lulagilo lwa Umutwa. 38Neke wone pwali umunu yesakusikagula iso, sweno, umunu alamupulika uyo. 39Sweno, vanyalukolo vangu, luvavaje mudobokage ukudalika ulukani lwa Nguluvi; neke mulamutanila umunu yeilonga indongele ingenzi. 40Neke mbesili sipigikage mu choga na mumigosekese iminofu.

will be added

X\