1 AVAKOLINDO 10

1Vanyalukolo vangu, ndiwenda mulukagule ukutigila avakukwetu mbevali vepasi ya uwulolesi wa lila lifufu, na ukutigila mbevali valowike mubahali yila. 2Mbevali vabatisiwe sambi vave vahanzile na Musa kwa ukukola lila lifufu na ibahali. 3Mbevali valye ichakulya kikilaga icha Umuhe, 4mbevali kangi vanywe ikinywewa kikilaga icha umuhe, pakuva vanywe ukuhuma mula mwitalawe lya Umuhe lyelyagendige pamwinga nawo; na ilitalawe ilyo lye ye Kilisito yumwene. 5Nambi ndahihyo, awolofu vamuvifise Nguluvi, na avatasile mubalali. 6Sweno, ing'ani iso mbesili, se nda figaniso hela kwa hwehwe; sikutukenyela hwehwe tulemwage ukudobokela inzanangifu ndawe avene lwevadoboche. 7Mulemwage ukuva vasunyalila ifihwananguluvi ndawe avangi lweveviwali ndawe lwe Uwandike Uwelu wewilonga, “Avanu vateng'eme sambi valye na ukunywa, swe vakwinuka ukuwunga.” 8Tulemwage ukuva vagoni ndawe avangi va avene lwevapigite uwugoni, swe vifwa kimunyi kimwi avanu mbilima machumi gavili na vadatu. 9Tulemwage ukumugela Umutwa ndawe avangi va avene lwevamugelite, swe vifwa vilumwa na inzoka. 10Mulemwage ukwilonganza ndawe avangi va avene lwevapigite, swe ndawe Umuwulasi avawulagige! 11Sweno, ing'ani iso savafikite sambi sivigise avangi, naso sandikwe sambi situkenyele hwehwe ye twipipi na ifilo fya kumudugo. 12Yula yeihosa ulwa imile akange ikomalilage alagwa. 13Ukugelwa kwe mukave mwigelwa nyenye kuling'ene hela na ukugelwa kwa avanu. Neke Nguluvi uva ukwihuvilwa, nave sisaavaleka mugelwe ukulutila uludali lwenyu, neke pamwinga na ukugelwa, umwene kangi avapela uludali ulwa ukukangalila na ing'asi ya ukuvahumya umo mwivatelefu. 14Lino, nye vanyawende vangu, mwepage ifihwananguluvi. 15Ndilonga nanyenye, ndamwivanu vanyaluhala ulukwilye, pede mwihagulilage yinyenye mung'ani iso sendilonga. 16Ikinywelo icha uwufunyilile, tukukifunyilila sitwatwihanga idanda ya Kilisito? Lwindahihyo na petwilya pamwinga umukate mbi, sitwatwihanga umuvili gwa Kilisito? 17Pakuva umukate ugo gumwi, hwehwe, nambi twiwolofu, twimuvili gumwi, pakuva mbetuli twihanga umukate gugo gumwi. 18Leke mwiyigise kwa ikiganiso icha Avayudaya vavene, vavene vevavilya ifitawule nambika pifunyo vahanzile na pala pifunyo. 19Pede ndiwenda ukulonga kiki? Kwekutigila ichakulya ikitawule nambika kwa ifihwananguluvi nacho chakiva kinu, mbi ikihwananguluvi nacho kinu? 20Nambi ludodo! Chendilonga che iki amafunyo gevavitambikila vesivamuseli Nguluvi vavitambikila amasoka, si kwa Nguluvi nda. Nguvakanila nyenye sukumwi, mulemwage ukuhanga na amasoka. 21Simuhwaniti ukunywela ikinywelo icha Umutwa na ikinywelo cha amasoka, simuhwaniti ukuhanga pawulilo wa Umutwa na pawulilo wa amasoka. 22Apangi mbi twiwenda Nguluvi ave na igila? Ngali mwitigila ukuta hwehwe twina uludali ukumulutila umwene? 23Kwa nene ifinu mbefili vigaya mwiko, neke nave ndahihyo si mbefili ifinoje. Ifinu mbefili figaya mwiko neke si mbefili ifyafitanga. 24Sweno umunu alemwagwe ukusaka hela iyena, pesi uwambule wa umuyagwe. 25Mulisage chechekivesaga kigusiwa mu wugulilo kono we simwiwusa wusa ukwimila inumbula senyu yinyenye, 26pakuva Uwandike Uwelu witigila, “Ing'i na mbefili ifilimumo wunono wa Umutwa.” 27Wone umunu yesafuuvitwi avalaalike nanye mwidikile ukubita, swe, mulisage mbefili fyevavatengela kono we simwiwusawusa ukwimila inumbula senyu. 28Neke wone umunu avalongele ukuta, “Ichakulya iki kitawule nambika kwa ifihwananguluvi.” Sweno, kwa ukwimila kwa yuyo yeavalonje na ukwimila ulwiyiwuko mulalya. 29Nditigila, ‘Ukwimila ulwiyiwuko lwakwe si ulwenyu mutane ukulya.’ “Mbi ndawuli uwutemapangu wangu wimile ulwiyiwuko lwa umunu uyungi? 30Lino wone nene ndilya ichakulya icho kono ngumulumba Nguluvi, lino lwindawuli avangi vasokame kwa ichakulya che nene ngumulumbila Nguluvi?” 31Sweno, chechekivesaga mwipiga nambi ukulya nambi ukunywa, mupigage mbefili ukwimila indolo sa Nguluvi. 32Mulava kikuvaso kwa Avayudaya nambi Avagiliki, nambi likanisa lya Nguluvi. 33Munzigage nene, ndigela ukuvapigila uwunofu mbevali kwa lwelweluvesaga, kono we sindisaka ukwambula kwa ndiyena pesi kwa ukwambula kwa mbevali, sambi vapokwe.

will be added

X\